COV LAUS MUAJ PEEV XWM COJ TAU KEV THIAB PAB CAWM NTIAM NEEG TSHIAB TAU

Vaj Qhia Fas Ntshis Kus rov piav txog cov laus neeg lub txiaj ntsim pub rau tsoom neeg ntseeg hauv Hnub Plaub lub lis piam 2 caij Plaub Caug, hnub no yog hais txog cov laus txoj kab xwm ua ib tug piv txwv rau cov hluas.

Cov lus hauv Ntawv Ntshiab tau hais txog Tswv Ntuj hu Nos Hes los ua txoj hauj lwm rov txhim qhov zoo nyob hauv txhua yam Tswv Ntuj tau tsim los, tom qab Tswv Ntuj tso dej los yaum qhov phem qhov tsis huv tas.

Vaj Qhia hais tias Huab Tais Yes Xus tau hais txog Nos Hes, yog xav ntuas peb txog kev hloov siab tshiab nyob hauv txoj kev cawm zaum kawg. Thiab nws ceeb toom rau peb sawv daws tias txhua tiam neeg kuj zoo xws li Nos Hes tiam neeg, peb raug ntxias kom lees tias kev txhaum thiab noj lwm tus nqe zog yog yam neeg ib txwm coj ib txwm ua los, thiab kom peb ntsia hla kev ncaj ncees rau cov neeg pluag thiab saib tias kev rhuav txhua yam puag ncig peb uas Tswv Ntuj tsim los ntawd yog ib yam tsis tseem ceeb.

Vaj Qhia hais ntxiv tias nyob hauv peb tiam neeg no mas tej yam li hais los yog cov txiv txi tawm hauv neeg txoj kab ke saib tus kheej tseem ceeb, muab tus kheej ua qhov loj.

Cov laus mas lawv zoo xws li Nos Hes, lawv muaj peev xwm ntuas peb txog yam txaus ntshai no thiab pab ntuas peb kom rov xeev tau tias Tswv Ntuj tsim peb los ua tus saib xyuas txhuam tsav Tswv Ntuj tau tsim los.

“Cov laus kev txhawj xeeb txog cov hluas txoj kev ntshaw, kev xav thiab kev hlub mas tsim nyog yuav ua lub suab hu rau coob leej. Thiab yuav yog txoj kev xaiv uas cov laus nyiam cov hluas tiam tshiab no. Tswv Ntuj cov lus foom hmoov zoo poob rau cov laus vim cov laus muaj rab peev xwm ua tib neeg.”

Kawg no, Vaj Qhia Fas Ntshis Kus xav kom sawv daws qhib siab dav yoog raws Nos Hes thiab peb yuav sib pab txhim lub nkoj tshiab, yog lub nkoj zoo siab hlo txais kev txhawj xeeb thiab kev vam khom txog lub ntiaj teb lawm tom ntej.

 “Nos Hes mloog Tswv Ntuj txoj cai ces Tswv Ntuj foom hmoov zoo rau Nos Hes thiab pub ib lub ntuj tshiab rau Nos Hes.”