COV LAUS TSUM PAB COV HLUAS TAWM TSAM TXOJ KEV NTXIAS

Vaj Qhia Fas Ntshis Kus cov lus hauv Hnub Plaub lub Lis Piam, yog ntuas cov laus kom tuav lawv qhov ncaj kom khov kho cia nyob hauv lub caij raug ntxias.

Tim 25 lub 5 hlis 2022, Vaj Qhia Fas Ntshis Kus nthuav cov ntsiab lus hauv Ntawv Cog Qub Lus yog phau ntawv Kos Es Les. Vaj Qhia ntsia pom tias kev tswj yus kom txhob ntshaw ua txhua yam tsis muaj qab hau rau tus kheej tsom txog txoj kev ntxias nyob hauv peb tiam thiab tiam dhau los tau zoo li cas.

Vaj Qhia hais tias Kos Es Les lub tswv yim rov mus rov los txog nws kev nrhiav kom paub txog txoj sia thiab nws pib ua xyem xyav thaum txoj kev txawj ntse nws paub tau coj nws kom deb kev ua ib tug neg ncaj. Yog li Kos Es Les thiaj sau ntuas tias neeg yuav dim hauv rooj ntxiab no tau mas yog ‘tsum hwm Tswv Ntuj thiab ua raws Tswv Ntuj Txoj Cai’; vim yam no yog neeg txoj kab xwm.

Vaj Qhia ntuas tias peb txhua tus neeg raug ntxias kom tsis ntab ntws txhob quav ntsej dab tsi thaum peb pom tias peb kev sib zog ntawd tsis txi txiv thiab zoo xws li txhua yam, tsis hais zoo los phem, yuav ploj ntais mus. Yam no yog ib hom kev xav rov txo tus kheej ua rau neeg rov tu siab.

Vaj Qhia thiaj hais tias “Yog cov laus uas tau pom txhua yam tas lawd, lawv tseem tuav qhov ncaj cia khov kho xws li qhov qub, mas tseem muaj kev vam khom nyob hauv kev nyiam thiab kev ntseeg.”

Vaj Qhia hais ntxiv tias lub ntuj tiam peb nyob no, mas sawv daws ntseeg tias sawv daws muaj peev xwm ua tau txhua yam, ces thiaj ua rau sawv daws tsis nco qab txog lub ntsiab hauv kev nyiam thiab qhov zoo.

Vaj Qhia hais tias ua cas kev txawj ntse uas tsis muaj kev nqes tes ua thiaj yog qhov txaus ntshai rau leej neeg li no “Qhov tseeb uas neeg xev tawm los, yog lub nkuaj kaw lub ntiaj teb, nws sau kev tsis liam fab txog lwm yam tsis zoo xws li nws. Kev nrhiav qhov tseeb hauv tiam tshiab no raug ntxias kom tso tej qhov ncaj pov tseg. Tsis muaj kev ntseeg txog txoj hmoo, lo lus cog tseg, thiab kev cawm ntxiv lawm.”

Vaj Qhia hais tias lub ntuj tiam no tej kab lis kev cai yog kev txawj ntse thiab kev luam thuam sib txuam, kom tau tshem kev tsim txiaj tawm hauv neeg cov hauj lwm, thiab coj mus poob rau qhov chaw uas neeg tus plig tsis muaj zog.

Vaj Qhia nthuav tias tej yam li hais los no mas Kos Es Les hais tias yog vwm tias paub txhua yam, los yog cov Txiv Twj Cuab txheej thaud hais tias ‘zwm rau ntiaj teb kev txawj ntse yam tsis xav txog qhov ncaj thiab tej yam yuav tshwm raws qab tuaj. Li ntawd, Vaj Qhia thiaj ntuas tias tus neeg yeem ua raws txoj kev ntxias no mas nws tau qhib nws lub rooj loog rau dab phem cov tub rog nkag los nyob hauv nws lub tswv yim. Vim tias tus neeg tsis quav ntsej txog qhov ncaj thiab ua neeg luam thuam mas nws tau rho lub ntsiab thiab lub zog tawm hauv kev paub txog qhov tseeb mus. Yog li mas nyob hauv tiam no peb thiaj pom tias muaj cov xwm cuav ntau, muaj kev ntseeg tej yam tsis muaj tseeb, thiab qhov tseeb raws kev tshawb nrhiav cuav.

Vim li ntawd, hnub no Vaj Qhia thiaj hu cov laus sawv daws kom lawv pab cov hluas kom khiav dhau lub siab ntxias kom nrhiav qhov tseeb yam tsis quav ntsej txog qhov ncaj.