COV NEEG TSIS MUAB HLOB LUB ZOG

Vaj Qhia Fas Ntshis Kus coj lub txoos teev Ntuj hauv Leej Ntshiab Mab Liab nyob Khos Les Maas Ntsis Os lub Tsev Teev Ntuj loj, hauv nroog Las As Nqis Las (L’ Aquila) qhov chaw cia Leej Ntshiab Vaj Qhia Xes Les Tais Tsib (St. Pope Celestine V) cov pob txha. Yog li Vaj Qhia Fas Ntshis Kus thiaj nthuav txog Leej Ntshiab Vaj Qhia Xes Las Tais Tsib lub neej thiab Tswv Ntuj kev khuv leej.

Vaj Qhia pom tias Leej Ntshiab Vaj Qhia Xes Les Tais Tsib yog tus tsis muab hlob mas Tswv Ntuj thiaj nyiam nws. Yog peb xav kom cov hauj lwm xis Tswv Ntuj siab nyiam tsheej xeeb tau mas peb tsum txais cov neeg tsis muab hlob lub zog.

Cov neeg tsis muab hlob mas lwm tus saib lawv zoo li yog tus neeg tsis muaj zog thiab yog tus yeem, tiam sis qhov tiag mas lawv yog tus yeej vim lawv tso siab rau Tswv Ntuj thiab paub Tswv Ntuj siab.

Vaj Qhia hais ntxiv tias Tswv Ntuj qhib yam zais ntshis rau tus neeg tsis muab hlob, thiab vim tus neeg tsis muab hlob mas Tswv Ntuj thiaj tau koob meej.

Vaj Qhia nthuav kev tsis muab hlob lub ntsiab tias tsis yog kev saib tsis taus yus tus kheej. Tiam sis yog yus saib tsis taus yus lub zog xws li yog kev txom nyem. Yog peb tsis muab hlob mas thaum peb raug txom nyem, peb thiaj tsa muag nrhiav Tswv Ntuj tus ua tau txhua yam. Li ntawd ‘Tswv Ntuj thiaj yog cov neeg tsis muab hlov lub zog.’

Yog vim li tau hais mas Vaj Qhia thiaj zeem tseeb tias Leej Ntshiab Vaj Qhia Xes Les Tais Tsib thiaj tau ua pov thawj txog lub Moo Zoo vim tias tsis muaj lub zog los lub tswv yim twg ua tau txoj saw khi nws cia, thiab sawv daws yuav tau qhuas txog lub Koom Txoos tsis zwm rau ntiaj teb lub tswv yim, lub Koom Txoos ua pov thawj txog tus Tswv Ntuj khuv leej neeg lub npe.

Vaj Qhia hais ntxiv tias “Lub Moo Zoo lub plawv yog kev khuv leej, vim kev khuv leej peb thiaj paub nyiam peb kev txom nyem.”

Hais txog lub swm txheej hauv kev khuv leej thiab kev zam txim mas Vaj Qhia hais tias kev khuv leej lub swm txheej yog thaum peb paub tias muaj tus tos txais peb zoo, thaum peb qaug es rov sawv los tau, thaum peb lub zog rov loj tuaj, thaum peb kev mob ntaug lawm, thaum peb pom tias peb lub siab rov su dua tuaj.

Kev zam lub swm txheej yog thaum peb hnov tias muaj tus nrog peb nyob ntawm no thiab ziag no, qhov nyob ze peb pom yog kev sawv rov los. txoj kev zam yog xub kev coj peb hla hauv kev tuag mus cuag txoj sia, hla hauv lub swm txheej raug txom nyem thiab tu siab mus cuag kev twj lij thiab xyiv fab.

Yog li mas Vaj Qhia thiaj xav kom lub Koom Txoos ua thaj chaw cia ntiaj teb neeg tau rov sib haum xeeb, thiab tau txais lub swm txheej nyob hauv Tswv Ntuj lub txiaj ntsim pab kom peb rov saw tau saum peb ob sab taw thiab tau txais lub cib fim dua ib zaug ntxiv.

“Thov kom lub Koom Txoos yog lub Koom Txoos zam txim mus li, tsis yog ib xyoos ib zaug xwb.”