COV TUB TSHAJ LUB MOO ZOO TSIS TXHOB CUAM TSHUAM TSWV NTUJ LUB TSWV YIM

Vaj Qhia Fas Ntshis Kus cov lus hauv hnub tim 16 lub 10 hli tas lo no yog nthuav txog Leej Ntshiab Pob Zeb thaum nws pom daim ntaub pua rooj muaj cov tsiaj thiab cov noog nyob saud, tiab nws hnov ib lub suab hais kom nws noj cov tsiaj ntawd. Pob Zeb hais tias nws tsis noj cov tsiaj tsis huv, tab sis lub suab hais rau nws tias : Tej yam uas Tswv Ntuj ua kom huv, mas koj tsis txhob hais tias tsis huv.

Vaj Qhia nthuav tias Huab Tais Ntuj xav kom Pob Zeb txhob txiav txim tias yam twg los tus neeg twg huv los tsis huv, tab sis yog kom ntsia txog tus neeg ntawd lub siab. Zaj no Huab Tais Yes Xus tab tom qhia peb sawv daws tias : Yam ua kom tib neeg tsis huv mas tsis yog tuaj sab nraud tuaj, tab sis yog tawm hauv neeg lub siab los.

Tom qab Pob Zeb pom qhov no tas, Tswv Ntuj tau xa nws mus rau tus xab txheeb Los Mas hu ua Kos Nes Lias tsev. Pob Zeb piav txog Leej Pleev thiab kev daws txhaum rau sawv daws mloog, Kos Nes Lias thiab nws tsev neeg thiaj txais Cim Ntxuav nyob hauv Leej Pleev lub npe.

Thaum Pob Zeb ua Cim Ntxuav rau cov neeg teev pej kum dab li no, mas tsoom ntseeg hauv Yes Lus Xas Les sawv daws hais lus tsis zoo txog Pob Zeb vim qhov Pob Zeb ua mas tawm tsam lawv txoj cai. Tab sis tom qab Pob Zeb tshaj Tswv Ntuj Lus rau Kos Nes Lias lawm, mas Pob Zeb tau txais kev twj lij nyob hauv nws tus kheej thiab tau kev twj lij nyob hauv kev txuas lus nrog Tswv Ntuj thiab nrog lwm tus, vim Pob Zeb tau pom Tswv Ntuj lub tswv yim nyob hauv Leej Ntuj Plig Ntshiab txoj hauj lwm.

Vaj Qhia hais tias qhov xwm no tau hloov Pob Zeb lub neej thiab lub ntsaim muag tias Tswv Ntuj txoj kev zes nws no tau hloov nws lub siab. Pob Zeb txheej xeeb tau tias Tswv Ntuj xaiv haiv neeg His Xas Lais ua Tswv Ntuj haiv neeg tsis yog vim lawv yog neeg zoo tab sis yog lub cim qhia tias lawv yog qhov nruab nrab xa Ntuj txiaj ntsim mus rau neeg ntseeg pej kum dab.

Vaj Qhia Fas Ntshis Kus haiv ntxiv tias Pob Zeb zaj no qhia peb tias cov tub tshaj Ntuj Lus tsis muaj cuab kav cuam tshuam Tswv Ntuj lub tswv yim pab cawm neeg tau.

Vaj Qhia hais tias cov ntseeg sawv daws yuav tsum qhib nws tus kheej rau txoj kev cawm neeg, vim Tswv Ntuj xav cawm sawv daws. Lawv raug hu kom tawm hauv lawv los thiab qhib lawv tos txais lwm tus uas nyob ze lawv. Hloov kev sib raug zoo los nyob rau hauv kev ua kwv ua tij.