HLA DHAU KEV NYUAJ NYOB HAUV KEV THOV NTUJ

Vaj Qhia Fas Ntshis Kus cov lus hauv hnub tim 19 lub 5 hlis no yog kom peb ua tiag nyiaj kom hla dhau tej yam cov nyom peb thaum peb tab tom thov Ntuj.
Vaj Qhia hais tias muaj 3 yam cov nyom peb nyob hauv kev thov Ntuj: kev ntxhov siab, kev tsuag los yog qhuav siab, thiab tub nkeeg.
Kev ntxhov siab tsis yog ntsib nyob hauv kev thov Ntuj xwb, tiam sis ib txwm ntsib nyob hauv txhua yam peb tau ua. Vim neeg lub tswv yim yuav xav txog ntau yam tsis hais thaum sawv los pw. Yog peb yeem swb rau txoj kev ntxias no mas peb yuav ua lwm yam kom zoo tsis tau.
Vaj Qhia hais tias yam ua kom peb lub siab ua xyem xyav tsis yog cov txhaum nyob hauv peb, tab sis peb tsum tawm tsam kom yeej. Peb tsum txais lub Moo Zoo hais txog kev nyiaj ntxeem. Peb tsis paub tias Huab Tais Yes Xus yuav los hnub twg, li ntawd peb thiaj tsum zov hmo, meej pem thiab muab siab txog cov hauj lwm hauv peb ob txhais tes.
Qhuav siab los yog siab tsuag nyob hauv kev thov Ntuj – thaum peb pom tias peb cov lus thov tsis muaj qab hau thiab tsis pab kom peb kaj siab los muaj siab tau – kev qhuav siab no txawv kev ntxhov siab vim kev qhuav siab tsis yog yam yuav tshwm nyob sab hauv peb txhua zaus.
Muaj tej zaus, Tswv Ntuj pub kom peb ntsib kev qhuav siab sab ntsuj plig, kom peb thiaj vam txog txoj kev ntseeg ntshiab.
Hais txog kev tub nkeeg, yog yam haub ntxias neeg nyob hauv kev thov Ntuj tiag tiag. Kev tub nkeeg yog ib feem ua rau neeg lub siab poob qis, kev tub nkeeg yog ib feem hauv 7 yam txhaum uas yuav coj neeg mus rau txoj kev tuag sab ntsuj plig.
Thaum peb ntsib cov xwm no hauv kev thov Ntuj, mas peb tsum ua tiag nyiaj ua tiag txeem kom dhau.
Cov ntshiab lawv sawv daws kuj tau hla dhau txoj kev ntxias no los dua lawm thiab. Yog li nyob hauv peb mas peb tsum kawm kom paub thov Ntuj tas mus li vim cov ntseeg, lawv thov Ntuj tsis tseg.
Txawm tias peb yuav cem yuav yws Tswv Ntuj xws li Yob, los peb yeej paub tias thaum kawg Tswv Ntuj yuav teb peb los lus thov. Tswv Ntuj yuav sau txhua yam neeg tau hais ntawd los nyob hauv Leej Txiv txoj kev nyiam, thiab txiav tias txhua yam neeg tau ua ntawd yog neeg zeem tseeb txog neeg txoj kev ntseeg xws li neeg lo lus thov.