HLUB THIAB HWM COV LAUS

Nyob hauv tim 20 lub 4 hlis 2022 yog thawj hnub Vaj Qhia Fas Ntshis Kus rov tau tuaj ntsib cov neeg ntseeg nyob hauv lub tshav puam Leej Ntshiab Pob Zeb tom qab kab mob sib kis tau 2 xyoos. Nyob hauv hnub no mas Vaj Qhia tau hais txog kev saib taus cov laus lub sam xeeb thiab nqua hu cov hluas kom kawm txog txoj sia thiab lub neej.

Cov lus hnub no Vaj Qhia yuav nthuav rau sawv daws mloog yog cov lus nyob hauv ntawv Npes Xis Las (NXL 3: 3-6, 12-13,16) tias: Tus hwm nws txiv, nws them nws cov txim txhaum. Tus cav txog nws niam lub koob meej, nws zoo li tus neeg sau ib txhab nyiaj. Tus hwm nws txiv, yav tom ntej nws yuav ntsib chaw zoo siab nyob hauv nws cov me nyuam. Thaum nws thov Ntuj, Ntuj yuav mloog nws lus thov. Tus cav txog nws txiv lub koob meej, nws yuav nyob ntev xyoo. Tus ua xis nws niam siab, nws mloog lus. Koj yuav tu koj niam koj txiv yav laus, txhob pub koj niam koj txiv ntsib kev tu siab. Txawm koj txiv lub tswv yim yuav tem toob, koj yuav hlub nws. Txhob thuam koj txiv thaum koj tseem khov kho. Tus me nyuam tsis saib nws niam nws txiv, mas nws saib tsis taus Tswv Ntuj. Tus me nyuam ua rau nws niam tu siab, Ntuj lo lus phem yuav nyob saum nws.

Vaj Qhia hais tias cov laus ntsia tias kev hlub ntws los lawm ces tsis rov qab. Txoj kev hlub cov neeg laus paub thiaj tsuas yog txoj kev hlub yam pub dawb.

Nyob hauv ntawv Npes Xis Las tau qhia kom peb pauj cov neeg dua peb ntej txoj kev hlub peb yog tsum hwm lawv. Lub sam xeeb no yog tseg cia rau cov laus raws li Tswv Ntuj txoj cai hais tias ‘koj yuav hwm koj niam koj txiv.’ Dhau ntawd, kev hwm lwm tus thiab saib xyuas lwm tus lub txiaj ntsim yog neeg lub meej mom muaj qab hau cuag lub sam xeeb.

Vaj Qhia ntuas tias “kev hwm cov laus tsis yog cia rau peb niam peb txiv xwb, tiam sis yog cia rau cov neeg hauv lawv tiam thiab tiam ua ntej thiab.”

Vaj Qhia ntuas ntxiv tias thaum peb ua ib yam twg kom txoj kev hlub tsheej xeeb tuaj yam zoo nkauj mas qhov ntawd yog lub sam xeeb, tab sis thaum twg peb ua kom txoj kev hlub tsheej xeeb tuaj yam tsis zoo saib thiab saib tsis tau lwm tus mas yog peb tab tom tsis hwm tus ntawd lub sam xeeb.

Yog li, thaum peb saib xyuas cov neeg muaj mob, cov lawv pab tus kheej tsis tau mas yuav tau ceev faj tsam peb ua tej yam tsis hwm lawv. Nyob hauv peb lub cuab, yog thaum peb cem thiab muab txim rau ib tug neeg twg, ces yog peb tab tom tsis hwm nws.

Vaj Qhia ntuas cov hluas kom txhob ua ib tug neeg muaj lub tswv yim saib tsis taus cov laus.

Tus twg tsis hwm cov laus ua rau lawv poob tsag, mas yog nws tab tom ua rau tus kheej poob suab npe.

Vaj Qhia nco txog Nos Hes lub neej yav laus, thaum nws hauv cov dej cawv qaub ces nws qaug, nws hle ris tsho pw liab qab hauv lub tsev ntaub. Has los pom mas Has tsis pab npog, nws txawm mus hais qhia rau Xeev thiab Zas Fes. Nkawd thiaj muab tsho los npog nkawd txiv tsis pub kom Nos Hes poob ntsej muag. Zaj no yog ib zaj qhia txog kev hwm cov laus tau zoo kawg.

Vaj Qhia hais ntxiv tias txawm niaj hnub no lub sim ceeb vam meej tuaj, neeg muaj peev xwm nrhiav ntau yam los pab cov laus kom ua neej yooj yim, tab sis txoj kev hlub kev paub hwm cov laus lub sam xeeb tseem nyias li plhaub qe thiab hlob tsis tiav.

Li ntawd, Vaj Qhia thiaj thov kom sawv daws sib pab txhim tsa neeg txoj kev hlub txoj kev hwm cov laus lub sam xeeb kom huam vam ntxiv mus, thiab tsim nyog yuav tau qhia rau cov hluas tau paub txog txoj sia thiab lub neej ib txheej rau ib txheej.

“Kev sib hlub, sib hwm yuav coj qhov kaj tuaj rau cov hluas.”