HUAB TAIS NTUJ HU SAWV DAWS THIAB NIAJ HNUB HU

Hnub Chiv tim 20 lub 9 hlis no Vaj Qhia Fas Ntshis Kus nthuav Huab Tais Yes Xus zaj paj lug tus tswv teb siab zoo raws li Mas Tais Ntawv Moo Zoo rau sawv daws mloog.
Vaj Qhia Fas Ntshis Kus tau hais txog tus tswv teb 2 tug yeeb yam : ‘hu lawv tuaj ua teb’ thiab ‘muab nqe zog rau lawv.’
Vaj Qhia hais tias tus tswv teb uas tawm mus nrhiav cov neeg tuaj ua teb ntawd yog tus sawv Tswv Ntuj chaw los nrhiav sawv daws thiab hu sawv daws los cuag Tswv Ntuj. Tus yeeb yam no yog tus peb tsum yoog raws.
“Tawm mus nrhiav cov neeg, tsis hais lawv yuav nyob rau thaj tsam twg.”
Vaj Qhia hais ntxiv tias qhov no yog qhib kev vam khom kom nthuav deb mus rau cov neeg tsis tau hnov txog Tswv Ntuj, cov qaug zog tias lawv yuav rov tau ua lub neej nyob hauv qhov pom kev nrog Leej Pleev.
Cov ntseeg tsum yoog raws Tswv Ntuj tus piv txwv, tawm mus hu cov neeg tuaj ua num hauv daim teb. Yog cov ntseeg tsis tawm mus mas zoo li cov ntseeg tab tom muaj mob.
Txawm yuav ntsib xwv txheej dab tsi los cov ntseeg tsum tawm mus tshaj lub Moo Zoo zoo dua cov ntseeg kaw tus kheej cia. 
Tus tswv teb tus yeeb yam tim ob yog muab nqe zog rau cov tub num sib txwm tib yam tsis hais tus tuaj puag thaum sawv ntxov los yog tus tuaj thaum yuav tsaus ntuj. 
Peb yuav pom tias Huab Tais Yes Xus tsis tau hais txog tib neeg tus nqe zog raws nws cov hauj lwm, tab sis Huab Tais Yes Xus tab tom hais txog Ntuj Ceeb Tsheej thiab Leej Txiv Tswv Ntuj lub siab zoo.
Huab Tais Ntuj tsis xam lub sij hawm thiab tsis saib tias peb ua tau hauj lwm ntau los zoo npaum cas. Huab Tais Ntuj tsuas saib tias peb puas muaj siab tsob hwb Tswv Ntuj xwb.
Vaj Qhia hais tias peb yuav pom tias Huab Tais Ntuj tus yeeb yam no nyob siab dua kev ncaj ncees thiab yog qhov zeem tseeb txog lub ‘Txiaj Ntsim.’
“Tus neeg yoog nws txoj kev zoo xwb, nws yuav yog tus tom qab. Tus tso siab rau Leej Txiv kev khuv leej, mas nws thiaj yuav yog tus ua ntej.” Vaj Qhia ntuas sawv daws.