HUAB TAIS NTUJ VAM TIAS NWS YUAV TAU TXAIS COV TXIV NTAWM NWS COV TUB ZOG

Ntawv Moo Zoo hauv Lis Piam 27 Caij Nruab Xyoos yog hais txog cov tub zog zov daim teb siab phem. Mas Vaj Qhia tau nthuav rau sawv daws li no :
Mas Tais Ntawv Moo Zoo sau tias : Muaj ib tug tswv teb, nws cog tau ib thaj txiv cawv. Nws ntiav ib co neeg zov, ces nws tawm rooj mus kev deb. 
Thaum yuav txog caij de txiv, nws xa nws cov tub txib mus nqa txiv cawv ntawm cov zov teb. Cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag.
Tus tswv rov xa ib co tub txib coob dua thawj cov mus, cov zov teb kuj ua ib yam li lawv ua rau thawj cov. 
Qhov kawg, nws xa nws tus tub mus cuag lawv, nws xav tias lawv yuav hwm kuv tus tub. 
Tab sis cov zov teb pom dheev tus tub, lawv sib tham tias tus ntawd yog tus yuav txais cuab tam. Tsuag tsuag ! Peb muab nws tua. Lub cuab tam thiaj yuav yog peb tug. (MT21:33-43)
vaj Qhia hais tias daim teb txiv cawv ces yog Huab Tais Ntuj haiv neeg nws xaiv tseg, cov tub txib yog cov Yaj Saub, thiab tus tub ces yog Huab Tais Yes Xus ntag. Lawv muab cov Yaj Saub thiab Leej Tub tua tuag.
Nyob hauv Ntawv Moo Zoo, mas Huab Tais Yes Xus nug sawv daws tias : Thaum tus tswv teb txiv cawv tuaj txog, nws yuav ua dab tsi rau cov zov teb ?
Sawv daws teb tias : Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.
Vaj Qhia hais tias peb yuav pom txog Huab Tais Yes Xus kev tim ntsej nrog cov Txwj Laus vim lawv tsis ua lawv txoj hauj lwm saib xyuas haiv neeg His Xas Lais uas yog Huab Tais Tswv Ntuj cov txiv cawv. Huab Tais Ntuj tos nrhwv saib lawv puas xa cov txiv cawv tuaj rau nws.
Nyob rau zim txwv twg kuj xij, peb pom tias cov thawj coj hauv Tswv Ntuj haiv neeg raug ntxias kom lawv tig mus ua lawv txoj hauj lwm ua ntej lawv yuav ua Huab Tais Ntuj txoj hauj lwm.
Peb tsum ras ntsoov tias daim teb txiv cawv yog Huab Tais Tswv Ntuj daim, tsis yog peb li. Peb tsum nco tias kev tswj haiv neeg yog kev tsob hwb lawv, thiab yog kev tsim txiaj ntsim qab hau rau sawv daws thiab yog kev tshaj lub Moo Zoo.