HUAB TAIS YES XUS TUS SAWV ROV LOS, YOG TUS RHUAV TSHEM PEB TXOJ KEV NTSHAI THIAB TSIS NTSEEG

Nyob hauv Hnub Chiv hwm Tswv Ntuj Khuv Leej, Vaj Qhia Fas Ntshis Kus hais tias Huab Tais Yes Xus tus sawv rov los xav rov los nrog peb nyob thiab nws tos ntsoov peb nrhiav nws, vim tias Huab Tais Yes Xus tos nrhw pab peb yeej txoj kev ntshai thiab kev ntseeg.

Nyob hauv hnub tim 24 lub 4 hlis xyoo 2022 yog Hnub Chiv hwm Tswv Ntuj Khuv Leej, Vaj Qhia Fas Ntshis Kus ua tswv cuab coj tsoom ntseeg plaub vam leej teev Ntuj raws kab ke thov Poj Huab Tais (Regina Coeli) nyob hauv tshav puam Leej Ntshiab Pob Zeb.

Vaj Qhia nthuav Tswv Ntuj Lo Lus raws cov zaj hauv Ntawv Moo Zoo hauv hnub no yog hais txog thaum Huab Tais Yes Xus tawm los rau cov thwj tim pom thawj zaus thiab zaum ob nyob hauv lub tsev kaw qhov rooj ntom nti. Vaj Qhia xav hais txog tus Hauv Paus Xa Lus Tos Mas thiab Huab Tais Yes Xus rau sawv daws coj mus xav.

Ntawv Moo Zoo sau hais tias thaum Huab Tais Yes Xus tawm los zaum ib mas Tos Mas tsis nrog lawv nyob ces nws tsis pom mas nws thiaj tsis ntseeg tias Huab Tais Yes Xus sawv rov los. Yim hnub tom qab thaum Tos Mas nrog lawv nyob ua ke, Huab Tais Yes Xus thiaj rov tawm los rau lawv pom, ces Tos Mas mam ntseeg.

Vaj Qhia nthuav nqe no tias pom tau tias Tos Mas yog tus tam peb sawv daws, peb hais tias tos peb pom tso peb mam ntseeg.

Yog li mas Vaj Qhia thiaj ntuas kom sawv daws txhob txaj muam lees tias sawv daws ua xyem xyav nyob hauv nruab siab txog Tswv Ntuj xws li Tos Mas.

Dua ntawd mas Vaj Qhia hais ntxiv tias zaj lus no qhia kom peb to taub tias Huab Tais Tswv Ntuj tsis nrhiav tus neeg ntseeg zoo txhij tsis ua xyem xyav thiab ntseeg ruaj nreb mus li.

Ntawv Moo Zoo zaj no tsom txog Tos Mas lub teeb meem yog qhia peb kom txhob ntshai teeb meem tuaj nphav peb txoj sia thiab txoj kev ntseeg.

Vaj Qhia hais ntxiv tias yog cov teeb meem zoo tuaj raug rau peb mas peb yuav tsis muab hlob thiab pab kom peb pom tias peb vam txog Tswv Ntuj thiab nrhiav Tswv Ntuj tas mus li, xws li Tos Mas tau kov Huab Tais Yes Xus cov qhov txhab thiab tau paub txog Leej Pleev txoj kev nyiam nws.

“Ua tus neeg ntseeg zoo tsis tas tab sis coj tus yam ntxwv tsis muab hlob ces nws tig nrhiav Huab Tais Yes Xus tas mus li, mas nws zoo dua ua tus neeg ntseeg ruaj nreb tab sis khav theeb ces nws coj tus cuj pwm saib tsis taus lwm tus thiab thuam lwm tus.”  Vaj Qhia ntuas sawv daws.

Vaj Qhia rov nthuav Ntawv Moo Zoo tias tos Huab Tais Yes Xus tawm los rau cov thwj tim pom txog 2 zaug nyob hauv 8 hnub sib law mas vim Huab Tais Yes Xus tsis xav tso lawv pov tseg thaum lawv tab tom khwv tab tom sab vim txoj kev ua xyem xyav thiab qaug zog.

Yog li ntawd, mas txawm tias peb yuav kaw qhov rooj khov kho tuag nti, tsis kav Huab Tais Yes Xus yuav nkag los nrhiav tau peb kom tau daws peb txoj kev ntshai thiab ua xyem xyav, thiab Huab Tais Yes Xus pab kom peb pom nws cov qhov txhab uas yog cov cim tsom txog nws txoj kev nyiam peb.

Peb yuav yeej peb kev khwv thiab teeb meem, los yog txoj kev ua xyem xyav thiab tsis ntseeg xws li Tos Mas tau, mas yog kom peb tso siab tias Huab Tais Yes Xus tus sawv rov los, nws xav los nrog peb nyob, tsuas yog peb nrhiav thiab hu txog, ces Huab Tais Yes Xus yuav pab peb nyob hauv nws txoj kev nyiam thiab khuv leej peb.

“Peb yuav cog lus rau peb tus kheej tias nyob hauv lub caij peb tsis muaj zog nrhiav Huab Tais Yes Xus, mas peb yuav tig rov mus cuag nws, thov nws zam lub txim rau peb nyob hauv nws cov qhov txhab. Peb kawg yuav tsum ua li no, mas peb thiaj yuav hlub tshua thiab nkag siab lwm tus yam tsis muaj chaw xyeej tau.”

Nthuav Ntawv Moo Zoo tas Vaj Qhia thiaj thov niam Mab Liab tus Leej Niam hauv txoj kev Khuv Leej, kom nws koom nrog peb taug txoj kev ntseeg thiab kev nyiam no mus ua ke.