HUAB TAIS YES XUS YOG COV MOV MUAJ TXOJ SIA

Tim 1 lub 8 hli 2021, Vaj Qhia nthuav Ntawv Moo Zoo raws kab ke Tus Tshiab Xa Xov nyob hauv lub tshav puam hwm Leej Ntshiab Pob Zeb, hauv Vas Tis Kas; Vaj Qhia Fas Ntshis Kus ntuas tias neeg tsis kawg nrhiav kev ntshaw sab cev nqaij xwb, neeg tsum nrhiav thiab khaub zig Huab Tais Tswv Ntuj thiab.

Vaj Qhia ras txog cov lus hauv Ntawv Moo Zoo hauv Lis Piam 18 Caij Nyob Nruab Xyoos xyoo no mas yog piav txog tsoom sid raws Huab Tais Yes Xus qab vim lawv pom Huab Tais Yes Xus ua hwj huam kom cov ncuav mov ntsu tuaj txaus yug lawv. Tsoom sid tsis to taub lub ntsiab thiab saib zoo li lawv ntxhov siab txog cov ncuav mov lawv tau noj.

Vaj Qhia pib ntuas tias “Nyob hauv peb txhua tus mas kuj yog peb poob rau ib lub tswv yim zoo li cov neeg raws Huab Tais Yes Xus hauv Ntawv Moo Zoo. Peb nrhiav Huab Tais Yes Xus kom nws ua ywj peb siab thiab nrhiav Huab Tais Yes Xus nyob hauv lub caij peb vam txog nws xwb.”

Vaj Qhia ntuas ntxiv tias “Peb yuav rov nug peb tias ua cas kuv thiaj nrhiav Huab Tais Yes Xus? Yam twg deev kuv lub siab kom kuv nrhiav Huab Tais Yes Xus? Thaum chiv thawj, txoj kev ntseeg ua rau peb nrhiav Huab Tais Yes Xus, tab sis puas yog thaum peb tau raws siab xav lawm, ces peb ho tsis nco qab txog Huab Tais Yes Xus?”

Vaj Qhia hais rau ib tsoom ntseeg tias Huab Tais Tswv Ntuj yeej vam kom peb cev peb kev ntshaw rau nws, tab sis ua ntej tshaj mas peb tsum nkag siab tso tias Huab Tais Tswv Ntuj xav nrog nraim peb nyob hauv txoj kev nyiam, thiab Huab Tais Tswv Ntuj yuav pub rau peb ntau dua qhov peb thov thiab xav tsis txog; qhov ntawd yog txoj kev nyiam.

Ntawv Moo Zoo sau ntxiv tias cov neeg nug Huab Tais Yes Xus tias lawv yuav ua dab tsi thiaj yuav ua tau Tswv Ntuj cov hauj lwm. Huab Tais Yes Xus teb lawv tias Huab Tais Tswv Ntuj txoj hauj lwm yog kom lawv ntseeg txog tus Huab Tais Tswv Ntuj xa tuaj, yog kom ntseeg txog Yes Xus.

Lub ntsiab hauv lo lus no yog ‘txais Huab Tais Yes Xus los nyob hauv peb txoj sia, coj lub neej raws nraim Huab Tais Yes Xus txoj kev nyiam’, vim tsuas muaj Huab Tais Yes Xus tib leeg xwb thiaj yaug peb kev ntseeg kom rov ntshiab huv tuaj thiab txhim kho kev khaub zig nrog Huab Tais Tswv Ntuj tau.

Kawg no Vaj Qhia Fas Ntshis Kus xav ntuas sawv daws tias tsoom ntseeg yuav muab lub tswv yim no los tsim kev sib khaub zig nrog cov nyob ncig lawv. Cov ntseeg yuav ras tias lawv txhob nrhiav nuj nqes nyob hauv lwm tus los yog hauv ib cheeb tsam. Cov ntseeg yuav saib lwm tus ua qhov loj dua saib tus kheej.

“Cov me nyuam sawv daws, nej txais Huab Tais Yes Xus los yug nej txoj sia, thiab nej rov tsim kev sib haum xeeb nrog Huab Tais Tswv Ntuj nyob hauv Huab Tais Yes Xus mog. Cov me nyuam, nej yuav xyaum sib nyiam sib hlub mog.”