HUAB TAIS YES XUS YOG QHOV POM KEV KOM PEB NTSIB TSWV NTUJ KEV NYIAM

Kab ke thov Ntuj hauv Hnub Chiv lis piam 4 Caij Plaub caug no Vaj Qhia Fas Ntshis Kus soj ntsuam txog Huab Tais Yes Xus tus kheej thiab nqua hu cov ntseeg sawv daws qhib siab txais Huab Tais Yes Xus qhov pom kev los tsom kom pom Tswv Ntuj kev nyiam.

 Vaj Qhia rov xav tias ua cas Hnub Chiv hauv Lis Piam 4 Caij Plaub Caug thiaj yog hnub sawv daws xyiv fab.

Vaj Qhia nrhiav tau lo lus teb nws nyob hauv Zam Ntawv Moo Zoo, zaj 3 nqe 16 li no: Vim Tswv Ntuj nyiam lub qab ntuj neeg npaum no, nws thiaj muab nws Leej Twb twm zeej rau, kom xws tus ntseeg txog Leej Tub txhob tuag, tab sis kom nws muaj txoj sia nyob mus li. (Z3:16)

Vaj Qhia hais rau sawv daws tias “Lub Moo Zoo no yog txoj kev ntseeg lub siab uas sawv daws ntseeg. Tswv Ntuj kev nyiam nyob hauv lub txiaj ntsim no; yog nws Leej Tub uas muab los txhiv tib neeg hauv kev txhaum.”

Ntawv Moo Zoo hais txog thaum Nis Kos Des Mos tuaj nrhiav Huab Tais Yes Xus thaum tsaus ntuj thiab nug txog Huab Tais Yes Xus tub kheej tias nws yog leej twg.

Huab Tais Yes Xus qhia rau Nis Kos Des Mos txog 3 yam no: Neeg Leej Tub uas raug tsa siab saum tus Ntoo Cuam, Tswv Ntuj Leej Tub tus nqes los cawm neeg, thiab yog qhov pom kev cais tib neeg zoo thiab phem.

Huab Tais Yes Xus raug tsa nyob saum tus Ntoo Cuam kom cov ntseeg txog nws tau txoj sia nyob mus li xws li Mais Xes tsa tus nab tooj kom cov ntsia tus nab tooj tsis tuag.

Huab Tais Yes Xus yog Tswv Ntuj lub txiaj ntsim cawm neeg thiab Tswv Ntuj vam txog tib neeg txoj kev muaj txoj sia mus li thiab Huab Tais Yes Xus cov hauj lwm yog sawv daws txoj kev dim.

Huab Tais Yes Xus nqes los hauv ntiaj teb neeg yog kom muaj kev xaiv, tus xaiv qhov tsaus ntuj yuav raug txim, hos tus xaiv qhov pom kev yuav tau kev cawm.

Vaj Qhia hais tias kev xaiv yog ib txog kev sawv daws xaiv tau ywj siab. Tus twg ua qhov phem, nws tsis los nyob hauv qhov pom kev. Tus ua qhov tseeb, mas nws los nyob hauv qhov pom kev.

Vim li ntawd, Vaj Qhia thiaj thov nqua hu cov ntseeg kom los ua cov hauj lwm nyob hauv qhov tseeb, nyob hauv Leej Pleev qhov pom kev.

Peb sawv daws raug hu los txais qhov pom kev kom ci ntsa iab hauv peb lub tswv yim, kom peb qhib siab txais Tswv Ntuj kev nyiam, Tswv Ntuj kev khuv leej.