Kawm kom pom thiab tu kom Tswv Ntuj cov hauj lwm loj tuaj

Hnub Chiv lub lis piam 16 caij Nyob Nraub Xyoo, Vaj Qhia ntuas sawv daws kom pom txog thiab qhuas txog qhov zoo Huab Tais Yes Xus tseb rau hauv peb, rau hauv lwm tus, thiab rau hauv lub ntiaj teb.

Tom qab lub Txoos txi Ntuj hnub nco txog cov neeg laus nyob hauv Leej Ntshiab Pob Zeb lub Tuam Tsev Teev Ntuj tas, Vaj Qhia Fas Ntshis Kus tawm tuaj coj sawv daws teev Ntuj raws zaj tus Tshiab xa xov nyob hauv Leej Ntshiab Pob Zeb lub tshav puam.

Raws li Ntawv Moo Zoo hauv hnub no yog Huab Tais Yes Xus zaj paj lug cov nplej thiab cov nroj hais tias tus tswv teb tawm mus tseb cov noob nplej hauv nws daim teb, thaum nws los so lawm mas tus phem tuaj tseb cov noob nroj rau hauv daim teb nplej.

Vaj Qhia muab zaj paj lug no los nthuav rau sawv daws mloog tias Huab Tais Yes Xus muab lub ntiaj teb no piv rau daim teb dav uas Tswv Ntuj tseb cov noob nplej rau thiab dab phem kuj tuaj tseb cov noob nroj xyaw, qhov zoo thiab phem thiaj loj hlob tuaj ua ke hauv daim teb ntawd. Vaj Qhia hais tias muaj ntau zaus muaj tej tus neeg tuaj ntxias peb tias yog peb xav kom daim teb txhob muaj nroj xyaw, mas peb yuav tau rho cov nroj pov tseg, yog peb xav kom lub ntiaj teb no zoo txhij, mas peb tsum cais tus neeg phem tawm mus, tiam sis qhov ntawd yog ib yam pheej hmoo, tsam peb rho tau tus neeg zoo pov tseg.

Vaj Qhia ntuas tias ua cas peb tsis tig los ntsia daim teb hauv peb nruab siab nruab plawv, vim peb muaj peev xwm tu tau peb lub siab kom rov huv tau tuaj. Qhov no yog qhov peb yuav ua tau, tsis cuam tshuam nrog lwm tus.

Nyob hauv peb lub siab lub plawv muaj cov noob nroj thiab noob nplej nyob ua ke, yog daim teb twj lij, yog daim teb qib lug thiab tsis ruaj yuav nthuav mus nyob hauv ntiaj teb daim teb thiab yog daim teb yuav tsum saib xyuas tsis tu ncua kom kev zoo tus yub loj taus.

Peb yuav tau muab peb lub siab paub qhov zoo thiab phem los soj ntsuam Tswv Ntuj qhov pom kev uas tau tshwm sim nyob hauv daim teb hauv peb nruab nplawv.

Vaj Qhia kuj hais txog ib daim teb, yog tus nyob ncig peb daim teb tias peb nyiam ntsia txog cov nroj nyob hauv lawv daim teb ntau dua ntsia cov noob nplej tab tom tuaj ua yub nyob hauv lawv, tsim nyog peb yuav pab kom cov nplej tuaj taus nyob hauv lawv daim teb.

Vaj Qhia rov ntuas cov neeg ntseeg txog Yes Xus kom tsum tau ua li hais, vim Tswv Ntuj yog tus tswv teb, nws xav pom qhov zoo txi txiv nyob hauv nws daim teb, thiab xav kom lub caij sau qoob yog ib rooj qav lom zem.

Vaj Qhia cov lus hnub no mas yog xav kom sawv daws rov tig los soj ntsuam yus tus kheej thiab ntsia kom pom tus tuaj ntxias kom yus tsis pom txog lwm tus qhov zoo, ces yus cia li maj txiav txim rau nws. Peb tsum xub rho cov yub nroj hauv peb tawm pov tseg tso.

Vaj Qhia cev lus rau niam Mab Liab kom nws pab peb saib xyuas yam Huab Tais Yes Xus tseb rau hauv peb siab tias “Niam Mab Liab, koj pab peb tu lub noob nplej Huab Tais Yes Xus tseb rau hauv peb daim teb kom loj tuaj thiab mog.”