KEV COJ TSIS NCAJ RHUAV KOOM TXOOS KEV SIB HAUM XEEB

Vaj Qhia Fas Ntshis Kus cov lus hauv Hnub Plaub, hauv Lis Piam 21 Caij Nyob Nruab Xyoos mas Vaj Qhia hais txog kev coj tsis ncaj yog tus yeeb ncuab rhuav Koom Txoos kev sib haum xeeb.

Hnub tim 25 lub 8 hli no, Vaj Qhia rov nthuav Paj Lug tsab ntawv sau rau cov ntseeg hauv Nkas Las Tias dua, qhov Vaj Qhia xav hais txog cov teeb meem tshwm tuaj thaum neeg coj txoj cai nruj dhau.

Vaj Qhia pib piav txog thaum Leej Ntshiab Paj Lug tab meeg tiv Leej Ntshiab Pob Zeb vim Leej Ntshiab Pob Zeb coj tsis ncaj; nyob ntawm cov pej kum neeg nws ua ib yam, nyob ntawm cov txais cim txiav mas nws ua dua ib yam.

Leej Ntshiab Pob Zeb nrog cov pej kum neeg hloov siab tshiab noj mov ua ke, nws tsis ua raws cov Yus Das txoj cai txwv tsis pub koom nrooj nrog lwm haiv neeg.

Tab sis thaum cov txais cim txiav tuaj txog, mas Leej Ntshiab Pob Zeb ho tsis kam nrog cov pej kum neeg noj mov ua ke, vim nws ntshai tsam cov txais cim txiav hais lus tsis zoo txog tej xwm ntawd. Leej Ntshiab Pob Zeb tus yeeb yam no ua rau cov ntseeg nkag siab yuam kev tias lawv yuav tsum yoog raws li Mais Xes Txoj Cai. (NLT 2: 11-14)

Leej Ntshiab Paj Lug pom tias tej no yog qhov yuam kev loj kawg, vim tus Hauv Paus Xa Lus Pob Zeb coj tsis ncaj mas yuav ua rau muaj kev sib tawg hauv lub Koom Txoos.

Vaj Qhia hais tias kev ‘coj tsis ncaj’ li no kuj yog vim ‘ntshai qhov tseeb’, mas lawv thiaj ‘txhob txwm ua tias lawv zoo dua lwm tus’.

Vaj Qhia hais ntxiv tias kev coj tsis ncaj ua tes nkaus li no, mas muaj ntau muaj coob nyob hauv neeg cov hauj lwm raws txheej txheem.

Txawm li ntawd, los peb pom tias nyob huav Ntawv Ntshiab tau muaj tej tug txiv neej thiab poj niam siab ntshiab tsis yeem ua tej yam tsis ncaj rau yus; xws li Es Les As Ntxas tuaj yeem tuag, zoo dua cia nws noj cov nqaij txi rau dab, raws sau tseg hauv ntawv Mas Kas Npes, phau 2 (2MKN  6: 18-31)

Nyob hauv Ntawv Cog Lus Tshiab, peb pom tias muaj ntau zaus Huab Tais Yes Xus cem cov neeg coj tsis ncaj; zoo nraum daim tawv, tiag mas hauv luab siab lwj ua kas nthi. (MT 23: 13)

Vaj Qhia hais tias ‘tus neeg coj tsis ncaj’ yog tus neeg ua txuj ua neeg zoo, ntxias neeg, thiab dag luag vim nws muab tawv dev los looj nws lub ntsej muag cia, nws tsis muaj cuab kav tim ntsej txog qhov tseeb.

Cov neeg zoo li no, lawv tsis muaj kev nyiam tiag.

Peb pom cov neeg coj tsis ncaj ntau tus nyob hauv peb tej chaw ua hauj lwm, hauv cov neeg tswj teb kav chaw, thiab hauv lwm thaj tsam. Tiam sis tsis muaj tus neeg coj tsis ncaj twg yuav txaus qhias npaum tus neeg coj tsis ncaj hauv lub Koom Txoos.

Li ntawd, Vaj Qhia Fas Ntshis Kus thiaj ras txog Huab Tais Yes Xus lo lus qhia tias “Nej yuav hais li no: Muaj, ces hais tias ‘muaj’; tsis muaj, ces hais tais ‘tsis muaj’. Cov lus hais tshaj, yog tuaj ntawm tus phem tuaj.” (MT 5: 37)

“Qhov tshaj ntawd, yog qhov phom sij rau Koom Txoos kev sib haum xeeb, Koom Txoos kev thooj siab koom ntsws uas peb tus Tswv Ntuj thov rau peb.”