KEV NTSEEG NTUJ YOG KEV KHAUB ZIG, KEV MUAB SIAB RAU THIAB KEV XYIV FAB

Lis Piam 3 Caij Hla, Vaj Qhia Fas Ntshis Kus ntuas tias kev ua ib tug neeg ntseeg Tswv Ntuj tsis yog kawm kev ntseeg los yog paub txog kev ua neeg tsim txiaj xwb, tiam sis yog txoj sia khaub zig Tswv Ntuj.

Nyob hauv Hnub Chiv tim 18 lub 4 hlis 2021 no, Vaj Qhia rov tawm tuaj rau cov ntseeg hauv lub tshav puam hwm Leej Ntshiab Pob Zeb pom nyob hauv kab ke thov Ntuj zaj Poj Huab Tais.

Hnub no Vaj Qhia ras txog cov lus hauv Lus Kas Ntawv Moo Zoo (LK24:36-43) yog cov lus sau tias Huab Tais Yes Xus tawm tuaj rau cov thwj tim pom thiab hais rau lawv tias: “Nej nyob kaj lug.”

Thaum ntawd, cov thwj tim ntshai thiab lawv xav tias lawv pom dab. Huab Tais Yes Xus thiaj muab nws cov qhov txhab rau lawv saib thiab hais rau lawv tias: “Nej ntsia kuv ob txhais tes thiab ob txhais taw, yog kuv: nej xuas kuv saib”, thiab Huab Tais Yes Xus kom lawv muab mov rau nws noj. Yes Xus noj yav ntses nyob ntawm lawv xub ntiag.

Vaj Qhia nthuav cov lus hauv Ntawv Moo Zoo tias qhia txog 3 yam: ntsia, kov, thiab noj.

Peb yam no tsom txog peb sawv daws tus kheej thiab peb npoj neeg thiab tshab txhais txog yam peb ua kom peb muaj kev xyiv fab tau thaum peb ntsib Huab Tais Yes Xus.

Huab Tais Yes Xus lo lus ‘Nej ntsia kuv ob txhais tes thiab ob txhais taw’, qhia peb tias tsis yog kom peb ntsia pom xwb, tseem ceeb tshaj yog peb muab siab rau peb lub tswv yim.

Vaj Qhia nthuav txog kev muab siab rau peb lub tswv yim no tias yog laj thawj ntawm kev hlub: niam txiv muab siab ntsia nkawd cov me nyuam, txij nkawm sib ntsia ntsej muag, kws kho mob muab siab tu tus neeg mob. Li ntawd, ‘kev ntsia’ thiaj yog kauj nruam tim ib hauv kev tawm tsam kev sib cais, kev haub ntxias kom tsis kub siab txog lwm tus.

‘Kov’ yog kev hlub tus yam ntxwv, kev hlub hu kev sib ze, hu kev sib txuas, thiab hu kev sib faib txoj sia. Vim kev hlub mas Huab Tais Yes Xus thiaj hais kom cov thwj tim los kov nws kom lawv paub tias nws tsis yog ib tug dab los ib tug sw. Vaj Qhia ntuas tias “Huab Tais Yes Xus tab tom qhia peb tias kev sib khaub zig nrog Tswv Ntuj, nrog peb cov nkauj muam kwv tij tsis yog yuav xaus rau qhov nyob deb ntsia xwb, tiam sis yog kom peb nyob sib ze, kov tau, chwv tau, nphav tau.”

Yog peb nco tau zaj tus Xas Mas Lias siab zoo, peb yuav pom tias tus neeg Xas Mas Lias tsis yog nyob deb ntsia saib tus neeg ntawd tuag los ciaj, nws khoov cev mus kov mus pab coj tus neeg raug tub sab ntaus ntawd mus kho.

Kev nyiam kev hlub Huab Tais Yes Xus los kuj zoo xws li ntawd thiab, yog nkag mus nrhiav thiab kov Huab Tais Yes Xus.

Lo lus tim peb yog lo tias ‘Noj’, yog lo lus qhia txog kev ua neej nyob, tib neeg yuav tsum noj mov yug lub cev kom muaj txoj sia nyob.

Thaum twg peb sib sau noj ib pluas mov los ib rooj qav mas yog peb tab tom muab kev hlub rau lawv, peb tab tom koom nrog lawv, thiab peb tab tom nyob hauv ib lub hmoov lom zem.

Yog li Ntawv Moo Zoo hauv hnub no hais dab tsi rau peb? Vaj Qhia teb tias Ntawv Moo Zoo hais rau peb tias Huab Tais Yes Xus tsis yog ib tug ntsuj plig, tiam sis Huab Tais Yes Xus yog ib tus neeg muaj txoj sia. Li ntawd, kev ua neeg ntseeg thiaj tsis yog paub txog txoj kev ntseeg los paub tias yuav ua neeg tsim txiaj li cas, kev ua neeg ntseeg yog muab txoj sia lo khaub zig Huab Tais Yes Xus, tus yeej kev tuag: peb ntsia Huab Tais Yes Xus, peb kov Huab tais Yes Xus, peb tau kev yug siav nyob hauv Huab Tais Yes Xus, ces peb yuav hloov txoj kev nyiam kev hlub no mus ua rau cov neeg nyob ib ncig peb.