KEV NYIAM KEV HLUB TIAG

Nyob hauv hnub Huab Tais Yes Xus mus saum Ntuj, Vaj Qhia ntuas cov neeg ntseeg sawv daws txog Huab Tais Yes Xus kev nyiam peb txawm tias nws yuav nce mus nrog Leej Txiv nyob lawm.

Cov lus nyob hauv Lus Kas Ntawv Moo Zoo (LK 24: 46-53) piav txog thaum Huab Tais Yes Xus tawm los rau cov thwj tim pom yog zaum kawg. Huab Tais Yes Xus tau ua 2 yam ua ntej nws yuav mus saum Ntuj: nws yuav xa Leej Ntuj Plig lub paj tshab los, thiab nws foom lus zoo rau lawv.

Vaj Qhia nthuav tias thaum Huab Tais Yes Xus nce mus saum Ntuj lawm, nws tsis tso ntiaj teb neeg pov tseg, nws cog lus rau sawv daws tias nws yuav xa Leej Ntuj Plig Ntshiab nqes los; Leej Ntuj Plig Ntshiab yuav coj lawv kev, qhia lawv, pab lawv ua cov hauj lwm tshaj lub Moo Zoo, thiab thaiv lawv nyob hauv kev tawm tsam sab ntsuj plig.

Vaj Qhia thiaj hais tias “Peb pom txog Huab Tais Yes Xus kev nyiam peb, txawm nws nqes los nyob hauv peb tiam sis nws tsis txwv peb kev twj lij, nws pub ib chav rau peb, vim tias kev sib nyiam sib hlub tiag yog kev nyob sib ze tsis sib cais, yog kom peb ua tus tam txoj kev sib nyiam sib hlub.”

Vim Huab Tais Yes Xus mus saum Ntuj, mas Huab Tais Yes Xus thiaj nyob txawm hauv sawv daws nyob hauv Leej Ntuj Plig Ntshiab. Leej Ntuj Plig Ntshiab coj Huab Tais Yes Xus tuaj nyob hauv peb, kom peb tau ua pov thawj txog Huab Tais Yes Xus rau tas lub qab ntuj.

Ua ntej yuav nce mus cuab Leej Txiv, Huab Tais Yes Xus foom lus nyob kaj lug rau cov thwj tim. Vaj Qhia hais tias yam no yog cov Leej Choj tus yeeb yam.

“Ntawv Moo Zoo tab tom hais rau peb paub tias Huab Tais Yes Xus yog tus tuam Leej Choj nyob hauv peb txoj sia. Huab Tais Yes Xus mus cuag Leej Txiv kom tau sawv peb chaw cev lus rau Leej Txiv, cev peb kev ua neeg rau Leej Txiv.”

Dua ntawd, Huab Tais Yes Xus mus saum Ntuj yog nws mus npaj chaw rau peb. Yog li peb thiaj yuav zoo siab ua pov thawj txog lub Moo Zoo thiab nyiam lwm tus xws li Huab Tais Yes Xus nyiam peb.

Vaj Qhia ntuas tias “Xav kom peb rov tig los nug peb tias peb puas tau ua pov thawj txog lub Moo Zoo, thiab yog peb nyiam lwm tus, mas peb puas kam pub kev twj lij rau lawv thiab pub ib chav cia rau lawv.”

Ua ntej yuav xaus cov lus, Vaj Qhia hais kom sawv daws sib pab thov Ntuj pub rau lwm tus thiab kom sawv daws saib kev ua tub txib tsob hwb lwm tus tseem ceeb dua yus txoj kev ntshaw nrhiav qhov zoo rov rau yus.

“Thov kom peb loj hlob nyob hauv kev thov Ntuj ua ke; peb thov Ntuj rau lub ntiaj teb kom muaj kev vam khom, kom lub ntiaj teb nyob thaj yeeb. Peb yuav ntsia cov neeg peb pom thiab hais lus foom kev nyob kaj lug rau lawv nyob hauv txhua hnub.”