KEV PHOOJ YWG NTAWM NTAU PHAUM NEEG YOG YAM TSEEM CEEB

Vaj Qhia pib qhia Ntuj kev cai zaj tshiab yog hais txog cov laus neeg, ntu no yog ntu 2 mas Vaj Qhia hais tias txoj sia ntev yog ‘tus qauv thiab cib fim.’

Vaj Qhia hais tias nyob hauv Ntawv Ntshiab Cog Lus Qub yuav pom tias cov neeg muaj txoj sia ntev tshaj puas xyoo tom qab lawv muaj me nyuam, yam no yog tus qauv muaj lub ntsiab tob.

Nyob hauv neeg lub hauv paus chiv keeb huam yuaj mas neeg rhawv qeeb thiab ntev, neeg xav tau lub sij hawm ntev txaus los txhais tej xwm neeg tau ntsib tau nphav thiab tawm tsam neeg txoj sia. Tib lub caij ntawd, neeg sab ntsuj plig maj mam loj hlob kom neeg paub txog yam tsim nyog ua.

Nyob hauv txhua tiam neeg thaum neeg ntsib ib yam xwm tshiab tshiab cuam tshuam nrog neeg txoj sia mas neeg muaj lo lus nug txog neeg txoj sia tias yog dab tsi. Nyob hauv tiam neeg no, neeg tsuas pom ib laim muag, paub saum daim tawv xwb. Yog li cov laus neeg thiaj muaj peev xwm pab kom cov hluas tau chwv tau ntsib txoj sia maj mam ua neej nyob yam xwm yeem, thiab yog tias muaj kev sib cais ntawm phaum neeg mas cov neeg phaum hluas yuav tsis tau pom cov laus txoj sia ua neej maj mam xwm yeem li no.

Yog vim li no mas tsaib no Vaj Qhia thiaj tau tsa kom muaj hnub nco txog cov neeg laus nyob rau txhua xyoo hauv Hnub Chiv lub lis piam 4 lub 7 hli. Lub caij ntawd yog ze rau hnub hwm Leej Ntshiab As Nas thiab Leej Ntshiab Yos As Kis uas yog Huab Tais Yes Xus niam tais thiab yawm txiv.

Vaj Qhia hais ntxiv tias nws ua zog toog pom ib lub zos uas muaj ntau phaum neeg nyob ua ke, xws li cov me nyuam yaus, cov hluas thiab cov laus. Ntau phaum neeg nyob sib xyaw ua ke li no yuav txia ua lub zog qhov chaw rau tib neeg ntsia pom thiab muaj sia nyob ntxiv mus.

Txawm li ntawd los, neeg tiam no poob rau hauv kev sib huas sij hawm ua neej, ces neeg tiam no tsis tshuav sij hawm rau cov laus thiab cov me nyuam yaus. Vaj Qhia thiaj ntuas tias lub neej sib huas caij li no ua rau neeg txoj sia raug ‘zom kom qaug zog’ tsis yog pab kom txoj sia ‘nruj muaj zog tuaj’.

Vaj Qhia hais ntxiv tias kev sib kis mob zaum no tau pab kom neeg ua neej qeeb zog tuaj. Cov phaum neeg laus tau pab cov hluas kom txhob tuag siav. Kev sib txheeb ze ntawm cov hluas thiab cov laus rov ruaj khov dua tuaj, pab kom neeg muaj kev vam khom tias lawv yuav tsis ua neej yam tsis muaj qab hau ntxiv. Pab txhim kho neeg txoj kev sib nyiam, cov laus lub neej pab kom nkag siab txog neeg txoj sia.

Tej yam li tau hais los no pab kom peb ntsia pom Tswv Ntuj hau kev npaj tseg rau tib neeg: txiv neej thiab poj niam yog Tswv Ntuj tsim los kom zoo li Tswv Ntuj tus duab, thiab tau kev cawm nyob hauv Leej Pleev, thiab qhov kawg neeg rov tau mus koom ua ib tug nyob hauv Tswv Ntuj mus tas ib txhis.

Niaj hnub no, txoj sia ntev yog lub cib fim pub kom neeg muaj sij hawm tsim kev txheeb ze nrog lwm phaum neeg, thiab puag qhov muaj txiaj ntsim hauv neeg txoj sia cia.

Cov lus xaus hauv ntu no yog Vaj Qhia thov Leej Ntuj Plig Ntshiab pub ‘laj lim tswv yim thiab lub zog’ rau sawv daws kom sawv daws muaj peev xwm hloov ‘kev muab hlob’ ua ‘qhov zoo nkauj hauv lub neej’.

“Yuav tsum yog cov phooj ywm ntau phaum neeg sib koom tes ua ke mas thiaj yuav ntxeev hloov tau.” Vaj Qhia xaus.