KEV TEEV NTUJ YOG KUAB TSHUAJ NTSEEG THIAB PAB KHO NEEG NTSUJ PLIG

Ua ntej yuav teev Ntuj raws zaj Ntuj tus Tshiab xa xov nyob hauv Hnub Chiv tim 16 lub 10 hli 2022, Vaj Qhia Fas Ntshis Kus tau ntuas sawv daws kom muab siab dai duam rau yam tseem ceeb tshaj plaws hauv lub neej, yam ntawd mas yog ‘nyiam Tswv Ntuj thiab cov nyob puag ncig, thiab teev Ntuj tsis tseg kom peb txoj kev ntseeg muaj zog.’

Vaj Qhia Fas Ntshis Kus twm txog lub Moo Zoo hauv Hnub Chiv lub lis piam 29 caij Nyob Nruab Xyoo, yog cov lus nyob hauv Lus Kas Ntawv Moo Zoo (LK 18: 1-8) mas Vaj Qhia nco txog Huab Tais Yes Xus lo lus nug tias ‘Thaum Leej Neeg Tus Tub rov los, nws puas yuav pom neeg ntseeg nyob ntiaj teb?’, ces Vaj Qhia hais tias hnub no peb yuav muab Huab Tais Yes Xus lo lus no rov coj los nug peb.

Txoj hmoov tsis zoo ua rau hnub no Huab Tais Yes Xus pom kev sib ntaus rog, kev txom nyem, thiab kev muaj vaj huam tsis sib luag, txawm li ntawd, los tseem pom tias ntiaj teb neeg muaj kev huaj txhaij nrog rau neeg lub neej huas caij thiab ntxhov quav niab. Tiam sis yam tseem ceeb tshaj tej hais los no, mas yog Huab Tais Yes Xus puas yuav pom cov neeg saib Tswv Ntuj ua lub plawv nyob hauv lawv txoj sia.

Yog vim li hais mas Vaj Qhia Fas Ntshis Kus thiaj ntxiv tswv yim tias yuav yog yam zoo heev yog tias peb tshuaj ntsuam peb txoj sia, saib yam twg nyob hauv peb nruab siab thiab peb saib yam twg yog yam tseem ceeb. Puas yuav yog tias peb tsis nco faj ces peb tau ua lub nras thiab peb ntsaub hauv tej yam tsis muaj qab hau, ces peb tsis nco txog Tswv Ntuj lawm?

“Hnub no, Huab Tais Yes Xus taw kev rau peb kom peb txoj kev ntseeg rov cig dua tuaj. Yam ntawd mas yog ‘TEEV NTU’, vim tias kev teev Ntuj yog kuab tshuaj cawm neeg txoj kev ntseeg thiab pab kho neeg tus ntsuj plig.” Vaj Qhia ntuas sawv daws.

Yog peb xav txuag peb kev ntseeg kom txhob kug thiab muaj zog, mas peb yuav tsum teev Ntuj tsis tseg. Vaj Qhia nthuav ntxiv tias kev teev Ntuj piv li tus yawm sij qhib lub qhov rooj kaw peb tus ntsuj plig cia kom tau tawm los pom hnub pom hli, pom kev kaj kev ci, ces peb tus ntsuj plig thiaj yuav nyob tau kaj siab.

Xws li cov xyoob ntoo peb cog cia hauv tej twj taig nyob hauv peb lub tsev, peb yuav tau ywg dej mas thiaj yuav tsis ntsws tsis tuag tshav, peb tus ntsuj tus plig ces yeej yuav zoo li ntawd, yuav vam txog peb lus teev Ntuj los yug mas thiaj yuav tsis tuag.

Vaj Qhia Fas Ntshis Kus hais ua piv txwv ntxiv tias muaj qee lub caij peb yuav tsum noj tshuaj xwm yeem mas peb lub cev kev mob thiaj yuav ntaug yuav zoo. Yog li mas nyob hauv txoj kev ntseeg, peb sawv daws kuj yuav vam ntsoov txog lo lus teev Ntuj nyob hauv txhua txhia hnub thiab, vim tias thaum peb teev Ntuj mas yog peb tab tom fij lub sij hawm cia rau Tswv Ntuj, cia Tswv Ntuj tau los nrog peb nyob; thaum peb qhib siab rau Tswv Ntuj ces Tswv Ntuj yuav hliv nws kev nyiam, kev kaj siab, kev xyiv fab, lub zog, kev vam khom los rau hauv peb xws li cov dej ntws los ywg peb txoj kev ntseeg.

Muaj coob leej hais tias kuv yuav nrhiav lub sij hawm twg los teev Ntuj tau vim tias niaj hnub no kuv ua neej nyob huas caij huas nyoog xwb mas kuv thiaj yuav nrhiav tau txaus noj.

Vaj Qhia hais tias nws nkag siab zoo txog neeg lub neej tiam no, tab sis peb ua neej nyob mas tsis yog tias peb tsum nrhiav ib qhov chaw ib lub caij zoo, peb thiaj yuav tau kev teev Ntuj.

Txhua hnub txawm peb nyob qhov twg los yog ua hauj lwm dab tsi, peb yuav hais lo lus teev Ntuj luv luv thiab yooj yim los cav txog Tswv Ntuj ces thaum ntawd yog lub caij peb tau nyob ze Tswv Ntuj thiab tau txais kev kaj siab lawm.

Vaj Qhia hais ua piv txwv zoo li no tias “Thaum peb sawv tsees, peb yuav hais tias ‘Huab Tais, kuv ua koj tsaug thiab kuv thov cev hnub no cia rau koj’, los thaum peb yuav pib ua txoj hauj lwm peb yuav hais tias ‘Leej Ntuj Plig Ntshiab, koj los mas’, los yog thaum peb tab tom ua hauj lwm peb yuav hais tias ‘Huab Tais Yes Xus, kuv tso siab rau koj thiab kuv nyiam koj’.”

Vaj Qhia ntuas tias peb cov lus teev Ntuj luv thiab yooj yim li no mas zoo xws li yog lo lus luv luv peb niaj hnub xa mus rau peb tus hlub, thiab thaum peb niaj hnub hais li no mas peb lub siab yuav txuas nrog Tswv Ntuj lub.

Tiam sis tsis yog peb niaj hnub xa lus mus xwb, peb tsum nyeem saib Tswv Ntuj teb li cas rau peb, Tswv Ntuj hais dab tsi rov los. Tswv Ntuj lo lus teb thiab hais rau peb mas peb nrhiav tau nyob hauv Ntawv Moo Zoo uas peb yuav niaj hnub nqa nrog peb thiab nthuav los nyeem, ces Tswv Ntuj lo lus yuav nyob hauv peb.

Kwv tij Hmoob sawv daws, ua ntej yuav xaus lus mas Vaj Qhia Fas Ntshis Kus tau thov niam Mab Liab pab peb kom txawj teev Ntuj tias “Thov niam Mab Liab tus muaj siab ncaj mloog nraim Tswv Ntuj lus, thov koj qhia peb kom peb txawj teev Ntuj tsis tseg thiab txhob ntaus siab me rau txoj kev teev Ntuj mog.”