KEV TEEV NTUJ YOG LUB TEEB COJ PEB TXOJ SIA

Nyob hauv Vaj Qhia lub luag hauj lwm ntuas tsoom ntseeg hauv Hnub Plaub hauv lis piam no, Vaj Qhia muab lo lus no los hais ntuas sawv daws : Huab Tais Yes Xus tus yam ntxwv qhia kom peb pom txog kev teev Ntuj nyob hauv txoj kev ntsiag, thiab ntuas kom cov ntseeg sawv daws thov Ntuj rau cov ntsib xwv txheej kab mob Covid-19 thiab thov Ntuj rau cov kws kho mob.

Lub lis piam no, tseem hwv rov siv tsab cai kaw tsis pub tsoom pej xeem sib txoos ua ke vim kev sib kis hauv tus kab mob Covid-19, ces Vaj Qhia thiaj rov ntuas sawv daws hauv kab sab online dhua. Vaj Qhia hais tias nov yog ib yam txaus tu siab kawg nkaus. Li ntawd los Vaj Qhia hais tias kev paub hwm thiab ua raws txoj cai mas yeej yog lawm.

“Txiv xav kom peb sawv daws nyob sib nrug li txoj cai hais, vim yog ib qho muaj txiaj ntsim qab hau rau lwm tus. Tsis tas li, Txiv xav kom peb muab lub sij hawm no los nco txog cov neeg mob, cov kws kho mob, cov muaj siab dawb huv pab lwm tus, thiab ntau leej ua kub siab ua txoj hauj lwm pab cov neeg raug tus kab mob no. Lawv nyiam lawv txoj hauj lwm thiab nyiam tus nyob ze lawv, li ntawd thov kom peb sawv daws sib pab thov Ntuj rau lawv mog.”

Vaj Qhia hais li tas mas thiaj pib cov lus qhia txog Huab Tais Yes Xus tus piv txwv teev Ntuj li no : Huab Tais Yes Xus cov lus teev Ntuj yog ib yam tseeb uas peb lub tswv yim ntsuas tsis tau, peb tsuas paub qee yam xwb, tab sis qhov peb paub ntawd kuj tau qhia peb txog Huab Tais Yes Xus li dej num tag nrho.

Huab Tais Yes Xus kub siab rau txoj kev khaub zig Leej Txiv Tswv Ntuj, hauv kev nyiam uas txhua tus plig vam txog.

Mas Kos ntawv Moo Zoo, zaj 1 qib 32 ntxiv rau qib 34 txog 38 (MK1:32,34-39) sau tias : Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. Yes Xus kho neeg coob coob, cov uas nyias raug nyias hom mob, thiab nws tseem ntiab ntau tus dab tawm. Nws tsis pub dab hais lus li, vim cov dab paub nws.

Thaum sawv ntxov, thaum tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. Xis Moos thiab nws cov npawg raws Yes Xus qab. Thaum lawv nrhiav tau Yes Xus, lawv hais rau nws tias : "Sawv daws nrhiav koj."

Yes Xus hais rau lawv tias : "Peb mus lwm qhov chaw, hauv cov zej zog nyob tsis deb ntawm no, kom kuv tau kev tshaj lus nyob ntawd thiab, yog vim li ntawd, kuv thiaj tawm tuaj".

Vaj Qhia muab sob lus no los piav tias “Kev teev Ntuj yog lub teeb coj Huab Tais Yes Xus kev. Huab Tais Yes Xus cia Tswv Ntuj ua tus coj nws kev, tsis yog cia nws lub tswv yim xav thiab lwm tus li lus qhua ua tus coj.”

Vaj Qhia hais ntxiv tias “Txiv tau 4 lo lus qhia nyob hauv zaj nyeem no. Lo lus tim ib, Huab Tais Yes Xus qhia peb tias kev teev Ntuj tsum yog thawj yam peb ntshaw nyob hauv txhua hnub. Yog peb coj lub neeg tsis nyiam teev Ntuj mas tej zaug peb ntsib tej yam ntxhov siab, ces peb tsis paub yuav ua li cas. Txawm li ntawd los Huab Tais Yes Xus qhia peb kom mloog Tswv Ntuj li lus coj peb nyob hauv kev teev Ntuj, ces peb yuav pom hau kev dim hauv kev ntxhov siab no.

Lo lus tim ob, Huab Tais Yes Xus qhia peb tias kev teev Ntuj yog ib yam peb tsum xyaum vim kev teev Ntuj raws li Huab Tais Yes Xus tus piv txwv mas yog tsum teev Ntuj txhua hnub tas mus li. Kev nquag teev Ntuj tas txwv mas ua rau peb khov kho thaum ntsib kev txom nyem, vim peb tau Ntuj txiaj ntsim los cawm peb thiab pov hwm peb.

Lo lus tim peb, Huab Tais Yes Xus qhia peb tias kev teev Ntuj tsis yog kom peb txiav tus kheej tawm hauv lwm tus, tiam sis yog kom peb nyob rau tej qho xu kev ntsiag to, mas peb thiaj yuav hnov Tswv Ntuj Lo Lus hais rau peb.

Lo lus kawg hauv zaj no yog Huab Tais Yes Xus qhia peb tias txhua yam yog los ntawm Tswv Ntuj los thiab rov mus cuag Tswv Ntuj.

Thaum peb teev Ntuj mas yuav pab kom peb pom txog kev khaub zig Tswv Ntuj, peb Leej Txiv thiab tus tsim txhua yam.”

Kawg no, Vaj Qhia thiaj xaus cov ntsiab lus hauv hnub no tias yog peb teev Ntuj li Huab Tais Yes Xus ua piv txwv rau peb ces peb yuav ntsib kev thaj yeeb thiab xyiv fab nyob hauv peb txoj sia.