KEV UA KWV TIJ YOG YAM TWV NTIAJ TEB NEEG

Hnub tim 10 lub 3 hlis 2021, Vaj Qhia rov xav txog kev tawm rooj mus tsham cov ntseeg hauv Is Lav teb hauv tim 5-8 hauv lis piam tas los. Vaj Qhia hais tias “Huab Tais Tswv Ntuj pub kuv mus tsham Is Lav teb raws li Leej Ntshiab Zam Paj Lug Ob txoj kab xwm. Txij thaum hauv paus los, tsis tau muaj ib tug Vaj Qhia tuaj tsham Has Nplas Has teb chaws li. Xav tias zaum no yuav yog ib lub cim hauv kev vam khom hauv tsov rog ntau xyoo los no thiab hauv xwv txheej kab mob sib kis hnyav hauv zim txwv no.”

Vaj Qhia hais tias cov txiaj ntsig nyob thawm hauv nws tus ntsuj plig: yog Tswv Ntuj li txiaj ntsig, thiab cov neeg sib pab khiav lub luag hauj lwm zaum no- tsis hais tus txoov tim txwv thiab cov tseem hwv Is Lav, cov Tswv Qhia thiab cov Leej Choj sawv daws, tag nrho cov tiam lis thiab cov ntseeg hauv Is Lav teb tib si.

“Kuv tu siab uas kuv tsis muaj cuab kav mus nyob ze cov neeg raug tsim txom hauv thaj chaw ntawd tau, lawv kev txom nyem yog tus Ntoo Cuam loj uas lawv ris los tau ntev xyoo.”

Vaj Qhia hais tias nws yim mob siab thaum nws mus pom tej yam puas ntsoog ciaj khaub vim tsov rog thiab thaum nws tau mloog cov neeg dim tawm los piav txog lawv txoj kev txom nyem.

Txawm li ntawd los, Vaj Qhia kuj txawm pom tias lawv xyiv fab txais Leej Pleev lub Moo Zoo thiab nthuav siab txais kev thaj yeeb nyab xeeb.

“Haiv neeg Is Lav muaj cai nrhiav lawv kev thaj yeeb, lawv muaj cai nrhiav lawv lub meej mom rov los rau lawv ntoo.” Vaj Qhia seev tias. “Thaj chaw no yog hauv paus tsim neeg kev vam meej, lub nroog Npes Des yog lub tsev khaws ntiaj teb cov ntaub ntawv. Tab sis tsov rog rhuav tseg tej no pov tseg.”

Vaj Qhia ntuas tias tsov rog yog tus dab phem hloov cev mus raws ntiaj teb tiam neeg thiab nrhiav noj haus nyob hauv tib neeg. Sawv daws tsum muab kev kwv kev tij los tawm tsam tsov rog, muab kev kwv kev tij los tiv thaiv cov cuab yeej ntaus rog.

Vaj Qhia hais tias qhov no yog ib yam hauj lwm twv neeg kawg nkaus.

Thaum Vaj Qhia mus txog lub nroog Uj qhov chaw Tswv Ntuj hu Has Nplas Has ces Has Nplas Has mloog Tswv Ntuj lub suab. Nyob ntawm no muaj cov thawj coj Mawv Xim Lim tuaj sib txoos thov Ntuj mas zoo tam li Has Nplas Has tab tom ntsia nws cov me nyuam thiab hais tias: Nej sawv daws yog ib co kwv tij.

“Tswv Ntuj ncaj ncees rau nws cov lo lus cog, nws tau txoj hau kev mus nrhiav kev thaj yeeb. Tswv Ntuj qhia kom cov neeg ntsia ntsoov Ntuj Ceeb Tsheej ua cwj taw kev.”

Lo lus ‘Peb sawv daws yog ib cuab kwv tij’ yog lo lus nyob hauv kev tsham Is Lav teb zaum no. Lo lus no yog ib lo lus nyob hauv tsoom Leej Choj lub rooj ncauj lus hauv lub Tsev Teev Ntuj Xis Lias hauv Npes Des uas raug kev puas tsuj hauv xyoo 2010.

Lo lus no kuj yog ib lo lus nyob hauv nroog Mos Sus  thiab nroog Qas Las Qos ze ntawm lub qub nroog Nis Nis Ves uas raug cov Mawv Xim Lim txeeb tau, ua rau cov ntseeg coob leej ntau tus tau khiav tawm. Tab sis nyob rau ziag no, cov Mawv Xim Lim thiab cov ntseeg tab tom sib pab txhim kho cov Tsev Teev Ntuj, tsis hais rau kev teev hawm Mawv Xim Lim los kev teev hawm Tswv Ntuj.

Yog li Vaj Qhia thiaj thov kom sawv daws thov Ntuj rau cov neeg hauv thaj tsam ntawd cov hauj lwm. Vaj Qhia nco txog cov neeg Is Lav uas tawg ua neeg thoj nam thiab ntuas lawv kom txhob tso lawv txoj kev tso siab thiab kev vam khom pov tseg, lawv tsum ua tus tsim kev haum xeeb thiab kev kwv kev tij rau thaj chaw lawv mus poob rau.

Lo lus peb sawv daws yog ib cuab kwv tij tseem yog ib lo lus nyob hauv kab ke cav txog lub Cim Yug hauv Npes Des thiab Aws Npis.

Vaj Qhia ntuas tias Has Nplas Has thiab nws cov xeeb ntxwv kev vam khom muaj tseeb tuaj nyob hauv Yes Xus Pleev, Tswv Ntuj Leej Tub uas Leej Txiv pub rau ntiaj teb neeg kom tuag txhiv ntiaj teb hauv kev tuag. Huab Tais Yes Xus kev sawv rov los tau qhib Ntuj Ceeb Tsheej lub qhov rooj rau cov neeg quaj ntsuag, raug tsim txom, raug txom nyem, cov neeg rov tig ua kwv ua tij.