KOM PEB RAS LI TOS MAS

Nyob hauv Thaj Txi Ntuj Hnub Chiv Huab Tais Khuv Leej, Vaj Qhia caw peb sawv daws txais Huab Tais Yes Xus kev khuv leej xws li tus Hauv Paus Xa Lus Tos Mas, thiab peb khuv leej lwm tus.
Vaj Qhia pib hais tias “Nyob hauv Lis Piam tas los, peb nco txog Huab Tais Yes Xus kev sawv rov los; hnub no peb yuav ua tim khawv txog nws cov thwj tim txoj kev ras.”
Ib lis piam tom qab Huab Tais Yes Xus sawv rov los mas cov thwj tim tseem ntshai, yog li lawv thiaj kaw qhov rooj ntom nti. Huab Tais Yes Xus thiaj tawm los hais rau lawv tias : Nej nyob kaj lug!
Vaj Qhia hais ntxiv tias Huab Tais Yes Xus pib dua tshiab, tsa nws cov thwj tim kom rov ras dheev dua nyob hauv ‘txoj kev ntseeg’, ‘kev khuv leej cov neeg txhaum’.
Qhov no qhia peb paub tias Tswv Ntuj tsis dhuav tsa peb thaum peb qaug. Tswv Ntuj zoo xws li leej txiv cia peb xyaum mus kev thiab txais peb thaum peb vau.

Vaj Qhia hais tias “Txhais tes uas hwj peb rov sawv yog kev khuv leej.”

Muaj Tswv Ntuj xwb thiaj paub tias peb yuav qaug ntxiv. Tiam sis Tswv Ntuj yuav hwj peb dua tas mus li vim Tswv Ntuj vam kom peb ntsia nws, tsis yog ntsia peb txoj kev qaug.

“Huab Tais Tswv Ntuj tos kom peb muab peb tej kev qaug cev rau nws, ces Tswv Ntuj yuav pab peb tau txais nws kev khuv leej.”

Cov thwj tim tau tso Huab Tais Yes Xus tseg. Lawv tu siab. Huab Tais Yes Xus yees tawm rau lawv pom, nws tsis ntuas tsis cem lawv; tiam sis Huab Tais Yes Xus muab nws cov qhob txhab rau lawv saib.
Thaum ntawd Tos Mas tsis nrog lawv nyob, mas Tos Mas thiaj tsis ntseeg. Tos Mas hais tias yog nws pom lub qhov txhab thiab tau kov lawm mas nws mam ntseeg. Txawm li ntawd los Huab Tais Yes Xus tseem nyiam thiab hlub nws, Huab Tais Yes Xus thiaj rov tawm los rau cov Thwj Tim thiab Tos Mas pom ces Tos Mas thiaj ntseeg.
Vaj Qhia hais tias “Thaum Tswv Ntuj yog peb tus Huab Tais lawm, mas peb pib lees paub peb tus kheej thiab nyiam peb txoj sia.”
Tos Mas ua tus yam ntxwv qhia peb tias peb txoj kev qaug zog muaj nqis rau Huab Tais heev. Yog li Huab Tais Yes Xus cov kab sab khuv leej yuav tsom nyob hauv peb thiab ci ntsa mus rau lub ntiaj teb.
Qhov ci ntsa no yuav pab kom peb tos lwm tus zoo li Huab Tais Yes Xus tos Tos Mas, yog li thiaj yuav tsis muaj leej twg raug tso pov tseg thaum ntiaj teb dim ntawm tus kab mob Covid-19 lawm.
“Kev txhawj txog yus tus kheej xwb yog yam phem tshaj plaws.” Vaj Qhia ntuas sawv daws.
Vaj Qhia thov kom peb qog cov ntseeg thaud tus yam ntxwv, vim lawv tau txais kev khuv leej thiab lawv ua neej nyob hauv kev khuv leej lwm tus. Lawv sib sau cuab tam ua ke thiab muab faib rau lwm tus.

“Yam no tsis yog ib txoj kev xav, tiam sis yog kev ntseeg hauv Leej Pleev.”

Kawg no Vaj Qhia hais tias nws xav kom peb zoo siab txais xwv txheej kab mob Covid-19 no los ua lub caij npaj peb tus kheej rau lub neej pem suab.
Peb yuav tsum khawm sawv daws cia li Huab Tais Yes Xus kev nyiam tau cawm Tos Mas lub siab. Thov kom peb txais Huab Tais Yes Xus kev khuv leej thiab muab kev khuv leej rau tus neeg qaug zog tshaj plaws, yam no yuav cawm ntiaj teb tau.

Vam txog : Vaticannews.va/en
Tus txhais : Txawj Tsav Meej Mom Lauj, Zoo Tswv Zov Yaj