LEEJ NTSHIAB YOS XES YOG TUS PIV TXWV QHIA NEEG UA SIAB TAWV

Nyob hauv hnub tim 29 lub 12 hlis 2021 Vaj Qhia Fas Ntshis Kus tham txog Leej Ntshiab Yos Xes lub siab tawv coj tus me nyuam Yes Xus khiav tawm hauv Npes Les Hes vim tus vaj Hes Los yuav muab cov me nyuam nyob ib cheeb tsam ntawd tua kom tas. Ces Vaj Qhia thov kom cov ntseeg sawv daws yoog raws Leej Ntshiab Yos Xes tus piv txwv ua siab tawv no.

Vaj Qhia Fas Ntshis Kus cov lus ntuas tsoom ntseeg hauv hnub no yog hais txog Leej Ntshiab Yos Xes muaj lub siab tawv mas nws thiaj coj tsev neeg khiav ua neeg thoj nam mus rau lwm teb chaws.

Ntawv Moo Zoo sau tias thaum ntawd, Hes Los hais kom muab cov me nyuam hnub nyoog li 2 xyoos rov hauv tua tuag kom tas. Ntuj tus Tshiab tuaj hais kom Yos Xes coj Mab Liab thiab tus me nyuam Yes Xus tsiv mus rau Hais Nkws Tos. Yim Neeg Ntshiab no poob rau kev rhuav ntsej muag thiab ntsib kev tsis ruaj, kev ntshai thiab mob siab uas lawv yuav tau ncaim lawv lub teb chaws mus.

Vaj Qhia hais tias nyob rau peb tiam neeg no, muaj coob leej ntau tus raug quab yuam kom lawv ua tiag nyiaj ris kev tsis ncaj ncees thiab kev txom nyem xws li Yim Neeg Ntshiab no. Tej no yeeb vim lo ntawm cov thawj coj lawv lub siab muab hlob thiab nyiam tsim kev kub ntxhov. Nyob rau Yes Xus tiam los kuj zoo li ntawd.

Hes Los hais kom muab cov me nyuam tua kuj yog nws ntshai tsam tus me nyuam vaj yug los tshiab no yuav txeeb nws lub hwj chim.

Yos Xes coj nws tsev neeg khiav mus rau Hais Nkws Tos kom tau cawm tus me nyuam Yes Xus txoj sia, tab sis lawv pab tsis tau ntau txhiab tus me nyuam raug tua tuag.

Tus vaj Hes Los yog tus qauv hais txog tus hau tsiv tsaim thiab siab phem, siv nws lub hwj chim los ua tej yam lim hiam tsis haum rau ntiaj teb neeg. Tus neeg twg coj tus cuj pwm li hais ces nws zoo xws li yog tus vaj Hes Los.

Leej Ntshiab Yos Xes yog tus qauv txawv Hes Los. Leej Ntshiab Yos Xes yog tus neeg coj ncaj thiab nyiam ua raws li tus Tshiab hais, txawm tias tej zaus yuav ntsib kev txom nyem, kev nyuaj siab thaum mus nyob txawv teb txawv chaw, txawv xeem txawv lus. Qhov no yog Leej Ntshiab Yos Xes muaj lub siab tawv.

Vaj Qhia ntuas tias niaj hnub peb yuav ua siab tawv li Leej Ntshiab Yos Xes. Vim lub siab tawv txua tau kom neeg tsim txiaj.

“Peb yuav pom tau tias nyob hauv txhua tiam neeg, cov neeg siab tawv lawv muaj yeej txoj kev txom nyem, lawv nyiaj ris kev tsis ncaj ncees, kev poob ntsej muag thiab yeem tuag ua tim khawv txog lawv txoj kev ntseeg.”

Kawg no Vaj Qhia Fas Ntshis Kus xav kom sawv daws xeev tias Leej Ntshiab Yos Xes yog tus qhia peb yeej txoj kev ntshai tsam peb poob rau kev txom nyem. Thiab Vaj Qhia thov kom sawv daws thov Ntuj pub rau cov ua neej thoj nam thiab tsiv teb chaws nyob hauv peb tiam neeg no.