LEEJ NTSHIAB YOS XES YOG TUS PIV TXWV ZOO RAU COV UA TXIV

Nyob hauv hnub tim 5 lub 1 hlis xyoo 2022 yog hnub Vaj Qhia Fas Ntshis Kus rov tuaj ntsib tsoom neeg ntseeg, Vaj Qhia tau tham txog Leej Ntshiab Yos Xes kev ua ib leej txiv zoo thiab Vaj Qhia thov Ntuj pub rau cov me nyuam yaus kom lawv muaj kev lom zem nyob hauv leej txiv txoj kev hlub.

Vaj Qhia cov lus hauv hnub no yog tham txog Leej Ntshiab Yos Xes lub luag hauj lwm ua Yes Xus leej txiv raws li Lus Kas Ntawv Moo Zoo thiab Mas Tais Ntawv Moo Zoo sau hais tseg tias Yos Xes yog Yes Xus tus txiv txais yuav tsis yog tseem txiv.

Vaj Qhia hais tias niam txiv txoj hauj lwm yog tu tej me nyuam. Tus ua txiv tsis yog tus yug tab sis tus ua txiv yog tus pab txua tus me nyuam kom tsheej neeg. Txiv neej tau lub npe hu ua leej txiv tsis yog vim txiv neej xeeb tus me nyuam, tiam sis vim txiv neej txais txoj hauj lwm tu tus me nyuam. Li ntawd, yog thaum tus txiv neej twg txaus siab tu thiab saib xyuas lwm tus neeg txoj sia, mas nws tau txia ua tus neeg ntawd leej txiv lawm.

Yos Xes zeem tseeb tias txiv neej txaus siab ua ib tug me nyuam twg tus txiv txais yuav tsis yog nkawd koom roj ntsha, tab sis vim txoj kev hlub yog yam loj tshaj.

Vaj Qhia hais ntxiv tias “Muaj puas tsawg tus me nyuam ntsuag nyob hauv ntiaj teb no tab tom tos saib puas muaj leej twg tuaj khaws lawv mus tu, thiab muaj puas tsawg nkawm niam txiv xav muaj me nyuam tab sis nkawd muaj tsis tau, los yog yuav muaj puas tsawg yim neeg zoo siab qee lawv txoj kev nyiam kev hlub rau cov neeg ua ntsuag nos.”

Vaj Qhia cov lus no yog xav kom sawv daws xeev txog kev txais cov me nyuam ntsuag, cov me nyuam raug pov tseg los tu.

Vaj Qhia xav kom cov txij nkawm sawv daws txiav siab muaj me nyuam, tsis hais yog nkawd roj ntsha los yog txais lwm tus me nyuam los tu ua nkawd li me nyuam. Qhov no yuav zoo dua nkawd txoj kev muas dev muas miv los tu tam me nyuam.

Dua li, Vaj Qhia xav kom cov nom tswv kub siab txhawb nqa kev txais tu cov me nyuam ntsuag vim muaj ntau tus me nyuam lawv tsis xav ua ntsuag nos, lawv xav tau niam tau txiv xws li lwm tus.

Kawg no Vaj Qhia thov Ntuj rau cov me nyuam sawv daws kom lawv txhob plam leej txiv kev hlub. Thov kom Leej Ntshiab Yos Xes tiv thaiv thiab pab cov me nyuam ntsuag, thiab thov Leej Ntshiab Yos Xes pab cev nkawm niam txiv xav tau me nyuam cov lus thov rau peb Leej Txiv Tswv Ntuj.