Leej Ntuj Plig Ntshiab tso peb tawm hauv kev ntshai

Nyob hauv Hnub Tsib Caug (Pentecost) Vaj Qhia Fas Ntshis Kus caw tsoom neeg ntseeg kom tso txoj kev ntshai pov tseg thiab tshuab kom Tswv Ntuj kev nyiam tus nplaim taws cig hlob tuaj.

Vaj Qhia Fas Ntshis Kus pib hais lus rau sawv daws tias “Hnub no yog hnub ua hmoov Tsib Caug, lub Moo Zoo coj peb rov tig mus txog thaum Yes Xus tuag tas, cov thwj tim sib txoos ua ke ntsiab ntsiag nyob hauv ib kem tsev vim lawv ntshai cov Yus Das tuaj ntes lawv.”

Vaj Qhia piav ntxiv tias thaum ntawd Huab Tais Yes Xus tawm los rau lawv pom, nws tshuab pa rau lawv thiab hais rau lawv tias “Nej txais Leej Ntuj Plig Ntshiab” (Z 19: 22).

Nqe lus no Vaj Qhia muab nthuav tias yog Huab Tais Yes Xus xav tso cov thwj tim kom dim hauv txoj kev ntshai mas lawv thiaj muaj peev cwm tawm mus ua tim khawv thiab tshaj tawm txog lub Moo Zoo.

Tos Vaj Qhia nthuav zoo li hais, yeeb vim Leej Ntshiab Zam sau tias ‘cov qhov rooj hauv qhov chaw cov thwj tim nyob kaw tas, vim lawv ntshai cov Yus Das’. Cov thwj tim nyob hab nuv tas thaum lawv pom Huab Tais Yes Xus tuag, cov thwj tim txoj kev vam khom zaj ntshis ua cua tas tsis pom ntxiv lawm. Yog li cov thwj tim thiaj kaw qhov rooj qhov rais ntom nti, lawv nyob ntsiag to hauv kem tsev.

Vaj Qhia tig los hais rau sawv daws tias “Puas tsawg zaus peb kaw peb cia, vim lub zwj ceeb coov heev, los yog vim teeb meem ntawm peb ntiag tug, los yog vim kev txom nyem ntaus lub cim rau peb los yog vim txoj kev phem niaj hnub nyob ib puag ncim peb?”

“Thaum peb saib zoo li yuav tsis muaj kev vam khom thiab tag lub peev xwm yuav mus ntxiv lawm tom ntej, peb yuav zoo li cov thwj tim, peb yuav kaw peb cia, peb yuav tsa lub laj kab thaiv peb cia nyob hauv txoj kev ntxhov siab.”

Vaj Qhia piav ntxiv tias qhov peb kaw peb cia no yuav tshwm tuaj thaum peb poob rau lub zwj ceeb cov heev rau peb, ces peb cia txoj kev ntshai los koos peb. Thaum ntawd peb lub qhov rooj siab yuav kaw. Peb xav txog kev ntshai lwm tus, ntshai cov pej kum neeg, ntshai tus neeg txawv peb, ntshai tus xav tsis thooj li peb, thiab tej zaus peb tseem yuav ntshai Tswv Ntuj thiab los kuj muaj; xws li ntshai tias Tswv Ntuj yuav muab txim rau kuv, Tswv Ntuj yuav npau taws rau kuv.

Yog peb pub chaw rau tej kev ntshai no tshwm sim tuaj, peb lub qhov rooj yuav kaw: tsis hais qhov rooj siab, qhov rooj ib cheeb tsam, thiab lub qhov rooj Koom Txoos.

Vaj Qhia muab lo lus xav tswv yim tias “Qov twg muaj kev ntshai, qhov ntawd muaj kev kaw.”

Vaj Qhia rov tig los hais cov lus txhawb zog tias “Tab sis lub Moo Zoo cev ib hauv tshuaj pab peb kom txhob poob rau kev ntshai; yog ‘Leej Ntuj Plig Ntshiab’. Leej Ntuj Plig Ntshiab tso peb tawm hauv kev ntshai lub tsev loj faj.”

Vaj Qhia tso siab li ntawd vim lub Moo Zoo piav ntxiv tias thaum cov thwj tim txais tau Leej Ntuj Plig Ntshiab lawm, lawv tawm hauv kem tsev, lawv mus tshaj txog lub Moo Zoo rau lub qab ntuj.

Vaj Qhia hais ntxiv tias Leej Ntuj Plig yog tus ua kom peb paub tias Tswv Ntuj nyob ze ze peb, Tswv Ntuj kev nyiam xyeeb txoj kev ntshai pov tseg, Tswv Ntuj kev nyiam tsom kev rau peb, Tswv Ntuj kev nyiam nplij peb siab, Tswv Ntuj kev nyiam txheem peb cia nyob hauv kev ntxhov siab.

Yog li mas Vaj Qhia thiaj kom sawv daws thov Leej Ntuj Plig Ntshiab los nyob saum sawv daws, saum lub Koom Txoos, thiab saum lub sim ceeb no tias “Thov kom hnub no Leej Ntuj Plig Ntshiab pab tshem txoj kev ntshai tuaj raug peb ntawd pov tseg thiab thov Leej Ntuj Plig Ntshiab tshuab pa rau Tswv Ntuj kev nyiam tus nplaim taws kom cig hlob tuaj.”