LEEJ PLEEV KEV KAJ LUG UA KOM PEB MUAJ YEEJ

Vaj Qhia lo lus hauv Hnub Chiv Hla xyoo no mas Vaj Qhia tshaj tias Huab Tais Yes Xus tus tuag saum Ntoo Cuam sawv rov los lawm, thiab Vaj Qhia nco txog cov neeg raug kev txom nyem nyob hauv tsov rog thoob ntiaj teb, thiab Vaj Qhia thov Leej Pleev kev kaj lug nkag los hauv peb lub neej, hauv peb vaj tse, thiab hauv peb lub teb chaws.

Nyob hauv hnub tim 17 lub 4 hlis 2022 ncaj rau Hnub Chiv Hla, ces Vaj Qhia Fas Ntshis Kus tau tshaj tawm lo lus Hnub Chiv Hla xyoo no tias “Huab Tais Yes Xus, raug ntsia tuag saum Ntoo Cuam, nws sawv rov los lawm! Huab Tais Yes Xus muaj txoj sia thiab nws tsis yog dab, Huab Tais Yes Xus sawv nyob nruab nrab nws cov thwj tim ua xyem xyav txog nws. Nej nyob kaj lug mog!”

Vaj Qhia ntuas tias thaum peb txais lo lus Hnub Chiv Hla no mas peb yuav qhib siab kom dav fo, tshwj xeeb yog nyob hauv lub zim txwv ntiaj teb ua tsov rog no.

Thaum peb nco txog cov kwv tij raug kev txom nyem hauv tsov rog mas tej zaum peb yuav ceeb laj thiab tsis yooj yim rau peb ua ib siab lees ntseeg tias Huab Tais Yes Xus sawv rov los lawm tiag, kev muaj sia yeej kev tuag.

Xyoo no mas peb yuav vam txog Tswv Ntuj tawm los hais rau peb tias ‘nej nyob kaj lug!’ ntau dua txhia xyoo.

Peb vam khom yuav pom neeg lub tswv yim thooj siab koom ntsws nrhau cag ruaj nyob hauv lub caij kab mob sib kis, tab sis peb ho pom Kas Ees lub tswv yim saib nws tus kwv yog yeeb ncuab yuav tsum rhuav pov tseg nyob hauv peb sawv daws, tej no yog tsov rog thiab kev siv dag zog txiav txim rau lwm tus uas niaj hnub no peb sawv daws tab tom pom.

Tsuas yog Tswv Ntuj tib tug xwb thiaj yuav coj kev nyob kaj lug tuaj rau peb tau. Yog li Huab Tais Yes Xus thiaj tsum muaj txoj sia nyob thiab yees tawm rau nws cov thwj tim pom txog Tswv Ntuj txoj kev nyiam tias yuav nyob mus li, peb yuav thov Leej Txiv nyob saum ntuj tas zog mas Leej Txiv thiaj yuav khuv leej peb thiab lub qab ntuj neeg.

Yog peb xav txog Leej Pleev cov qhov txhab nws raug tsim txom vim nyiam peb, mas peb ob lub qhov muag tsis tau pom yuav rua loj dua tuaj, peb lub siab qhuav yuav tawg ces peb yuav qhib siab txais lo lus Hnub Chiv Hla xyoo no tias ‘Nej nyob kaj lug mog!’ Peb yuav txais Leej Pleev kev kaj lug los hauv peb lub neej, peb lub cuab, thiab peb lub teb chaws.

Vaj Qhia foom kev kaj lug rau Us Khas Zis Nas teb tias “Thov kev kaj lug muaj rau lub teb chaws Us Khas Zis Nas, thov kom hmo txaus ntshai vim kev txom nyem thiab kev tuag dhau mus, thov hnub tshiab muaj kev vam khom tawm tuaj kaj lub teb chaws mog!

Thov kom cov nom tswv tswj teb chaws hnov txog tsoom pej xeem cov lus thov kev thaj yeeb zaum no thiab mloog cov kws tshawb fawb 70 xyoo dhau los cov lus tias: peb yuav tso tseg ntiaj teb tsav neeg, los ntiaj teb tsav neeg yuav tso tseg kev sib ntaus sib tua zoo?”

Vaj Qhia foom kev kaj lug rau cov teb chaws As Xias Nrab tias “Thov kev kaj lug muaj rau lub tsheej Yes Lus Xas Les thiab cov nyiam nws mog, tsis hais cov ntseeg txog Yes Xus, cov Yus Das thiab cov Mawv Xim Lim. Thov kom nyob hauv teb chaws Lis Npaas, Xis Lias, Is Lav, Lis Npias, Yes Mees; sawv daws tsuas muaj kev kaj lug mog!”

Vaj Qhia thov kev kaj lug nqes los rau saum Mias Mas teb, As Kas Nis Taas teb, thaj tsam Sas Hes hauv Av Fis Kas, Es Thias Pias thiab Khoos Kos.

Vaj Qhia thov kom tsoom pej xeem raug xwv txheej huab cua hloov hauv As Fis Kas Naj, cov neeg raug xwv txheej kab mob sib kis kev iab hiam thiab tshuaj muaj yees hauv As Mes Lis Kas Naj; kom sawv daws ntsib kev kaj siab.

Vaj Qhia thov kom tus Huab Tais sawv hauv cov tub tuag rov los, koom nrog lub Koom Txoos hauv Kas Nas Das teb coj cov haiv neeg hauv lub teb chaws los taug tib txog kev mus cuag Tswv Ntuj.

Kawg no Vaj Qhia Fas Ntshis Kus ntuas sawv daws kom nkag siab tias txawm sawv daws nyob hauv kev tu siab thiab kev txom nyem vim tsov rog thiab xwv txheej, los sawv daws txhob zwm rau kev phem thiab kev siv dag zog rau lwm tus, vim tias Huab Tais Yes Xus twb yeej kev txhaum, kev ntshai thiab kev tuag los lawm.

“Thov kom Leej Pleev kev kaj lug yeej peb lub siab! Kev kaj lug yuav tsheej xeeb tau; yog peb muab kev kaj lug ua peb txoj kab xwm; yog peb muab kev kaj lug saib ua txoj hauj lwm tseem ceeb.”