LEEJ PLEEV YUG LOS, KOM PEB POM HUAB TAIS YES XUS NYOB HAUV LWM TUS

Nyob hauv Hnub Chiv 21 Caij Nyob Nruab Xyoos, Vaj Qhia Fas Ntshis Kus hais txog Tswv Ntuj Leej Tub yug los thiab thov kom tsoom ntseeg npuab Leej Pleev nyob hauv lub Cim Yug.

Nyob hauv Zam Ntawv Moo Zoo (Z 6: 60-69) piav txog Huab Tais Yes Xus cov thwj tim ua xyem xyav txog Huab Tais Yes Xus tom qab nws ua kom mov ntsu tuaj rau sawv daws noj. Huab Tais Yes Xus hais rau lawv tias tus twg noj nws lub cev thiab haus nws cov ntshav mas tus ntawd yuav muaj txoj sia nyob mus li, thiab Huab Tais Yes Xus hais tias hnub kawg nws yuav sawv rov qab los.

Vaj Qhia nthuav zaj no tias Huab Tais Yes Xus kom cov thwj tim phua lub ntsiab lus hauv nws cov hauj lwm ua kom mov ntsu tuaj thiab kom lawv rov ntsuas lawv txoj kev ntseeg saib loj li cas.

Huab Tais Yes Xus hais tias nws yog cov mov nqes saum ntuj los, nws yog cov mov pub txoj sia, cov mov nws yuav pub rau cov thwj tim yog nws lub cev thiab cov ntshav.

Pom tau tias muaj ib cov neeg txais tsis tau Huab Tais Yes Xus cov lus no, lawv tso Yes Xus tseg, lawv rov mus coj lawv lub neej xws li yav tas los.

Huab Tais Yes Xus nug pab Kaum Ob tias lawv yuav raws leej twg qab, raws Yes Xus mus ntxiv los tso Yes Xus pov tseg. Pob Zeb teb tias lawv tsuas raws Yes Xus qab xwb.

Vaj Qhia hais ntxiv tias Huab Tais Yes Xus lo lus ua rau ib zeej tsoom thim lawv txoj kev ntseeg. Peb pom tias Tswv Ntuj Leej Tub nqes los ua neeg ua rau muaj kev cuam tshuam nyob hauv tib neeg txoj kev ntseeg.

Huab Tais Yes Xus ua tim khawv tias nws yog cov mov pub txoj sia, nws yog txoj kev coj mus cuag Leej Txiv Tswv Ntuj. Ua ntej neeg yuav coj Txoj Cai los yog ua raws cov lus qhia hauv kev teev hawm, mas neeg tsum ua neej nyob hauv Leej Pleev tso.

Cov lus no yog txhais tias peb txhob raws Huab Tais Yes Xus qab nyob hauv txoj kev npau suav los hauv kev ua yog toog xwb. Tiam sis peb tsum raws Huab Tais Yes Xus nyob hauv peb txoj sia.

Kev raws Huab Tais Yes Xus qab yog ras txog Leej Pleev kev ua neej nyob ntiaj teb no thiab ras txog Leej Pleev cov kwv tij nkauj muam, peb tau ntsib tau pom nyob hauv peb txoj sia.

Niaj hnub no peb pom tias cov ntseeg txoj kev ntseeg tsuag vim Huab Tais Yes Xus tawm tuaj nyob hauv tib neeg. Raws li Leej Ntshiab Paj Lug hais tias ‘kev vwm’ hauv lub Moo Zoo vim lawv nrhiav hwj huam thiab ntiaj teb kev thoob tsib xwb.

Thiab peb pom neeg thim txoj kev ntseeg nyob hauv lub Cim Yug, vim ntiaj teb neeg yuav xav tias ua cas cov ntseeg yuav kim caug hawm lub ncuav mov? Ua cas lub mov mog me me ntawd yuav yug lawv txoj sia tau?

Vaj Qhia ntuas tias nyob rau Huab Tais Yes Xus tiam, mas tsoom sid cav lus zoo txog cov xwm Huab Tais Yes Xus ua kom mov ntsu tuaj txaus yug lawv, tab sis lawv txais tsis taus Huab Tais Yes Xus lo lus hais txog nws rov muab nws txi Ntuj.

Huab Tais Yes Xus ua rau peb raug xwv txheej loj, tiam sis peb yuav ntxhov siab dua no yog tias Huab Tais Yes Xus tsis ua li ntawd rau peb. Vim peb raug xwv txheej li hais, mas Tswv Ntuj Lo Lus thiaj ntws los ywg peb tau.

Li ntawd, Vaj Qhia thiaj txhawb cov ntseeg sawv daws kom thov Ntuj pub txiaj ntsim nqes los rau saum sawv daws, kom sawv daws tau txais Huab Tais Yes Xus lo lus muaj sia los yug sawv daws.

“Peb thov nkauj ntshiab Mab Liab, tus xeeb Huab Tais Yes Xus los thiab tus tau koom nrog Leej Pleev txi Ntuj, thov koj pab kom peb ua tim khawv txog peb txoj kev nsteeg nyob hauv peb txoj sia mus li.”