LEEJ TUB YOG KEV NYIAM, YOG KEV XYIV FAB LUB HAUV PAUS

Nyob hauv Hnub Plaub, lis piam 4 caij Tos Huab Tais, Vaj Qhia Fas Ntshis Kus tham txog Yes Xus yug los thiab hais tias cov xwm txheej no yog ib yam rov ntuas peb sawv daws tias peb yog tus Tswv Ntuj hlub thiab nyiam.

Caij Yes Xus Yug los yuav txog lawm tiag, yog li Vaj Qhia Fas Ntshis Kus thiaj muab lub sij hawm tawm rooj ntsib tsoom ntseeg hauv Hnub Plaub no los tham txog cov xwm Yes Xus yug.

Nyob hauv cov xwm peb yuav pom muaj niam Mab Liab, leej txiv Yos Xes, cov zov yaj ua neeg me pluag txom nyem, thiab cov kws hnub qub nplua nuj muaj hwj chim tuaj toob fab tuaj, lawv sawv daws nyob ua ke hauv lub tsev nyuj hauv Npes Les Hes. Vaj Qhia hais tias cov xwm txheej no yog hais tias lub caij tus me nyuam Yes Xus yug los yog tas ntiaj teb li xwm txheej thiab ntiaj teb neeg sawv daws muaj feem koom nrog.

Peb yuav pom cov neeg zov yaj, lawv ua neeg me tsis muab hlob; peb yuav pom cov kws hnub qub, lawv tiv tshav tiv no ntoj kev deb tuaj nrhiav tus vaj tshiab yug los.

Ob yam no qhia tau rau peb tias kev tsis muab hlob xwb thiaj coj peb mus nrhiav Tswv Ntuj tau thiab qhib peb lub tswv yim kom pom tias ua cas peb thiaj yuav tsum muaj sia nyob.

Vaj Qhia zeem tseeb tias sawv daws raug hu los nrhiav Tswv Ntuj, thiab yog Tswv Ntuj lub txiaj ntsim mas sawv daws thiaj ntsib Tswv Ntuj tau.

Dhau ntawd, Vaj Qhia Fas Ntshis Kus tau hais ntxiv tias “Kev lees paub Tswv Ntuj tsis yog ib yam yuav txo koj lub meej mom, vim tias neeg lub meej mom ib txwm nrhau cag tob nyob hauv Tswv Ntuj.”

Ntawv Moo Zoo sau hais tias Ntuj cov Tshiab tawm los cav lus zoo tias “Nyob ntiaj teb, tsoom neeg Tswv Ntuj nyiam, nyob thaj yeeb.” (LK 2: 14) Thiab sau tias “Tswv Ntuj txoj kev nyiam yog zoo li no: tsis yog peb tau nyiam Tswv Ntuj, yog Tswv Ntuj tau nyiam peb. Peb kav tsij nyiam Tswv Ntuj mog, vim Tswv Ntuj tau nyiam peb ua ntej” (1 Z 4: 10, 19)

Yog vim li no, Vaj Qhia thiaj xaus tias “Tswv Ntuj nyiam peb, nws thiaj nqes los ua neeg nyob nruab nrab hauv peb sawv daws. Huab Tais Yes Xus yog kev nyiam, Huab Tais Yes Xus yog kev kaj siab lug lub hauv paus, mas lub caij Yes Xus Yug no peb sawv daws thiaj yuav nyob kaj lug xyiv fab mus li.