LIM LUB TSWV YIM THAUM THOV NTUJ YOG QHIA TAUG RAWS KEV NYIAM TXOJ KEV

Nyob hauv Hnub Plaub hauv Lis Piam 5 Caij Hla, Vaj Qhia Fas Ntshis Kus qhia txog kev lim yus lub tswv yim zoo thaum tab tom thov Ntuj tias yog ib qhov coj peb raws Huab Tais Yes Xus qab nyob hauv kev nyiam txoj kev.
Txhua Hnub Plaub hauv lis piam mas Vaj Qhia tawm rooj tuaj nthuv txoj kab ke thov Ntuj rau tsoom ntseeg mloog. Nyob hauv Hnub Plaub tim 5 lub 5 hlis no, Vaj Qhia hais txog kev lim yus txoj kev xav thaum thov Ntuj. Vaj Qhia hais tias yam tob tob hauv kev lim lub tswv yim mas zoo puav tam li cov ntsev nphoo rau tej zaub mov kom noj qab nplaig. Kev lim yus txoj kev xav los yog yus lub tswv yim tsis yog ib yam peb tsum ua, tiam sis yog yam ib txwm nyob hauv peb txoj sia.
Vaj Qhia nthuav ntxiv tias kev xav txog txhua yam ntuj tsim los hauv lub sim ceeb no yuav coj peb los nyob hauv txoj kev ntseeg thiab kev nyiam ua ntej txoj kev xav ntawd yuav txia ua peb lo lus thov Ntuj.
Peb tsis muab qhov muag los lim lub tswv yim, peb muab peb lub siab coj los lim. Yog li, kev thov Ntuj nyob hauv txoj kev ntseeg thiab kev nyiam thiaj nkag los muaj feem nyob hauv txoj kev lim tswv yim ntawd, vim kev ntseeg thiab kev nyiam yog txoj pa tuaj ntawm Tswv Ntuj tuaj uas Tswv Ntuj pub rau peb.
Kev thov Ntuj ntxuav peb lub siab kom huv tuaj thiab qhib peb kom pom kaj pom tseeb, pab kom peb nkag siab txog qhov tiag; xws li Leej Ntshiab Zam Vias Nes lo lus tias ‘Yog peb lim peb lub tswv yim mas yog peb saib txoj kev ntseeg nruj nrees, yog ntsia ntsoov Huab Tais Yes Xus tsis ntsais muag.’
Vaj Qhia hais tias txhua yam yog muaj los raws li no: yog los ntawm lub siab uas hnov txog kev nyiam. Ces qhov tseeb raug lim nyob hauv lwm txoj kev ntsia pom.
Vaj Qhia rov vam txog Leej Ntshiab Zam Vias Nes cov lus tias yog peb xav txog Huab Tais Yes Xus kev nyiam mas peb tsuas siv ob peb lo lus hais xwb ces yeej paub lawm, thiab peb yuav hais tau tias

‘Kuv ntsia Huab Tais Yes Xus
thiab Huab Tais Yes Xus kuj ntsia kuv.’

Vaj Qhia hais tias ntsia ntsoov xwb twb txaus lawm, twb txaus rau peb tso siab tias muaj txoj kev nyiam loj tas nrho nyob ib ncig peb. Huab Tais Yes Xus yog tus ntsia ntsoov peb nyob hauv txoj kev nyiam, li ntawd, peb tsum nrhiav ib qhov chaw thiab ib lub sij hawm zoo los nyiam peb Leej Txiv Tswv Ntuj.
Dhau ntawm kev nthuav txog kev lim lub tswv yim thaum thov Ntuj lawm, Vaj Qhia kuj tau ntuas cov ntseeg sawv daws kom txhob poob rau hauv yus lub tswv yim kev ntxias uas yog tav kom peb txhob ua ub ua no.
Qhov tseeb hauv Leej Pleev thiab lub Moo Zoo mas tsis tau qhia kom muaj kev sib cov nyom los ntawm txoj kev lim lub tswv yim thiab kev nqes tes ua. Peb paub tias lub Moo Zoo hu kom peb tig los raws Huab Tais Yes Xus qab nyob hauv txoj kev nyiam. Qhov no yog qhov siab tshaj plaws thiab yog lub plawv hauv txhua yam. Txoj kab xwm ua zoo thiab kev lim lub tswv yim yog muaj tib lub ntsiab; yog hais txog tib yam.
Vaj Qhia xav kom sawv daws to taub mas thiaj ua piv txwv tias “Kev ua ib yam los ntawm txoj kev nyiam, txawm tias me me xwb; los yeej muaj txiaj ntsim rau lub Koom Txoos ntau dua txhua txoj hauj lwm tsis muaj qab hau sib sau ua ke. Yam tshwm tuaj los ntawm kev thov Ntuj tsis yog vim peb yog tus neeg muaj tsim, tiam sis yog los ntawm peb kev tsis muab hlob; txawm tias peb kev nyiam zais ntshis cia, tiam sis lub hwj huam loj tas nrho. Yam no yog yam cov ntseeg txog Yes Xus muaj peev xwm ua tau.”