LUB CAIJ LAUS YOG LUB CAIJ UA POV THAWJ TXOG LEEJ PLEEV

Vaj Qhia Fas Ntshis Kus rov nthuav txog cov laus lub txiaj ntsim rau sawv daws tau mloog dua, hnub no Vaj Qhia tau nthuav tias kev ntseeg ntsiag ntsiag thiab tso siab rau Leej Pleev lo lus cog cia muaj peev xwm ua kom lo lus ua pov thawj txog lub Moo Zoo txi tau txiv.

Nyob hauv Hnub Plaub lub lis piam no ncaj rau tim 10 lub 8 hli 2022 mas Vaj Qhia Fas Ntshis Kus nthuav txog cov laus lub txiaj ntsim ua zaum kawg. Vaj Qhia tau muab cov lus hauv Zam Ntawv Moo Zoo (Z 14: 1-3) uas yog thaum Huab Tais Yes Xus nrog cov thwj tim noj pluas hmo kawg los nthuav rau sawv daws mloog. Vaj Qhia pom tias thaum kawg mas muaj ntau tus yuav tau hla qhov tsis muaj zog thiab kev tawm tsam hauv lub caij laus, tiam sis lub caij ntawd tej zaum yuav yog lub sij hawm muaj txoj hmoov zoo nyob hauv kev ntseeg.

“Kev ntseeg txoj hauj lwm hauv lub caij laus yog coj peb thiab lwm tus mus nyob ze Tswv Ntuj lub Ceeb Tsheej.” Vaj Qhia hais rau sawv daws li ntawd.

Vaj Qhia taw rau sawv daws pom tias ntau xyoo tas los mas kev haub ntxias tau coj peb mus poob hauv kev iab siab, thiab peb pom tias muaj ntau lub cib fim peb tau ua plam ntawm peb tes mus.

Hais txog lub caij laus mas Vaj Qhia hais tias yog txoj hmoov Tswv Ntuj pub rau peb, vim lub caij laus tau qhia peb tias peb txoj sia coj peb hla kev tuag mus cuag txoj sia nyob mus li, peb yuav tau mus nyob nrog Tswv Ntuj.

Vaj Qhia ntuas tias peb lub neej nyob ntiaj teb no yog kev xyaum tiv kev txom nyem mas peb thiaj yuav txawj cav txawj qhuas Tswv Ntuj lub paj tshab thiab pub lub paj tshab no rau lwm tus. Lub caij nyob ntiaj teb no yog lub caij pib txoj sia kom tiav nyob hauv Tswv Ntuj xwb vim txij lub hauv paus los mas peb yeej zoo tsis txhij thiab thaum xaus los peb yeej zoo tsis txhij thiab.

Txoj kev laus pab kom peb to taub txog sij hawm lub ntsiab thiab tej yam peb yuav ntsib thaum yuav xaus txoj kev pib. Li ntawd, lub caij laus thiaj pab kom peb ntsia kev ntseeg kom tob dua tuaj mas thiaj yuav pom tias Huab Tais Yes Xus piv Ntuj Ceeb Tsheej xws li yog rooj qav uas peb nyob tos kom tau mus koom.

Cov lus xaus hauv hnub no mas Vaj Qhia hais tias cov laus muaj cai ua pov thawj txog lawv kev vam khom thiab kev ntseeg txog Leej Pleev rau lwm tus, vim cov laus ua kom Huab Tais Yes Xus lo lus cog cia pom tseeb tuaj.

“Lub caij laus yog lub caij phim cia rau tshaj lub xo xyiv fab tias txoj sia yog chaw pib coj mus cuag chaw tiav nyob hauv hnub kawg thiab yog qhov zoo tshaj plaws uas tuaj tsis tau txog.”