LUB CAIJ LAUS YOG LUB SIJ HAWM KEV THOOB TSIB NTOS UA DAIM NTAUB

Hnub Plaub lub lis piam Vaj Qhia Fas Ntshis Kus qhia txog cov laus qhov tseem ceeb thiab twm txog yam niam Mab Liab tau qhib tawm los rau peb pom tias Tswv Ntuj cog lus yuav muab txoj sia tshiab rau peb tom qab peb tuag.

Hnub tim 24 lub 8 hli 2022 Vaj Qhia Fas Ntshis Kus muab zaj piav txog niam Mab Liab mus saum Ntuj los xaus nws cov lus qhia txog cov laus qhov tseem ceeb. Vaj Qhia vam txog cov lus Leej Ntshiab Paj Lug saum mus rau cov ntseeg nyob Los Mas tias: Peb paub tias los txog tav no, tas puas tsav yam ntuj tsim los ntsaj xws li ib tug poj niam daws cev. Tsis yog tas puas tsav yam ntsaj xwb, tab txawm peb twb tau txais Leej Ntuj Plig cov txiaj ntsim los ua peb tug, tsis kav peb tseem ntsaj nyob hauv nruab siab thiab, vim peb tos lub caij txhiv peb lub cev. Txoj kev cawm peb yog qhov uas peb tos ntsoov txog. (LM 8: 22-24) Vaj Qhia muab nthuav rau sawv daws to taub tias thaum peb txhiv peb lub cev hauv kev tuag mas zoo xws li thaum ib tug poj niam ntsaj rau nws qhov mob vim nws tab tom yug me nyuam.

Vaj Qhia hais ntxiv tias niam Mab Liab nce mus saum ntuj mas zoo li tau ua ib qho pom kev rau pom txog peb qhov chaw kawg.

Nyob rau Koom Txoos sab hnub poob mas sawv daws xav tias muaj ib qho pom kev los ncig niam Mab Liab thiab nqa niam Mab Liab nce mus lawm saum ntuj. Koom Txoos sab hnub tuaj mas sawv daws xav tias thaum niam Mab Liab tsaug zog ntawd, cov Hauv Paus Xa Lus nyob ncig nws thiab thov Ntuj rau nws, mas tus Huab Tais Sawv Rov Los tau tuav niam Mab Liab cia nyob hauv nws ob txhais tes.

Vaj Qhia hais txog niam Mab Liab nce mus saum Ntuj thiab yam piav tsis tau hauv Leej Pleev kev sawv rov los tias yog niam Mab Liab tau koom nrog Leej Pleev sawv rov los, txawm tias neeg lub cev yuav lwj tom qab neeg tuag, tiam sis neeg lub cev yuav rov muaj sia nyob hauv Tswv Ntuj.

Vaj Qhia ntuas tias ‘kev tuag’ zoo tam li yog ‘kev yug zaum tim ob’, vim tias thaum peb tawm hauv leej niam lub cev los mas peb yeej yog tus neeg zoo xws li peb ib txwm yog. Yog li mas thaum peb dhau hauv kev tuag mus nyob peb Ntuj Ceeb Tsheej mas peb kuj tseem yog peb.

Xws li thaum Huab Tais Yes Xus sawv rov qab los mas Huab Tais Yes Xus tseem yog Huab Tais Yes Xus li tus qub; nws qhov tseem tib neeg tsis tau ploj, nws lub sawm txheej tseem nyob li qhov qub, nws lub cev los kuj yog lub qub cev, vim li no mas tus Huab Tais sawv rov los thiaj tseem yog tus qub Huab Tais Yes Xus.

Peb pom qhov tseeb no yog thaum Huab Tais Yes Xus tawm los rau cov thwj tim pom: Huab Tais Yes Xus muab nws cov qhov txhab rau lawv saib thiab Huab Tais Yes Xus tseem nrog lawv ua kwv tij li yav dhau los.

Vaj Qhia taw kev rau sawv daws pom tias thaum Huab Tais Yes Xus hais txog Ntuj Ceeb Tsheej mas nws muab piv rau rooj tshoob los lub ntees lom zem. Tej yam li hais los no pab peb ntsia mus pem hauv ntej kom pom tias peb muaj kev vam khom txog lub neej yav tom ntej thiab kev nyiam uas Tswv Ntuj tsim los.

Hais txog lub neej yav laus mas Vaj Qhia hais tias yog lub caij kev thoob tsib ntos ua ib daim ntaub ci ntsa rau cov hluas lub neej thiab lawv lub cheeb tsham.

“Tag nrho peb lub neej mas zoo li yog lub noob uas tsum muab cog rau hauv daim teb mas thiaj yuav tawg paj thiab txi txiv tau.”

Txawm li ntawd los Vaj Qhia txhawb siab tias kev tuag thiab yug dua tshiab nyob pem Ntuj yuav tsis muaj kev ntsaj, kev mob. Lub neej tshiab hauv kev sawv rov los yuav ciaj sia ntev dua lub neej thaum nyob ntiaj teb no li ib puas npaum ib txhiab npaum.