Lub siab kaj lug yog yam zeem tseeb txog peb kev txiav siab

Tim 7 lub 12 hlis xyoo no (2022) Vaj Qhia rov tuaj nthuav nqes lus ‘kev tsuas kom paub’ ntxiv, thiab twm txog yam zeem tseeb txog peb kev txiav siab.

Vaj Qhia Fas Ntshis Kus pib tias peb muaj peev xwm xam pom txog tej yam tseem ceeb pab peb ntsuas lub caij nyoog tom qab kev txiav txim siab. Ib lub cim pom tseeb yog qhov tias tus plig tau nyob kaj lug hauv lub caij kawg. Kev kaj lug coj kev haum xeeb, kev thooj siab, kev mob siab, thiab kev rau siab ntso tuaj.

Yog xav kom sawv daws to taub, Vaj Qhia thiaj ua piv txwv hais txog tus neeg txiav siab tshwj lub sij hawm cia rau teev Ntuj li 30 fiab tias tus neeg ntawd yuav rov muab lus nug nws tus kheej tias lwm lub caij hauv nws lub neej txhua txhua hnub mas nws tau nyob nyab xeeb los yog nws muaj kev ntxhov siab dua, lawv quav ntsej txog lawv lub luag hauj lwm dua los tsis tshua quav ntsej txog,  los yog lawv kev khaub zig nrog cov neeg txom nyem muaj los tsis muaj teeb meem.

Vaj Qhia hais ntxiv tias ib yam tom qab kev txiav siab yog ras ntsoov tias tau nyob hauv qhov chaw haum rau yus txoj sia thiab muaj qab hau nyob hauv qhov tau npaj tseg loj dua qub.

Lwm lub cim qhia tias tsuas tau zoo mas yog qhov tias peb txiav tau yam ywj siab thiab peb txaus siab rov muab yam peb txiav siab ntawd los lim dua kom pom txog Huab Tais cov lus qhia.

Tej li hais los no tsis yog tias Huab Tais xav muab peb cais tawm hauv yam peb nyiam, tab sis yog kom peb tau ua neej twj lij tsis raug khi cia.

Vaj Qhia ntuas tias “Tsuas yog Tswv Ntuj tib tug xwb thiaj paub tias yam twg zoo tshaj rau peb.”

Vaj Qhia hais ntxiv tias kev ntshaw txhav los ua yus li yog kev zoo tus yeeb ncuab xws li peb tau pom nyob hauv ntau lub cuab tias thaum ib tug twg ntshaw ua tus kav lwm tus txoj kev hlub mas kev kub ntxhov tshwm nyob hauv lub cuab ntawd.

“Vim peb nyiam kev ywj pheej, Tswv Ntuj thiaj tsim peb yam twj lij, peb xaiv tau ywj siab tias yuav cia Tswv Ntuj ua peb tus Huab Tais los tsis ua.” Vaj Qhia ntuas “Kev ntshai Tswv Ntuj los yog hwm Tswv Ntuj yog lub paj tshab thoob tsib pab peb kom txawj ntsuas kom pom meej tau. Kev ntshai Tswv Ntuj thiaj yog lub zog ntiab lwm yam kev ntshai kom tawm hauv peb mus, vim tias kev ntshai Tswv Ntuj mas peb thiaj muab siab dai duam rau Tswv Ntuj. Thaum Tswv Ntuj tsheej xeeb nyob hauv peb, thiaj tsis muaj dab tsi ua kom peb siab fab, peb lub siab thiaj nyob kaj lug.”

Vam txog: https://www.vaticannews.va/en/pope/news/2022-12/pope-francis-general-audience-discernment-confirmation.html

Tus txhais: Txawj Tsav M. Lauj