MUAB LUB SIAB NTSIA TXOJ SIA

Hnub tim 29 lub 8 hli 2021, Vaj Qhia Fas Ntshis Kus caw tsoom neeg ntseeg sawv daws los muab lawv lub siab tig ntsia txoj sia thiab lub ntiaj teb.

Ntawv Moo Zoo hnub no ntuas peb tias txhua yam yog tawm sab hauv neeg lub siab los, yog li peb thiab yuav thov Tswv Ntuj kom nws ntxuav peb lub siab kom ntshiab huv tuaj.

Mas Kos Ntawv Moo Zoo (MK 7: 1-13) piav txog cov Fas Lis Xais thiab cov Kws Ntawv Ntshiab pom Yes Xus cov thwj tim noj mov tsis ntxuav tes, lawv thiaj nug Yes Xus tias ua cas Yes Xus cov thwj tim tsis ua raws li tej kev cai ib txwm coj los.

Vaj Qhia hais tias cov kev cai ntawd yog ib yam zoo: xws li ntxuav tes ua ntej yuav noj mov,  ntxuav tais ntxhuav khob kom huv; tiam sis ua cas Huab Tais Yes Xus tsis kom cov thwj tim ua raws. Lo lus teb yog li no: peb yuav ruaj siab tiag tiag tias txhua yam peb ua ntawd tsum nyob hauv txoj kev ntseeg, thiab peb yuav tsis khi rau tej kev cai nyob nraum neeg daim tawv xwb. Tej no ua rau neeg xav tias yog neeg teev hawm raws kev cai mas yuav muaj txiaj ntsim dua, ces neeg tsis nco qab lawm tias qhov tseeb mas neeg tsum teev hawm Tswv Ntuj tawm hauv neeg lub siab los.

Ntawv Moo Zoo sau ntxiv tias: Yes Xus hais tias “Tsis muaj dab tsi nyob sab nraum neeg lub cev uas nkag rau hauv neeg, yuav ua kom neeg tsis huv. Yam ua kom neeg tsis huv yog yam tawm hauv neeg los. Vim tej yam phem txhawv hauv neeg nruab siab los” (MK 7: 15, 21)

Huab Tais Yes Xus cov lus no yog ib co lus qhia tshiab nyob rau tiam ntawd, vim thaud mas lawv ntseeg tias yam ua kom neeg tsis huv yog yam nkag mus rau hauv neeg lub siab.

Huab Tais Yes Xus lo lus qhia no nyob los txog niaj hnub nyem no, tshwj xeeb tshaj mas yog thaum peb xav tias txhua yam teeb meem raug peb mas yog vim lwm tus ua rau peb. Peb feeb txhua yam tsis zoo rau lwm tus ris, peb hais tias txhua yam xwv txheej yog tuaj sab nraud tuaj. Yog vim li no, peb thiaj cem luag lwm tus tias vim lawv mas peb thiaj raug teeb meem zoo li no. Peb yuav ras tias thaum peb yws peb cem luag ntawd, mas tsis muaj ib lub sij hawm zoo dab tsi rau peb, tsuas ua kom peb npau siab thiab iab siab xwb.

Vaj Qhia hais tias yog thaum peb coj li no mas Tswv Ntuj yuav nyob deb ntawm peb, vim tias ‘kev npau taws’, ‘kev cib nyeej’, thiab ‘kev tsis qab siab’ yuav kaw peb ntawm Tswv Ntuj.

Peb yuav ua li cas, peb thiaj dim ntawm tej yam tsis huv no? Peb yuav nquag thov Tswv Ntuj tiag tiag kom ntxuav tej kev ntxias no tawm hauv peb nruab siab mus. Peb yuav nquag thov Tswv Ntuj pub lub txiaj ntsim rau peb kom peb txhob muab sij hawm los xav los yws yws tias txhua yam tuaj nphav raug peb vim yog tus ub tus no ua rau peb.

Huab Tais Yes Xus hu peb los ua ib tug neeg ntseeg, kom peb muab siab los ntsia neeg txoj sia thiab txhua yam hauv ntiaj teb no.

Peb yuav thov Tswv Ntuj tiag tiag kom nws yaug peb lub siab kom rov ntshiab huv tuaj, ces lub ntiaj teb no yuav ntshiab tuaj.

“Peb yuav yeej txoj kev phem tau, yog peb yeej yam tsis huv hauv peb siab tau.”