NIAM MAB LIAB NROG COV RAUG MOB SIB KIS NYOB

Vaj Qhia kab ke ntuas tsoom ntseeg hauv Hnub Plaub hauv lis piam no mas Vaj Qhia rov xav txog lub ntsiab hauv kev koom nrog niam Mab Liab thov Ntuj, thiab Vaj Qhia hais ntxiv tias niam Mab Liab nyob nrog nraim cov tuag ib sab thaum lawv raug tso pov tseg ib leeg tsis muaj neeg tu.

Hnub tim 24 lub 3 hlis no yog hnub ua ntej Koom Txoos yuav ua ntees hwm niam Mab Liab txais xov ntawm tus Tshiab Nkas Nplias tias Leej Lo Lus yuav xeeb nyob hauv nws, Vaj Qhia Fas Ntshis Kus thiaj xav txog qhov zoo nkauj nyob hauv tus nkauj tsim txiaj Mab Liab cov lus thov. Yog li Vaj Qhia thiaj xav kom cov ntseeg sawv daws koom nrog niam Mab Liab thov Ntuj ua ke.

Txawm li ntawd los, Vaj Qhia nco ntsoov tias Huab Tais Yes Xus yog lub plawv hauv cov ntseeg kev thov Ntuj. Vaj Qhia hais tias “Txhua zaus thaum peb thov Ntuj yog vam txog Leej Pleev, yog nrog Leej Pleev thov, thiab yog nyob hauv Leej Pleev mas peb cov lus thov thiaj txawm tau. Vim Leej Pleev tib tug xwb thiaj yog peb tus cawm seej, yog tus cawm peb tau”

Leej Pleev yog tus ua kom peb rov sib haum xeeb nrog Leej Txiv nyob hauv lwm txoj kev thov Ntuj: thawj txoj kev yog nrog niam Mab Liab thov Ntuj.

Vim niam Mab Liab yog Huab Tais Yes Xus niam, yog tus tau cai mus nyob ze Tswv Ntuj lawm.

Vaj Qhia nthuav tias Koom Txoos sab hnub tuaj tau hais txog niam Mab Liab tias yog tus taw kev rau Leej Tub. Txhua yam hais txog niam Mab Liab mas yog qhia ncaj qha txog Leej Pleev thiab niam Mab Liab yog thawj tus tseem thwj tim.

Huab Tais Yes Xus qhia peb sawv daws tias niam Mab Liab yog tus xeeb peb sawv daws, raws li Huab Tais Yes Xus tau hais rau tus thwj tim nws nyiam uas nyob hauv qab Ntoo Cuam tias ‘Tus ntawd yog koj niad’.

Vim lo lus no, txij hnub ntawd los, peb sawv daws thiaj sib txoos ua npoj nyob hauv niam Mab Liab.

Tib yam nkaus li thuam niam Mab Liab nyob nrog nraim Leej Tub thaum yuav tuag, niam Mab Liab kuj nyob nrog nraim cov neeg tab tom yuav tso txoj sia yog lawv tsa ncauj thov txog niam Mab Liab.

“Niam Mab Liab zaum ib sab ntawm tus neeg tso ntiaj teb no tseg.” Vaj Qhia ntuas “Yog leej twg raug tso nyob tib leeg, niam Mab Liab nrog nraim tus ntawd puav tam li nws nrog nraim Huab Tais Yes Xus thaum zeej tsoom tsis lees paub nws saum tus Ntoo Cuam.”

Nyob rau lub caij Covid-19 sib kis no, muaj coob leej ntau tus raug tso pov tseg kom tuag ntsiag to tsis muaj leej twg mus hlub tshua, los peb tso siab tias peb niam Mab Liab tsis tso lawv, peb niam Mab Liab nrog lawv nyob.

Peb koom nrog niam Mab Liab thov Ntuj, mas nws hnov peb cov lus thov. Niam Mab Liab yuav los tiv thaiv nws cov me nyuam hauv qhov tsaus ntshai.

Vaj Qhia xaus tias leej niam Mab Liab nyob ntawd, nws thov Ntuj rau peb, nws thov Ntuj rau cov neeg tsis tau tsa ncauj hais rau nws, vim nws yog sawv daws niam.