NRHIAV LUB NEEJ NTSHIAB

Hnub Chiv tim 15 lub 5 hlis 2022, Vaj Qhia Fas Ntshis Kus ua tswv cuab tsa Koom Txoos cov Leej Ntshiab tshiab thiab ntuas sawv daws tias Tswv Ntuj nyiam peb sawv daws yam tsis muaj chaw xyeej, thiab txoj kev coj peb mus cuag qhov ntshiab mas yog txoj kev taug tau yooj yim tsuas yog peb ntsia kom pom Huab Tais Yes Xus nyob hauv lwm tus neeg.

Ntawv Moo Zoo hauv hnub no (15.05.2022) yog lub Moo Zoo raws Zam Ntawv Moo Zoo (Z 13: 31-35) hais txog thaum Huab Tais Yes Xus qhia cov thwj tim kom lawv sib nyiam sib hlub xws li nws tau hlub tau nyiam lawv. Vaj Qhia Fas Ntshis Kus thiaj nthuav rau sawv daws tias lub cuab tam Leej Pleev pub rau peb yog ‘Txoj Cai Sib Nyiam’, yog lub vab tshau tias leej twg thiaj yuav yog nws cov thwj tim. Nyob hauv Txoj Cai Sib Nyiam muaj 2 feem li no: Huab Tais Yes Xus txoj kev nyiam peb, thiab txoj kev nyiam Huab Tais Yes Xus xav kom peb ua rau lwm tus.

“Peb txhob nco qab tias Huab Tais Yes Xus nyiam peb tshaj lwm yam, nws nyiam peb yam tsis muaj chaw xyeej. Li ntawd, lub neej ua neeg ntseeg thiaj tsis yog chiv ntawm lo lus qhuab qhia thiab kev ua zoo, tab sis lub neej ua neeg ntseeg yog chiv tuaj ntawm lub tswv yim ras tau tias Tswv Ntuj nyiam peb.”

Vaj Qhia ntuas tias muaj ntau zaus lub ntiaj teb ntxias peb tias neeg tus nqe nyob ntawm neeg cov hauj lwm, tiam sis Ntawv Moo Zoo tau qhia peb tias peb sawv daws yog yam Tswv Ntuj nyiam. Kev sib nyiam yog cov neeg coj Ntuj kev cai lub thwj.

Vaj Qhia hais ntxiv tias muaj tej lub sij hawm peb ua tiag kom tau ua ib tug neeg ntshiab raws li peb lub siab ntshaw. Peb hloov txoj kev coj lub neej ntshiab ua lub hom phiaj uas peb yuav mus tsis txog, peb cais lub neej ntshiab tawm hauv peb kev ua neej nyob hauv niaj hnub no. Peb txhob ua zoo li ntawd, qhov peb yuav ua mas yog cia Tswv Ntuj kev nyiam ua hwj huam hloov peb, qhib peb lub siab kom peb txawj nyiam lwm tus.

Vaj Qhia hais lo lus nug tias kev ua neej nyob hauv kev sib nyiam yog zoo li cas?

‘Kev sib nyiam sib hlub’ yog kev tsob hwb thiab kev pub txoj sia rau lwm tus.

‘Kev tsob hwb’ yog txhob xub nrhiav txiaj ntsim rau tus kheej tab sis yuav tsum xub qee yus tej kev txawj ntse, yus li laj lim, yus lub zeej txhiaj cia rau lwm tus ua ntej tso. Yog li mas kom peb rov nug peb tias ‘kuv puas tau ua ib yam dab tsi rau lwm tus?’, ces peb yuav pom txog kev tsob hwb.

‘Kev pub txoj sia rau lwm tus’ yog yus muab yus tus kheej cia rau luag, txhob ua neeg qia dub, muab yus txoj sia ua paj tshab rau lwm tus. Piv txwv xws li tias saib xyuas cov neeg nyob ib ncig, pab cov neeg txom nyem, mloog lwm tus lub suab, thiab muab sij hawm rau nrog lwm tus sib tham.

Vaj Qhia nthuav ntxiv tias tus neeg tau lub neej ntshiab tsis yog vim nws khav theeb thiab muaj cuab kav, tab sis yog nws ua txhua yam nyob hauv kev sib nyiam sib hlub.

Yog li Vaj Qhia thiaj ntuas tias “Koj puas raug hu los coj lub neej ntshiab? Yog koj raug hu mas koj yuav coj lub neej xyiv fab raws nraim koj lo lus tau hais cog cia. Koj puas tau tsa cuab tsa yim? Yog koj tsa lawm mas koj yuav hlub thiab saib xyuas koj tus txij nkawm xws li Leej Pleev nyiam lub Koom Txoos. Koj puas yog ua hauj lwm nrhiav noj yug txoj sia? Yog koj ua hauj lwm mas koj yuav ua mus raws kev ncaj thiab tsob hwb koj cov kwv tij. Koj puas yog ib tug neeg laus muaj xeeb zeej xeeb ntxwv? Yog koj muaj lawm mas koj yuav kub siab ntuas lawv koj raws Huab Tais Yes Xus qab. Koj puas yog ib tug neeg ua txoj kab xwm muaj hwj chim? Yog tias koj ua mas koj yuav ua cov hauj lwm muaj txiaj ntsim rau sawv daws thiab tso tseg kev nrhiav txiaj ntsim rau tus kheej.”

Huab Tais Yes Xus hu peb los tsob hwb lwm tus thiab pub peb txoj sia rau lawv yam dawb paug tsis nrhiav dab tsi pauj. Yam no yog yam uas cov Leej Ntshiab tshiab hauv hnub no lawv tau ua los. Lawv kub siab ua lawv txoj hauj lwm raws lawv tej kab xwm. Lawv muab tas lawv txoj sia los tshaj lub Moo Zoo rau lwm tus. Lawv nrhiav pom lawv kev xyiv fab thiab lawv yog daim duab tsom txog Tswv Ntuj.

Thaum xaus mas Vaj Qhia nqua hu tsoom neeg ntseeg sawv daws kom nyias nrhiav nyias lub neej ntshiab xws li 10 tus Leej Ntshiab tshiab no tau ua piv txwv.

“Tswv Ntuj pub ib txoj npau suav rau koj. Koj yuav tau zoo siab txais koj txoj npau suav, thiab koj yuav xyiv fab taug koj txoj npau suav mus kom txog qhov ntshiab.”