NTSEEG THIAB TXHOB QAUG ZOG RAU KEV NRHIAV TSWV NTUJ

Ntawv Moo Zoo hauv Lis Piam 12 Caij Nruab Xyoos, hais txog Huab Tais Yes Xus txwv cua daj cua dub. Mas Vaj Qhia Fas Ntshis Kus thiaj nthuav tias cua daj cua dub thiab cov dej nphau nphwv piv tam li cov xwv txheej hauv peb lub neej. Thiab Vaj Qhia zeem tseeb tias Huab Tais Tswv Ntuj nrog nraim peb tsis tseg. 
Tim 20 lub 6 hli no, Vaj Qhia nthuav txog zaj Huab Tais Yes Xus txwv cua daj cua dub thiab dej ntuj nphau nphwv yuav los vov lub nkoj thaum lawv caij hla dej ntuj. Thaum ntawd Huab Tais Yes Xus tsaug zog lawm, cov thwj tim thiaj los tsa Huab Tais Yes Xus sawv los pab lawv.
Vaj Qhia muab cov thwj tim txoj kev ntshai thaum lawv ntsib xwv txheej no los piv rau peb sawv daws lub neej. Thaum peb ntsib teeb meem mas peb yuav hu ntuj hu teb tias Huab Tais Tswv Ntuj, koj nyob qhov twg, ua cas koj tsis pab kuv? Qee zaus peb poob rau hauv cov teeb meem tsis muaj hauj lwm ua los yog raug kev mob kev nkeeg, ntsib kev ntxhov siab looj koov. Thaum ntawd, peb ntsia tsis pom Huab Tais Yes Xus. Tab sis tseeb tiag mas Huab Tais Yes Xus nyob nraim nrog peb thiab tab tom txais peb tej teeb meem mus ris. Lub sij hawm peb xam tsis txog Huab Tais Yes Xus li hais, yog lub sij hawm sim saib peb lub siab puas ntseeg ruaj khov tiag. Huab Tais Yes Xus nyob ntawd tos ntshis saib peb puas hais kom nws pab peb. Huab Tais Yes Xus tsis yog kom peb ntseeg xwb, tiam sis kom peb nrog nraim nws thiab. 
Vaj Qhia ntuas tias peb tsum faib peb tej teeb meem li hais rau Tswv Ntuj pab nrog ris thiab hais qhia txhua yam rau, vim Tswv Ntuj xav kom peb nrhiav chaw nkaum, nrhiav kev nplij siab thiab kev txhawb siab nyob hauv tej xwv txheej ntawd.
Peb yuav ua li cov thwj tim; tsa Huab Tais Yes Xus thiab nrog Huab Tais Yes Xus tham.
Tsis tas li, zaj no qhia peb tias peb ua neej nyob ib leeg twj lij xwb yuav tsis tau, peb tsum saib Tswv Ntuj ua qhov tseem ceeb xws li tus tsav nkoj hauv plawv dej ntuj tsum muab lub hnub qub ci ua cwj taw kev.
Peb paub tias peb yuav tsum nyob rawv nrog Tswv Ntuj thiab txais Tswv Ntuj lub txiaj ntsim. Li ntawd, peb thiaj yuav ras ntsoov tias txhua yam tuaj nphav peb, tuaj ntxias peb txoj kev xav mas peb tus kheej yuav tswj tau.
Vaj Qhia hais tias nyob hauv zaj no mas Huab Tais Yes Xus nug cov thwj tim tias ‘Ua cas nej ntshai? Nej tsis ntseeg lod?’, lo lus no kuj yog Huab Tais Yes Xus tab tom hais rau peb ntag, tshwj xeeb tshaj mas yog thaum peb raug peb tej teeb meem looj koov, es peb tsis tso peb lub siab npuab Tswv Ntuj. 
Puas yog peb hu Tswv Ntuj thaum peb vam txog Tswv Ntuj xwb? Peb txhob ceeb laj thiab tub nkeeg nrhiav Tswv Ntuj tsis tseg mas thiaj yog.