NYOB HAUV HUAB TAIS YES XUS, PEB UA LUB NEEJ TSHIAB TAU

Vaj Qhia Fas Ntshis Kus cov lus nthuav Ntawv Moo Zoo hauv Hnub Chiv lub lis piam 5 caij Plaub Caug yog: ‘Huab Tais Yes Xus pub lub sij hawm rau peb ua lub neej tshiab.’

Vaj Qhia Fas Ntshis Kus mus tsham cov ntseeg hauv lub pov txwv Mes Lis Tas, ces Vaj Qhia ua tswv cuab coj lub Thaj Txi Ntuj nyob hauv lub nroog Fos Lias Nas. Vaj Qhia nthuav Ntawv Moo Zoo tias nyob hauv Huab Tais Yes Xus mas muaj txoj sia tshiab thiab lub neej tshiab tsis zoo li yav tas los.

Ntawv Moo Zoo hauv Hnub Chiv lub lis piam 5 caij Plaub Caug yog cov lus hauv Zam Ntawv Moo Zoo (Z 8: 1-11) hais txog thaum lawv ntes tau tus poj niam deev hluas, ces lawv coj tuaj rau Huab Tais Yes Xus, saib Huab Tais Yes Xus yuav teb lawv li cas.

Vaj Qhia nthuav tias cov neeg liam tus poj niam no, lawv tsis nco qab tias lawv nyias muaj nyias txhaum, lawv tsuas ntsia pom lwm tus cov txhaum xwb. Lawv hais tias lawv yog neeg ncaj thiab ntseeg Ntuj zoo, lawv xav sim Huab Tais Yes Xus kom tau kev kom Huab Tais Yes Xus.

Vaj Qhia ntuas sawv daws kom rov tig ntsia yus tus xeeb ceem saib zoo li cas thaum yus ua lwm yam rau lwm tus tias “peb khuv leej lawv xws li Huab Tais Yes Xus tau ua piv txwv nyob hauv hnub no, los peb txiav txim rau lawv xws li cov neeg coj tus poj niam no tuaj kom rau Huab Tais Yes Xus.”

Vaj Qhia hais ntxiv tias peb soj ntsuam saib peb yog los tsis yog Huab Tais Yes Xus thwj tim, mas yog kom peb rov tig ntsia peb tus kheej saib peb xav li cas rau peb. Peb puas xav tias peb paub txaus lawm xws li cov neeg coj tus poj niam deev hluas tuaj rau Huab Tais Yes Xus. Cov neeg ntawd lawv zoo raum daim tawv xwb, lawv muaj ib lub siab nkhaus. Tsis zoo li Huab Tais Yes Xus uas muaj lub siab dav thiab nkag siab.

Yog li Vaj Qhia thiaj ntuas tias yuav zoo rau peb txhua tus yog tias txhua zaus thaum peb teev Ntuj, peb koom ua cov kab ke hauv txoj kev ntseeg; peb tau nug peb tus kheej tias peb puas tau npuab Tswv Ntuj. Peb muaj peev xwm nug Tswv Ntuj tias ‘Huab Tais Yes Xus, kuv nyob nov, koj xav tau dab tsi ntawm kuv? Muaj dab tsi nyob hauv kuv lub siab kuv lub neej, uas koj xav kom kuv muab hloov? Koj xav kom kuv ntaus nqe rau lwm tus zoo li cas?’

Yog peb hais li no rau Tswv Ntuj mas yuav zoo rau peb, vim Tswv Ntuj tsis saib neeg nraum daim tawv tab sis Tswv Ntuj nrhiav qhov tseeb hauv neeg nruab siab.

“Yog peb qhib siab txais Tswv Ntuj tiag, Tswv Ntuj yuav ua hwj huam nyob hauv peb.”

Txawm tias zoo li tus poj niam no lub ntuj yuav tsau nti lawm tiag, tsis kav Huab Tais Yes Xus tau qhib lub ntuj tshiab rau nws. Huab Tais Yes Xus tsis nrhiav nws qhov txhaum, Huab Tais Yes Xus pub kev vam khom rau nws.

Tswv Ntuj pub lub sij hawm tshiab rau neeg, kom neeg nrhiav tau txoj kev coj mus cuag kev cawm thiab kev dim.

Tswv Ntuj zam txim mus li, tsuas yog peb xwb thiaj ceeb laj thov kom Tswv Ntuj zam txim rau peb.

Tswv Ntuj xav kom peb cov neeg uas Tswv Ntuj tau zam lub txim rau lawm, kom peb txhob tub nkeeg ua pov thawj txog Tswv Ntuj txoj kev zam; yog zam rau lwm tus, ntseeg thiab pub lub sij hawm rau lwm tus tau pib ua lub neej tshiab nyob hauv Tswv Ntuj kev khuv leej.

Hnub no, tus poj niam deev hluas tau txais Huab Tais Yes Xus kev khuv leej nyob hauv nws txoj kev txom nyem thiab nws tau kev zam txim ua paj tshab rau nws lub neej tshiab. Li ntawd, peb yuav kawm zaj no cia. Yog peb yoog raws Leej Pleev, peb yuav tsis saib lwm tus qhov txhaum, tab sis peb yuav pub kev nyiam rau tus neeg muaj txhaum, kom lawv pom tias lawv muaj sij hawm ua lub neej tshiab tau.