Nyob hauv Yes Xus, peb muaj peev xwm pib dua lub neej tshiab tau

Tim 4 lub 12 hlis 2022 no yog Hnub Chiv lub Lis Piam 2 caij Tos Huab Tais, Vaj Qhia Fas Ntshis Kus tau hais txog ‘kev ua neeg tsis muab hlob’ tias yog yam tseem ceeb nyob hauv peb lub neej, peb yog neeg tsis muaj zog thiab qaug rau txoj kev txhaum; yog li peb thiaj yuav thov Huab Tais zam txim rau peb. Thiab nyob hauv Huab Tais Yes Xus, peb muaj peev xwm pib dua lub neej tshiab yog tig los nrhiav Tswv Ntuj thiab txais Tswv Ntuj txoj kev nyiam tsis muaj chaw xaus.

Ntawv Moo Zoo piav txog tus ntxuav plig Zam tawm tuaj tshaj rau zeej tsoom kom hloov siab tshiab tias ‘nej hloov siab mog, vim Ntuj lub Ceeb Tsheej los txog ze lawm!’ (MT 3: 2)

Vaj Qhia hais tias tej zaus peb yuav xav tias Zam ntxuav plig yog tus neeg coj nruj ua rau sawv daws ntshai, thiab ua cas nws thiaj yog peb tus kwv luag nyob hauv lub caij Tos Huab Tais no. Pom tias thaum cov Fas Lis Xais thiab cov Xas Dus Kais tuaj ntsib Zam, Zam ua tawv tawv rau lawv tias ‘nej txhob xav tias nej zoo txhij lawm, nej kav tsij txi txiv tsim nyog tus neeg hloov siab.’ Zam lub suab no yog txoj kev nyiam lub suab nyiav xws li leej txiv lub suab quaj thaum pom leej tub rov txov nws txoj siab.

Vaj Qhia tig los ntuas sawv daws tias ‘lub siab nkhaus’ yog qhov txaus ntshai tshaj lwm yam vim nws muaj peev xwm rhuav tau qhov tseeb ntshiab tshaj plaws. Yog li mas tus ntxuav plig Zam thiab Huab Tais Yes Xus thiaj ua nruj rau cov neeg coj lub siab nkhaus zoo nraum daim tawv, cov neeg muab hlob saib tsis tau luag los yog cov neeg tsis tu siab rau kev txhaum thiab ntsia tsis pom nws lub zog me, thiab cov neeg tsuas ntsia lwm tus qhov tsis zoo nws tsis pom nws qhov phem.

Vim li hais los no, tus neeg muaj cuab kav thiaj yog tus nqes saum lub taw txheem los raus tus kheej rau hauv tus dej hloov siab tshiab.

Vaj Qhia ntuas ntxiv tias peb yuav tau soj ntsuam txog peb tus yam ntxwv thiab tus cuj pwm tias puas zoo li cov Fas Lis Xais hauv lub Moo Zoo. Qee zaus peb xav tias peb zoo dua lwm tus, peb muaj ntau yam nyob hauv peb xib teg, los yog peb tsis thas yuav thov dab tsi ntawm Tswv Ntuj, ntawm peb cov kwv tij nkauj muam.

“Caij Tos Huab Tais yog lub zim txwv cia rau peb hle daim tawv npog ntsej muag pov tseg thiab tig los nrog cov neeg tsis muab hlob sawv ua ib leej ua ke, mus lees peb lub txim thiab thov Tswv Ntuj zam txim rau peb, mus thov txim ntawm Tswv Ntuj thiab thov kom tus neeg peb tau ua tsis zoo rau, kom nws zam pub rau peb.”

Thaum peb thov Tswv Ntuj zam txim, peb yuav tau pib dua ib lub neej tshiab. Vaj Qhia muab siab rau lo lus tias “Tsuas muaj tib txog kev xwb, yog txoj kev tsis muab hlob. Txoj kev no thiaj yuav coj tau peb mus cuag txoj kev zam lub txim thiab ntxuav kom huv. Kawg yog Huab Tais Yes Xus thiaj yog tus Cawm Seej nqes los txhiv peb hauv lub neej txom nyem, quaj ntsuag, loj dua lwm yam mas yog peb lub siab vam txog kev sawv rov los, kev zam txim txhaum thiab kev cawm.

Thov kom peb nco cia tias ‘nyob hauv Huab Tais Yes Xus, peb muaj peev xwm pib dua lub neej tshiab.’

Huab Tais Yes Xus tseem tos peb thiab tsis ceeb laj rau peb. Lub caij Tos Huab Tais no tau pub lub zim txwv zoo rau peb hloov siab tshiab tig los nrhiav peb tus Huab Tais.

Peb thov niam Mab Liab pab peb kom tau ntsib peb tus Huab Tais thiab ntsib peb cov kwv tij cov nkauj muam nyob hauv txoj kev tsis muab hlob no thiab mog.”

Vam txog: https://www.vaticannews.va/en/pope/news/2022-12/pope-at-angelus-with-jesus-we-can-always-begin-anew.html

Tus txhais: Txawj Tsav M. Lauj