NYOB HAUV YES XUS, YUAV TSIS LIG RAU PEB

Vaj Qhia Fas Ntshis Kus ua tswv cuab coj lub txoos ua Thaj Txi Ntuj nyob hauv Hnub Chiv Nqaum Nplooj xyoo no, ces Vaj Qhia ntuas kom sawv daws thov Tswv Ntuj kev zam nyob hauv txoj kev taug mus cuag caij Hla yuav tuaj txog ze ze no, thiab Vaj Qhia nthuas tias Leej Pleev dauv muag ntsia lub ntiaj teb muaj peb tej teeb meem thiab peb kev txom nyem niaj hnub no mas Huab Tais Yes Xus tsis ceeb laj tsa ncauj thov Leej Txiv kev zam rau peb thiab hais rau Leej Txiv tias peb tsis paub tias peb tab tom ua dab tsi.

Vaj Qhia nthuav Ntawv Moo Zoo hauv Hnub Chiv Nqaum Nplooj tias niaj hnub no Tswv Ntuj tseem tos ntsoov peb, tsis tau lig rau peb rov tig los pib dua tshiab nyob hauv Tswv Ntuj kev khuv leej.

Vaj Qhia pom tias thaum Huab Tais Yes Xus raug dai saum Ntoo Cuam, mas Huab Tais Yes Xus tau hais ib lo lus txawv tsis zoo xws li tsoom sid hais rau Huab Tais Yes Xus tias ‘Koj rov cawm koj mas!’

Yog li Vaj Qhia thiaj nthuav tias Tswv Ntuj txoj kev xav tsis zoo li tib neeg kev xav; tib neeg saib tus kheej tseem ceeb dua lwm tus, tib neeg yuav tsum pab tus kheej tso mam pab lwm tus, tab sis Tswv Ntuj saib lwm tus tseem ceeb dua thiab yeem txo tus kheej kom tau pab lwm tus. Li ntawd, Huab Tais Yes Xus thiaj ua lwm yam, yog thov Ntuj zam rau cov neeg thuam nws txawm tias thaum nws ib ce raug mob hnyav tshaj plaws tias ‘Txiv, koj zam rau lawv. Lawv tsis paub tias lawv ua dab tsi.’

Vaj Qhia hais rau sawv daws tias “yog peb tab tom raug mob xws li Huab Tais Yes Xus, mas ntshai peb yuav quaj qw thiab cem cov neeg ua phem rau peb. Peb tsis muaj peev xwm yuav zam rau luag xws li Huab Tais Yes Xus.”

Huab Tais Yes Xus tus piv txwv zam rau cov neeg hiam nws thiab muab lub txim tuag no rau nws, yog tsom txog Tswv Ntuj lub siab nyiam peb sawv daws ntag. Thaum peb ua rau Tswv Ntuj tu siab, Tswv Ntuj tsis npau taws rau peb, Tswv Ntuj zam rau peb. Peb yuav ntsia Huab Tais Yes Xus raug ntsia saum Ntoo Cuam, peb yuav pom Huab Tais Yes Xus tab tom ntsia peb yam hlub tshua thiab nkag siab peb. Peb yuav pom tias tsis muaj leej twg yuav nyiam peb tas npaum li ntawd. Peb yuav tsa ncauj hais tias ‘Huab Tais Yes Xus, kuv ua koj tsaug vim koj nyiam kuv thiab zam lub txim rau kuv tas mus li. Txawm tias thaum kuv tsis nyiam thiab tsis rov zam rau kuv, los koj twb txawm nyiam thiab zam rau kuv.’

Peb yuav nco txog cov neeg tau ua tsis zoo rau peb, tau ua rau peb tu siab, chim siab, npau taws, los cov neeg tsis nkag siab txog peb. Peb nco ntxog lawv thiab zam rau lawv.

Tswv Ntuj ntsia sawv daws yog cov me nyuam Tswv Ntuj nyiam sib npaum, nws zam rau sawv daws, Tswv Ntuj tsis cais tias tus me nyuam no phem hos tus no zoo, Tswv Ntuj tsis hais tias tus no yog kuv tus phooj ywg hos tus no yog kuv tus yeeb ncuab.

Nyob hauv Ntawv Moo Zoo mas Huab Tais Yes Xus hais ntau zaus kom Tswv Ntuj zam rau cov muab nws ntsia saum Ntoo Cuam. Tsis muaj ib zaug twg Huab Tais Yes Xus yuav thov kom Tswv Ntuj rau txim rau cov hiam nws. Huab Tais Yes Xus tsis ceeb laj zam txim rau lawv.

Yog li mas peb sawv daws yuav tsis txhob ceeb laj tshaj Tswv Ntuj txoj kev zam no rau lwm tus mog.

Cov neeg nyob ntawd ntsia Huab Tais Yes Xus raug ntsia saum Ntoo Cuam, lawv yeej tuav xam ua ntej tias yuav ntes thiab muab Huab Tais Yes Xus tua zoo li no, tab sis Huab Tais Yes Xus thov kev ncaj rau lawv, Huab Tais Yes Xus thiaj hais tias ‘lawv tsis paub tias lawv ua dab tsi.’

Nyob hauv peb los Huab Tais Yes Xus kuj ua zoo li ntawd. Huab Tais Yes Xus tsa nws ua tus txheem peb thiab pab peb tawm tsam kev txhaum.

Yog thaum peb tig nrhiav kev siv dag zog tsim kev kub ntxhov, mas yog peb tab tom tsis paub txog Tswv Ntuj uas yog peb Leej Txiv, thiab yog peb tab tom tsis paub txog lwm tus uas yog peb cov kwv cov muam. Yog peb tab tom tsis paub tias ua cas peb thiaj yug los nyob ntiaj teb no.

Peb pom yam no nyob hauv tsov rog, yog li Leej Pleev thiaj rov raug ntsia ib lwm nyob saum Ntoo Cuam.

Leej Pleev raug dai saum Ntoo Cuam zaum no yog nyob hauv leej niad kev tu siab vim lawv cov me nyuam thiab lawv tus txiv raug tua tuag yam tsis ncaj ncees. Leej Pleev raug dai saum Ntoo Cuam zaum no yog nyob hauv cov tawg rog ua neeg thoj nam. Leej Pleev raug dai saum Ntoo Cuam zaum no yog nyob hauv cov neeg laus raug tso kom lawv tuag yam ua ntsuag tsis muaj leej twg pom, nyob hauv cov hluas ntsia tsis pom lawv lub neej yav tom ntej, yog nyob hauv cov peeb zeej raug xa rov mus ntaus rog nrog lawv cov kwv tij.

Vaj Qhia ntuas sawv daws tias tsuas muaj tib tug xwb thiaj tau raws li nws thov thaum Huab Tais Yes Xus nyob saum Ntoo Cuam. Tus ntawd yog tus tub sab nyob ntawm Huab Tais Yes Xus ib sab uas hais rau Huab Tais Yes Xus tias ‘Yes Xus, koj nco txog kuv mog.’

Tus tub sab no nws zoo siab lees Huab Tais Yes Xus ua Tswv Ntuj ua ntej nws txoj sia yuav tu. Yog vim li no mas nws thiaj tau pib lub neej tshiab yog nrog Huab Tais Yes Xus nyob hauv lub Nras Lom Zem.

Yam no yog Tswv Ntuj kev zam lub hwj huam pub rau tus neeg thov. Tus tub sab no txoj kev tuag thiaj yog thawj tus txheej txheem hauv kev tsa ib tug neeg tuag ua cov Ntshiab.

Li ntawd, nyob hauv lub Lis Piam Ntshiab no, Vaj Qhia thiaj ntuas sawv daws kom coj nraim lo lus tias Tswv Ntuj yuav zam peb txhua yam txhaum, Tswv Ntuj yuav pub tus choj rau peb hla tej kwj ha, Tswv Ntuj yuav hloov peb kev tu siab ua kev lom zem. Nyob hauv Huab Tais Yes Xus, yuav muaj ib qhov chaw rau peb nyob. Nyob hauv Huab Tais Yes Xus, yuav tsis muaj hnub kawg. Nyob hauv Huab Tais Yes Xus yuav tsis lig dhau rau peb.