PEB TSUM UA KOM COV TXIAJ NTSIM TXI TXIV

Tim 15 lub 11 hlis 2020 no yog Hnub Chiv hauv Lis Piam 33 Caij Nruab Xyoos, Vaj Qhia Fas Ntshis Kus nthuav tias Tswv Ntuj pub lub txiaj ntsim rau peb coj los tsim koob hmoov ua qhov zoo.

Hnub Chiv no yog Lis Piam xaus hauv xyoo no lawm, zaj nyeem hauv Ntawv Moo Zoo yog Huab Tais Yes Xus zaj paj lug lub nras nyiaj raws li Mas Tais Ntawv Moo Zoo. Zaj no yog ib zaj paj lug Huab Tais Yes Xus hais qhuab qhia sawv daws ua ntej nws yuav tuag thiab sawv rov los.

Zaj paj lug hais txog 3 tus tub txib tau txais tus tswv li nras nyiaj ntau raws li lawv lub peev xwm.

Vaj Qhia nthuav tias Tswv Ntuj pub li ntawd rau peb sawv daws. Huab Tais Tswv Ntuj paub peb zoo. Huab Tais Tswv Ntuj paub tias peb sib txawv thiab Huab Tais Tswv Ntuj tsis xav kom peb ntsib xwv txheej ntawm lwm tus, li ntawd nws thiaj muab rau peb raws peb lub peev xwm.

Tom qab tus tswv rov los txog, nws nrog 3 tug tub txib txheeb nws cov nyiaj. Ob tug ua ntej hais tias nkawd coj cov nyiaj mus ntxeev ces tau paj ntxiv los ib npaug, ces nkawd thiaj tau lo lus qhuas ntawm tus tswv. Tus tim peb mas nws tsis coj mus ntxeev kom tawg paj, nws coj ib nras nyiaj ntawd mus faus cia xwb, nws thiaj raug tus tswv cem thiab ntiab rau nraum zoov.

Vaj Qhia nthuav tias “Zaj paj lug no yog ntuas sawv daws, tshwj xeeb tshaj mas yog peb cov neeg ntseeg. Peb sawv daws muaj peev xwm sib txawv, thiab peb tau txais Ntuj txiaj ntsim sib txawv, tab sis cov txiaj ntsim ntawd yog kom peb coj los ua cov hauj lwm zoo pab luag tej thiab tsob hwb Tswv Ntuj.”

Vaj Qhia hais ntxiv tias “Yog nej ntsia ib ncig ntawm nej, mas nej yuav pom cov neeg quaj ntsuag, cov neeg tshaib nqhis coob li coob. Peb txhob tig ntsej muag khiav lawv, tiam sis peb yuav cev tes mus pab lawv: Lawv yog Leej Pleev.”

“Cov me nyuad! Huab Tais Yes Xus qhia kom peb nrog cov neeg txom nyem tham. Huab Tais Yes Xus nqes los kom tau cawm cov neeg pluag.”

“Txiv xav kom nej ntsia niam Mab Liab ua piv txwv. Niam Mab Liab tau txais lub txiaj ntsim loj tas nrho, yog txais Huab Tais Yes Xus, tab sis niam Mab Liab tsis cheem Huab Tais Yes Xus ua nws ntiag tug. Niam Mab Liab faib Huab Tais Yes Xus rau ntiaj teb neeg sawv daws. Li ntawd, txiv xav kom peb yoog niam Mab Liab tus piv txwv mog. Txhob khaws lub txiaj ntsim cia, tiam sis yuav faib rau lwm tus nyob hauv kev pab cov neeg txom nyem.”