PEB YUAV MUAB IB LUB SIJ HAWM LOS XAV TIAS PEB PUAS COJ LUB NEEJ NYOB NRAIM HAUV TXOJ KEV NTSEEG

Vaj Qhia Fas Ntshis Kus rov qab qhia kev ntseeg raws cov lus Paj Lug sau tuaj rau cov ntseeg hauv Nkas Las Tias; yog cov lus ntuas kom lawv txhob yuam kev hauv txoj kev ntseeg txog Leej Pleev. Cov lus no kuj yog ib co lus rau peb rov nug peb tus kheej tias peb ua neej raws txoj kev ntseeg li cas, thiab kom peb tab siab tias kev nyiam Leej Pleev, kev raug dai thiab kev sawv rov los yog qhov nruab nrab hauv peb kev ua neej txhua hnub.

Hnub tim 1 lub 9 hli ntuj xyoo 2021 no, Vaj Qhia Fas Ntshis Kus tau txais tsoom ntseeg sawv daws tuaj sib sau nyob hauv chav tsev Paj Lug 6 hauv Vas Tis Kas. Hnub no Vaj Qhia tau muab tus Hauv Paus Xa Lus Paj Lug tsab ntawv sau rau cov ntseeg hauv Nkas Las Tias los nthuav ntuas sawv daws. Paj Lug twv cov ntseeg hauv Nkas Las Tias tias lawv tab tom yuam kev loj thiab yog lawv tsis daws tej yuam kev ntawd mas lub txiaj ntsim lawv tau txais yuav ploj mus.

Paj Lug ntuas lawv tias lub Moo Zoo lawv tau txais yog hais txog Tswv Ntuj kev nyiam nyob hauv Huab Tais Yes Xus txoj kev tuag thiab sawv rov los, thiab lub Moo Zoo yog hais txog cov txiaj ntsim lawv yuav tau txais.

Vaj Qhia hais tias Paj Lug cov ntsiab lus mas yog yuam kom cov ntseeg hauv Nkas Las Tias txav kom deb rooj ntxiab hais txog kev coj raws txoj cai, tab sis tsis nco qab txog Leej Pleev txoj kev nyiam neeg, Leej Pleev kev tuag thiab sawv rov los uas yog yam cov ntseeg yuav saib ua qhov nruab nrab nyob hauv lawv lub neej.

Cov ntseeg hauv Nkas Las Tias nkag siab zoo txog Paj Lug cov lus ntuas, vim lawv tau pom Leej Ntuj Plig Ntshiab cov hauj lwm nyob hauv lawv. Tiam sis lawv muab cov hauj lwm lawv tau ua saib loj dua, mas Paj Lug thiaj hais tias tej ntawd yog ‘kev ruam’.

Vaj Qhia hais ntxiv tias muaj tej zaum kuj muaj tej tus neeg tuaj hais kom yus mus coj txoj kev teev hawm nruj los yog rov rau txim rau yus lub cev, tej no yog feeb yus kom deb ntawm kev twj lij hauv Leej Ntuj Plig uas Leej Pleev pub rau yus.

Vaj Qhia xav kom cov ntseeg sawv daws tuaj sib sau zaum no coj mus xav tias lawv txoj kev ntseeg yog nyob qhov twg, thiab lawv coj lub neej zoo li cas, lawv puas saib Leej Pleev txoj kev nyiam ua qhov nruab nrab nyob hauv lawv.

Leej Pleev kev nyiam yog lub cuab tam cawm sawv daws, sawv daws yuav txuag lub cuab tam no cia.

Ua ntej yuav xaus rooj sib sau zaum no, Vaj Qhia tau hais ib lo lus ntuas sawv daws li no tias “Dab phem niaj hnub ntxias peb kom khiav deb ntawm Tswv Ntuj, tsis kav Huab Tais Yes Xus txawm niaj hnub pub nws lub txiaj ntsim rau peb tas mus li. Huab Tais Yes Xus tsis tso peb pov tseg, nws nrog nraim peb nyob hauv nws txoj kev nyiam thiab hlub tshua.”