Pheej xeeb rau qhov tseem ceeb

Hnub Chiv lub lis piam 12 caij Nyob Nruab Xyoo, Vaj Qhia Fas Ntshis Kus coj qhia cov neeg siab ncaj kom muab siab rau yam tseem ceeb hauv lub neej, tsis yog muab tej yam khuam yus kev saib ua qhov loj.

Ua ntej yuav coj sawv daws teev Ntuj raws zaj Tswv Ntuj tus Tshiab xa xov hauv Hnub Chiv tim 25 lub 6 hli, Vaj Qhia Fas Ntshis Kus nthuav Ntawv Moo Zoo rau sawv daws tias Huab Tais Yes Xus ntuas sawv daws kom pheej xeeb rau qhov tseem ceeb ces Tswv Ntuj yuav saib xyuas koj. Yam no yog lub plawv hauv Vaj Qhia cov lus hnub no.

Vaj Qhia pib nthuav rau sawv daws tias lub Moo Zoo hauv hnub no peb hnov Huab Tais Yes Xus hais rau cov thwj tim txog peb lwm tias ‘nej txhob ntshai’. Ua ntej ntawd mas Huab Tais Yes Xus tau hais txog tej xwm phem lawv yuav ntsib thaum lawv tawm mus tshaj lub Moo Zoo.

Vaj Qhia pom tias nyob hauv lub zim txwv no, tseem muaj li Huab Tais Yes Xus cov lus tiag; txawm tias lub Koom Txoos tau txais kev xyiv faj loj, tiam sis kev iab hiam cov ua Ntuj kev cai kuj hnyav kawg thiab. Zoo li tej xwm no sib cov nyom, kev tshaj txog Tswv Ntuj lub Ceeb Tsheej yog cov xov hais txog kev thaj yeeb thiab kev ncaj ncees nyob hauv kev sib hlub thiab kev sib zam, tab sis kuj tseem pom kev tawm tsam, kev kub ntxhov, thiab kev sib ntaus sib tua.

Yog vim li ntawd, Huab Tais Yes Xus thiaj hais tias ‘txhob ntshai’. Huab Tais Yes Xus hais li tsis yog tias txhua tsav yam hauv ntiaj teb no yuav zoo, tiam sis yog vim peb muaj nqes tshaj rau Huab Tais Leej Txiv thiab tsis muaj ib yam zoo yuav ploj tau.

Huab Tais Yes Xus hais tias yam peb yuav ntshai, mas yog ‘muab ‘txoj sia pov tseg’. Yog li Vaj Qhia thiaj ntuas sawv daws tias “Peb txhob ntshai txom nyem vim luag tej nkag siab peb yuam kev thiab thuam peb, los yog vim peb poob suab npe thiab tsis muaj noj tsis muaj hnav vim peb pheej xeeb rau lub Moo Zoo, tiam sis peb yuav tau ntshai kev plam txoj sia vim peb tso lub neej mus raws tej yam me me tsis tseem ceeb rau peb txoj sia.”

Vaj Qhia hais ntxiv tias lo lus ntuas no yog hais rau peb txhua tus ib tug dhau ib tug. Niaj hnub no ib tug neeg nws yuav raug luag thuam los yog ntxub ntxaug yog nws tsis ua raws cov qauv neeg muaj xom leem. Vaj Qhia hais li ntawd, vim yog lawv muab tej yam ntawd los saib hlob dua neeg kev sib txheeb.

Vaj Qhia hais piv txwv kom sawv daws to taub nws lo lus no zoo tuaj tias “Cov yog niam yog txiv lawv ua hauj lwm nrhiav yug lub cuab, tab sis lawv yuav ua hauj lwm tas lawv lub neej mus tsis tau; lawv kuj xav tau lub sij hawm nrog lawv cov me nyuam nyob thiab. Cov xaiv lub neej ua Leej Choj los Leej Phauj, lawv tsum mob siab rau lawv lub luag hauj lwm tsob hwb, tab sis lawv kuj yuav tsis nco qee lub sij hawm cia tau nrog Huab Tais Yes Xus tham, tsis li ntawd lawv yuav poob rau hauv lub ntuj yeeb ceeb thiab lawv yuav nco tsis tau tias lawv yog leej twg lawm. Cov tseem ua tub hluas ntxhais hluas, lawv mob siab rau pua txhiab yam; tsis hais kev kawm, kev ua si, kev txaus siab rau ntau yam, tej xov tooj, lub neej hauv kab sab, tiam sis lawv tsum tau ntsib lwm tus neeg thiab ua kom lawv txoj npau suav tsheej xeeb tuaj, tsis siv lub sij hawm ntau rau tej yam tsis muaj qab hau rau lawv lub neej.”

Vaj Qhia lees tias txhua yam no ua rau neeg tsum tso tej yam pov tseg, tiam sis yog vim muab tso pov tseg mas neeg thiaj yuav tsis yuam kev.

Yog kom peb pheej xeeb rau yam tseem ceeb, peb yuav tsum tau them tus nqe; yog txhob tso yus mus raws ntiaj teb txoj kev ntxias xws li tus ntses lo zeb tsis pub dej kuav tau nws mus.

Vaj Qhia nthuav tias yam Huab Tais Yes Xus hais tias yog yam tseem ceeb mas yog ‘txhob muab kev ua zoo coj mus pauv tej yam tsis muaj nqes tiag’.

Vaj Qhia kom sawv daws muab ua tib zoo xav saib yam yus ntshai yog dab tsi; puas yog ntshai tsam yus tsis nyiam ib yam dab tsi li, puas yog ntshai tsam yus mus tsis txog yus lub hom phiaj, puas yog yus ntshai tsam luag tej txiav txim rau yus, puas yog yus ntshai tsam ua tsis xis Tswv Ntuj siab, puas yog yus ntshai tsam yus tsis muab Huab Tais Yes Xus lub Moo Zoo saib ua qhov loj ua ntej?

Vaj Qhia thov niam Mab Liab pub nws kev thoob tsib thiab lub peev xwm rau peb kom peb txawj xaiv tau qhov tseem ceeb thiab muaj nqes rau peb.