QHIB KOJ LUB QHOV MUAG NRHIAV TSWV NTUJ NYOB HAUV KOJ

Vaj Qhia nqua hu kom peb txuag peb lub qhov muag thiab lub siab kom txhob muaj chaw xyeej thiab txhob kaw peb lub siab, tab sis peb yuav qhib siab txais yam xav tsis txog nyob hauv Tswv Ntuj thiab xam nrhiav Tswv Ntuj nyob hauv peb.

Ntawv Moo Zoo hauv Lis Piam 14 Caij Nruab Xyoos mas yog Mas Kos sau piav txog Huab Tais Yes Xus mus tshaj lub Moo Zoo nyob hauv Nas Xas Les, mas cov neeg hauv Nas Xas Les ua xyem xyav txog Yes Xus kev thoob tsib. Huab Tais Yes Xus thiaj hais tias “Ib tug yaj saub, tsuas yog nyob hauv nws lub zos hlob, hauv nws cov txheeb ze thiab nws tsev neeg, mas luag thiaj saib nws tsis muaj nqis.” (MK6: 4)

Vaj Qhia nthuav tias nyob hauv zaj no qhia peb tias cov neeg hauv Nas Xas Les lawv xav tias lawv paub txog Huab Tais Yes Xus, tab sis tseeb tiag mas lawv tsis paub li. Vaj Qhia hais tias lo lus ‘paub’ thiab lo lus ‘paub txog’ sib txawv. Ob lo lus no yog ob lo lus peb tsum ras txog kom zoo vim muaj ntau zaus peb xav tias peb paub txhua yam hais txog ib tus neeg twg. Tiam sis tiag tiag mas peb txoj kev paub ntawd tsuas yog paub me ntsis xwb thiab peb yuav qhib lub tswv yim los kawm kom paub txog tus neeg ntawd tus yam ntxwv.

Vaj Qhia hais ntxiv tias cov neeg hauv Nas Xas Les paub Huab Tais Yes Xus tau 30 xyoo, tab sis lawv tsis paub txog tias Huab Tais Yes Xus yog leej twg thiab lawv tsis xav hais lus zoo txog Huab Tais Yes Xus.

Vaj Qhia ntuas tias yog peb tso peb tus kheej rau peb tus cuj pwm xav tsis thoob los looj koov peb mas peb lub tswv yim yuav coj peb mus rau kev xav tsis zoo rau lwm tus. Peb xav tias peb paub Huab Tais Yes Xus lawm, yuav ua rau peb txoj kev ntseeg qaug tau. Li ntawd, Vaj Qhia thiaj ntuas ntxiv tias “Yog peb kaw lub siab tuag nthi rau Huab Tais Yes Xus, yog peb ua xyem xyav txog tej yam hwj huam Huab Tais Yes Xus ua, ces peb txoj kev ntseeg yuav qhuav mus.”

Vaj Qhia rov hais cov zaj hauv Mas Kos Ntawv Moo Zoo ntxiv tias tos cov neeg hauv Nas Xas Les tsis paub txog Huab Tais Yes Xus vim lawv tsis lees tias Huab Tais Yes Xus yug ntawm Tswv Ntuj los. Lawv tsis xav tias Tswv Ntuj lub hwj chim loj yuav tshwm nyob hauv ib tsev neeg tsis muaj hwj chim.

Zaj no qhia peb kom xyuam xim tsam peb poob rau lub tswv yim txoj kev ntxias peb. Peb yuav nco tias Tswv Ntuj nyiam ua neeg me, Tswv Ntuj lub siab hlub mos nyoos, Tswv Ntuj zais ntshis ntawm peb ob lub qhov muag, Tswv Ntuj nyob ze peb, Tswv Ntuj nyob nrog nraim peb, nyob hauv peb txoj sia.

Vim Tswv Ntuj yog ib tug tseem phooj ywg, Tswv Ntuj nyob hauv peb mas Tswv Ntuj thiaj nkag siab peb, zam txhaum rau peb thiab nyiam peb tshaj tas txhua yam.

Kawg no Vaj Qhia kom peb thov Ntuj pab kom peb ua ib tus neeg zoo xws li niam Mab Liab thiab thov kom Tswv Ntuj qhib peb ob lub qhov muag kom pom Huab Tais Tswv Ntuj nyob hauv peb txoj sia.