QHIB SIAB TXAIS TSWV NTUJ LOS NYOB NRUAB NRAB HAUV PEB

Hnub Chiv thawj lis piam hauv xyoo 2022 no, Vaj Qhia Fas Ntshis Kus tau txhawb siab sawv daws kom qhib siab txais Huab Tais Yes Xus los nyob hauv lub neej.

Hnub tim 2 lub 1 hlis xyoo no yog lis piam 2 caij Yes Xus Yug mas Vaj Qhia thiaj rov xav kom sawv daws xeev txog lub ntsiab hauv caij Yes Xus Yug raws li cov Xas Mas Lias tej lus thov Ntuj tias “Leej Lo Lus xeeb ua lub cev thiab Leej Lo Lus nyob nruab nrab hauv peb.”

Vaj Qhia hais tias lub caij ua ntej Yes Xus yug los ua neeg, ‘Leej Lo Lus’ thiab ‘neeg cev nqaij’ nyias nyob nyias ib ceg kaum. ‘Leej Lo Lus’ yog Huab Tais Yes Xus, yog Leej Txiv Lo Lus nyob mus ib txhis, ib txwm nyob txij lub hauv paus los thiab koom nrog Tswv Ntuj tsim lub sim ceeb; hos ‘cev nqaij’ yog yam Tswv Ntuj ob txhais tes txua tawm los, yog yam tsis muaj zog, yog yam txawj lwj txawj ploj.

Muaj ntau yam sib txawv thiab nyias nyob rau nyias ib ceg kaum xws li lub ntuj thiab ntiaj teb, yam nyob mus li thiab yam txawj xaus, ntsuj plig thiab tus qauv, qhov pom kev thiab qhov tsaus ntuj.

Txawm yuav sib txawv li ntawd, los Tswv Ntuj Leej Tub tau yug los kom ob yam nyias nyob nyias ib sab ntuj ntawd tau kev rov los nyob ua ib ke. Vim tias Huab Tais Yes Xus yog qhov pom kev kaj rau lub ntiaj teb. Tswv Ntuj yog qhov pom kev, hos nyob hauv tib neeg muaj kev tsaus ntuj. Zim ntawv no, qhov pom kev thiab qhov tsaus ntuj tau los sib cuag lawm yog nyob hauv Huab Tais Yes Xus.

Peb pom tej no tau nyob hauv lub Moo Zoo. Thaum Tswv Ntuj tim ntsej tim muag nrog neeg kev qaug zog, Tswv Ntuj tsis thim rov qab, tsis tso neeg pom tseg rau hauv qhov tsaus ntuj tiam sis Tswv Ntuj rhais ruam los nyob hauv qhov tsaus ntuj nti ntawd.

Vaj Qhia nthuas tias Tswv Ntuj ua hauj lwm yog zoo li ntawd: yog los nyob nruab nrab hauv sawv daws; Tswv Ntuj tsis txwv nws txawm tias peb tsis tsim nyog txais Tswv Ntuj, Tswv Ntuj tsis qaug zog rau txoj kev nrhiav peb txawm tias peb tsis kam lees paub Tswv Ntuj, Tswv Ntuj txaus siab los nyob hauv peb txawm tias peb tsis kam txais nws.

Tej zaum peb yuav xav tias peb tsis tseem ceeb txaus rau Tswv Ntuj ces peb thiaj txav kom deb ntawm Tswv Ntuj, tab sis lub caij Yes Xus Yug qhia peb kom xav thiab ntsia xws li Tswv Ntuj tau xav thiab ntsia pom peb.

Tswv Ntuj xav kom peb nkag mus nyob ze nws Leej Tub, xav kom peb nco hmo tus me nyuam Yes Xus pw hauv lub dab nyuj nyob Npes Les Hes.

Yog vim li no Vaj Qhia thiaj xav kom cov ntseeg sawv daws qhib ib kem tsev me me rau hauv nruab siab tos txais Huab Tais Yes Xus los so rau hauv, los nyob nruab nrab hauv peb lub neej, los mloog peb piav peb tej kev zoo siab kev txom nyem.