SAIB KOM TSEEB THIAB HAIS LUS ZOO

Vaj Qhia ntuas sawv daws kom tig xav saib thaum peb ntsia peb tus kheej thiab ntsia lwm tus yog ntsia zoo li cas.

Hnub Chiv tim 27 lub 2 hlis 2022, Vaj Qhia Fas Ntshis Kus nthuav Ntawv Moo Zoo lub lis piam 8 caij Nyob Nruab Xyoos rau tsoom ntseeg mloog ua ntej yuav coj sawv daws thov Ntuj. Ntawv Moo Zoo yog hais txog thaum Huab Tais Yes Xus hais zaj paj lug tus neeg tsis pom tus nqaj hauv nws qhov muag yuav mus muab tus quav nplej hauv lwm tus lub qhov muag. (LK 6: 42)

Zaj no yog Huab Tais Yes Xus qhia tias peb tsuas ntsia pom lwm tus qhov tsis zoo xwb hos peb qhov tsis zoo mas peb ntsia tsis pom, xws li peb ntsia tsis pom yam nyob hauv peb qhov muag. Yog li Vaj Qhia thiaj ntuas tias muaj ntau zaus peb nrhiav lus kom tau cem lwm tus, peb nrhiav cov lus zoo rau peb. Ces peb thiaj tsuas zoo li tus dig muag ces peb yuav coj lwm tus kev los yog ua xib hwb qhia lwm tus tsis tau.

‘Huab Tais Yes Xus xav qhia kom peb txhob maj ntsia lwm tus, tab sis peb yuav xub ntsia peb ua ntej tias muaj yam twg peb tseem zoo tsis txaus.”

Vaj Qhia ntuas ntxiv tias peb yuav tsum ntsia kom pom yam tsis zoo hauv peb tso, peb thiaj mam ntsia pom lwm tus yam tsis zoo. Peb yuav lees tias peb tsis muaj zog txaus, ces lub qhov rooj khuv leej neeg yuav qhib rau peb. Thaum ntawd, peb yuav ntsiam lwm tus yam hlub tshua lawv, xws li Tswv Ntuj ntsia tias peb yog cov me nyuam yaus ua tej yam tsis yog.

“Tswv Ntuj tso siab rau neeg thiab zoo siab zam txim thaum neeg ua tsis yog. Tswv Ntuj xav kom peb ua xws li Tswv Ntuj tau ua rau peb: nrhiav qhov zoo hauv lwm tus, txhob nrhiav lawv qhov phem.”

Txuas mus, yog peb cov lus tawm hauv ncauj los. Huab Tais Yes Xus hais tias ‘yam uas lub ncauj hais tawm los yog phwj ntawm lub siab tuaj’ (LK 6: 45) txhais tias neeg lub siab xav li cas ces neeg lub ncauj hais li ntawd. Muaj tej zaug peb tsis nco qab xav tias thaum peb hais lus ntawd mas peb tau qhia peb tus yam ntxwv ua neeg zoo los neeg phem rau lwm tus pom. Peb lo lus muaj peev xwm tsim kev kub ntxhov rau peb cov kwv tij tau, peb lo lus ntse dua rab riam.

Hnub no, Vaj Qhia xav kom sawv daws tsuas hais cov lus sib hlub, cov lus sib nkag siab, cov lus sib hwm, cov lus sib txhawb siab. Cov lus no zoo dua tej lus lam tau lam hais kom luag saib tias yus yog neeg zoo. Vaj Qhia xav kom sawv daws ntsia ntsoov niam Mab Liab tus neeg tsis muab hlob, sawv daws thov niam Mab Liab pab kom sawv daws txawj ntxuav lawv lub qhov muag thiab lawv cov lus kom huv tuaj.