Thaum koj nyob hauv lub caij txom nyem, Tswv Ntuj nrog koj nyob

Vaj Qhia Fas Ntshis Kus ua tsaug Huab Tais Tswv Ntuj tus zoo li ib leej txi pab tuav rawv peb tes thaum peb qaug, thiab Vaj Qhia ntuas sawv daws kom tso siab rau Huab Tais Tswv Ntuj thiab ua txoj hauj lwm sib nyiam sib hlub thiab txoj hauj lwm vam khom. Tsis tas li ntawd, Vaj Qhia tseem ua tsaug sawv daws uas pab thov Ntuj rau nws thaum nws pw tom tsev kho mob thiab.

Vaj Qhia Fas Ntshis Kus mus phais plab txij hnub tim 7 txog hnub tim 16 nyob hauv lub tsev kho mob Nkes Mes Lis (Gemelli Hospital) hauv lub nroog Los Mas, ces Hnub Chiv lub Lis Piam tas los, Vaj Qhia thiaj tuaj nthuav Ntawv Moo Zoo rau sawv daws mloog tsis tau. Tab sis Hnub Chiv lub lis piam no Vaj Qhia zoo zog lawm, Vaj Qhia thiaj rov tuaj nthuav Ntawv Moo Zoo thiab coj sawv daws teev Ntuj raws zaj Tswv Ntuj tus Tshiab xa xov dua.

Ua ntej yuav teev Ntuj raws zaj Tswv Ntuj tus Tshiab xa xov, Vaj Qhia ua sawv daws tsaug rau qhov tias sawv daws muaj kev hlub, kev nyiam, hmov thiab tshua txog mas thiaj sib pab thov Ntuj rau Vaj Qhia thaum mus pw kho mob nyob hauv tsev kho mob tias “Ntiaj teb neeg kev sib npuab thiab leej neeg tus plig kev sib ze no tau pab thiab npij kuv ntau kawg nkaus. Ua nej sawv daws tsaug! Ua tsaug! Kuv ua nej tsaug tas kuv lub siab!”

Xyoo 2023 lub 6 hli tim 18 yog ncaj rau Hnub Chiv lub lis piam 11 caij Nyob Nruab Xyoo, lub Moo Zoo yog cov zaj nyob hauv Mas Tais phau ntawv (MT 9: 36- 10; 8) hais txog Huab Tais Yes Xus xa cov Hauv Paus Xa Lus mus tshaj txog Tswv Ntuj lub Ceeb Tsheej. Vaj Qhia pom tias ‘Tswv Ntuj kev nyiam lub zog tuaj txog ze lawm’ thiab lub zog ntawd nyob hauv peb yog ‘qhov cheem tsum tiag hauv txoj sia’.

“Yog Tswv Ntuj tus tswv ntuj tswv teb nyob ze peb, mas hais tau tias peb tsis nyob ib leeg twm zeej hauv lub qab ntuj no, thiab thaum peb poob hauv kev txom nyem peb kev ntseeg yuav tsis tsuag.” Vaj Qhia hais rau sawv daws, thiab nthuav ntxiv tias Tswv Ntuj yog ib leej txi paub nws cov me nyuam thiab hlub nws cov me nyuam. Tswv Ntuj yog Huab Tais, nws nyob ze ze peb.

Thaum peb taug txoj kev ntxhab, ua kwj tob, thaum peb ntog thiab ua tiag sawv los taug txoj kev ntxiv mus, mas Tswv Ntuj nrog nraim peb. Thaum peb nyob hauv lub zwj ceeb qaug zog, peb yuav hnov thiab paub Tswv Ntuj ntau dua tuaj. Tswv Ntuj paub peb kev, nws nrog peb nyob, nws yog peb Leej Txiv.

Vaj Qhia xav kom tsoom ntseeg sawv daws cim qhov no cia hauv lub cim xeeb thaum lawv tawm mus tshaj txog Tswv Ntuj lub cheeb tsam.

“Tswv Ntuj lub cheem tsam yog thawj lo lus tshaj txog Tswv Ntuj txoj kev nyob: vim peb nyob ze Tswv Ntuj, peb thiaj muaj yeej kev ntshai, peb thiaj qhib tau peb los txais kev sib nyiam, peb thiaj loj taus nyob hauv qhov zoo thiab peb thiaj xav thiab muaj kev xyiv fab tshaj txog Tswv Ntuj.

Yog peb xav ua tus hauv paus tshaj Ntuj lus zoo, peb tsum ua xws li ib tug me nyuam yaus; yog cia Leej Txiv hloov peb siab thiab pub kev xyiv fab thiab kev thaj yeeb rau peb.”

Vaj Qhia taw txoj kev ua tus hauv paus tshaj Ntuj lus zoo rau sawv daws, thiab qhia ntxiv tias “Txoj hau kev yuav tshaj tias Tswv Ntuj nyob ze lawm, tsis yog yuav hais ntau lo lus, tiam sis yog tsum ua cov hauj lwm sib nyiam sib hlub thiab tsim kev vam khom nyob hauv Huab Tais lub npe kom ntau.

Lub plawv hauv kev tshaj Ntuj lus yog qhov no: ua tim khawv pub dawb, thiab tsob hwb sawv daws.”

Ua ntej yuav teev Ntuj, Vaj Qhia Fas Ntshis Kus ntuas sawv daws kom rov nug yus tias ‘kuv puas ntseeg thiab tso siab rau Tswv Ntuj, kuv puas mloog Tswv Ntuj Lo Lus thiab kuv puas mus txais lub Cim Ntshiab, kuv puas paub cog lub siab tawv rau hauv lwm tus thiab kuv puas nyob ze cov neeg txom nyem thiab cov raug tso nyob tib leeg ua twm zeej’.