THOV KEV THAJ YEEB LUB TSWV YIM LOS ROOS PEB

Vaj Qhia Fas Ntshis Kus hais tias txhua hnub mas peb yuav thov Ntuj tias “Huab Tais, thov koj pub kev thaj yeeb rau kuv, thov koj pub koj Leej Ntuj Plig Ntshiab rau kuv thiab yuad.” Thaum thov li no mas peb yuav txawj ua neeg me thiab nyiam tsim kev haum xeeb nyob hauv peb lub neej.

 Hnub Chiv tim 22 lub 5 hlis 2022 no, Vaj Qhia Fas Ntshis Kus nthuav Zam Ntawv Moo Zoo (Z 14: 23-29) hauv hnub no rau tsoom ntseeg mloog, yog thaum Huab Tais Yes Xus hais rau cov thwj tim tias kuv tso txoj kev thaj yeeb rau nej, yog kuv txoj kev thaj yeeb, kuv muab pub rau nej.

Vaj Qhia pom tias Huab Tais Yes Xus paub ntsoov hauv nws nruab siab tias hmo ntawd, Yus Das yuav ntxeev siab rau nws, Pob Zeb yuav tsis lees paub nws, cov thwj tim yuav khiav tso nws nyob tib leeg. Tab sis Huab Tais Yes Xus ua siab tus thiab tseem nyiam nws cov thwj tim. Nyob hauv lub sij hawm Huab Tais Yes Xus ntsib kev ntshai thiab lub siab mob cuag riam hlais, tsis kav Huab Tais Yes Xus tsis chim tsis npau taws, nws hais kom cov thwj tim nyob thaj yeeeb. Vaj Qhia thiaj ntuas tias “Koj yuav pub kev thaj yeeb rau lwm tus tau li cas, yog tias nyob hauv koj twb tsis muaj kev thaj yeeb.”

Vaj Qhia xav kom sawv daws ua neeg me, tsis zais siab, thiab qhib siab mloog lwm tus, mas thiaj yuav rhuav tau kev cov nyom thiab tsim kev sib haum xeeb tau. Tshwj xeeb mas yog peb tus yam ntxwv, tsis yog peb lo lus qab zib. Yog li Vaj Qhia thiaj ntuas ntxiv tias peb yog Yes Xus cov thwj tim, peb puas muaj lub siab hlub thiab ua siab ntev daws neeg kev sib cov nyom?

Vaj Qhia nthuav tias ‘kev thaj yeeb’ yog thawj lub paj tshab Tswv Ntuj pub rau peb raws li Huab Tais Yes Xus hais tias ‘kuv tsis pub txoj kev thaj yeeb xws li lub qab ntuj neeg pub.’ Txoj kev thaj yeeb Huab Tais Yes Xus pub rau peb, yog Leej Ntuj Plig Ntshiab, yog Huab Tais Yes Xus lub Tswv Yim.

Tswv Ntuj nrog peb nyob yog kev thaj yeeb lub zog, yog yam ua kom peb tsis ntxhov siab. Txoj kev thaj yeeb Huab Tais Yes Xus pub rau peb rov ntuas peb tias peb yog ib co kwv tij, peb tsis yog yeeb ncuab, yog Huab Tais Yes Xus ua tus pab kom peb txawj sib zam thiab pib dua lub neej tshiab nyob hauv kev thaj yeeb tus kwv tus muam.

Yog vim li ntawd, Vaj Qhia thiaj ntuas cov neeg ntseeg kom kub siab thov Leej Ntuj P lig Ntshiab tso kev thaj yeeb los rau saum sawv daws, tshwj xeeb yog thaum sawv daws ntxhov siab, chim siab los yog npau taws, mas tsim nyog peb yim thov Tswv Ntuj kev thaj yeeb.

“Peb yuav xyaum kom txawj thov Ntuj tias ‘Huab Tais, thov koj pub koj kev thaj yeeb rau kuv mas, thov koj tso koj Leej Ntuj Plig Ntshiab los nyob saum kuv mas.’ Thiab peb yuav thov tib yam li no rau cov neeg nyob ib puag ncig peb, cov peb tau ntsib nyob hauv peb lub neej, thiab cov thawj tswj lub teb chaws. Thov peb Leej Niam pab kom peb txais tau Leej Ntuj Plig Ntshiab los nyob hauv peb, mas peb thiaj yuav txawj tsim kev thaj yeeb.”