THOV KOM PEB LUAG NTXHI XWS LI TIM KHAWV VAJ QHIA ZAM PAJ LUG IB

Hnub tim 4 lub 9 hlis xyoo 2022 no Vaj Qhia Fas Ntshis Kus coj lub Txoos teev Ntuj tsa Vaj Qhia Zam Paj Lug Ib ua Tim Khawv. Vaj Qhia Zam Paj Lug Ib tau lub npe tias tus Vaj Qhia ua ntsej muag luag ntxhi.

Vaj Qhia Fas Ntshis Kus nthuauv Ntawv Moo Zoo ntu piav txog thaum Huab Tais Yes Xus hais tias cov yuav ua nws thwj tim mas lawv tsum nyiam Yes Xus dua lawv cov neeg txheeb ze, thiab lawv yuav tsum kwv lawv tus ntoo cuam nyob hauv lawv lub neej. Vaj Qhia pom tias Huab Tais Yes Xus cov lus qhia no tsis haum rau ntiaj teb lub tswv yim.

Tos Huab Tais Yes Xus hais zoo li ntawd vim tias nws tsis nrhiav txij ntsim hauv neeg kev vam thiab tsis xav ntxias neeg kom raws nws coob. Huab Tais Yes Xus xav tau cov neeg to taub txog nws los ua nws cov thwj tim xwb.

Cov pej xeem raws Huab Tais Yes Xus ntawd, muaj ntau mas lawv xav tsa Huab Tais Yes Xus ua tus coj lawv tawm tsam cov yeeb ncuab, xav cia Huab Tais Yes Xus ua tus sawv los daws lawv cov teeb meem kom lawv thiaj tau raws li lub siab ntshaw, yog lub tsim, hwj chim, thiab kom lawv rov tau cai ntawm lawv cov yeeb ncuab. Tej yam tsoom sid xav no tsis yog Huab Tais Yes Xus lub tswv yim, thiab yuav tsis yog yam uas cov thwj tim thiab lub Koom Txoos xav.

Vaj Qhia nthuav ntxiv tias Huab Tais Yes Xus vam kom cov thwj tim ntshaw txog kev sib nyiam. Kev raws Huab Tais Yes Xus qab tsis yog ua ib npoj neeg ua ke tiam sis yog nyias kwv nyias tus ntoo cuam: yog yus lub nras thiab lwm tus lub nras xws li Huab Tais Yes Xus tau ris sawv daws lub nras, tau muab nws txoj sia ua paj tshab rau peb thiab tau nyiam tau hlub peb.

Yog li cov yuav ua Huab Tais Yes Xus thwj tim thiaj tsum saib Huab Tais Yes Xus ua qhov tseem ceeb, kawm ntawm Huab Tais Yes Xus kom txawj nyiam lwm tus musk om txog qhov kawg. Vaj Qhia Paj Lug Ib tau hais ib lo lus tseg tias ‘peb yog lub hom phiaj ntawm Tswv Ntuj kev nyiam tsis muaj caij xaus.’ Kev nyiam tsis muaj caij xaus tsis yog tag rau hauv peb lub ntuj xwb, nws yuav ci ntsa nyob hauv peb mus li thiaj yuav ci ntsa nyob hauv hmo tsaus ntuj nti hauv peb txoj sia.

Vaj Qhia Fas Ntshis Kus rov piav txog Huab Tais Yes Xus kev nyiam tias thaum peb ntsia Huab Tais Yes Xus raug dai saum tus Ntoo Cuam mas peb pom tias Huab Tais Yes Xus tab tom hu peb los tawm tsam peb kev saib tus kheej hlob, kom peb tig los nyiam Tswv Ntuj thiab hlub lwm tus, txawm tias tus ntawd lub tswv yim yuav txawv peb lub, txawm tias nws yog peb tus yeeb ncaub los kuj xij, peb yuav tau nyiam nws hlub nws tib yam nkaus.

Kev nyiam, hlub lwm tus mas tej zaug peb yuav tau fi peb, tej zaug peb yuav poob nyob hauv kev ntsiag to, raug lwm tus nkag siab yuam kev, raug tso nyob ib leeg, raug tawm tsam, raug iab hiam. Tej no mas tus yuav raws Huab Tais Yes Xus qab yuav tau ntsib, yuav hla kom dhau thiaj ua tau ib tug thwj tim. Lawv yuab qee lawv txoj sia rau Tswv Ntuj thiab pab lwm tus tiag tiag xws li Vaj Qhia Zam Paj Lug Ib hais tias ‘yog koj xav hniaHuab Tais Yes Xus saum tus Ntoo Cuam, koj yuav tsum hla tus Ntoo Cuam thiab yeem cia lub kauj pos saum Huab Tais Yes Xus taub hau chob koj, mas koj thiaj yuav hnia tau Huab Tais Yes Xus.’

Hnub no yog hnub tsa Vaj Qhia Zam Paj Lug Ib ua Tim Khawv, yog tus tau txoj hmoov zoo vim nws ua neej xyiv fab raws lub Moo Zoo, nws ua tus zov yaj tsis muab hlob, nyiam sawv daws mus txog qhov kawg.

“Vaj Qhia Zam Paj Lug Ib lub ntsej muag luag ntxhi tau tsom txog Tswv Ntuj qhov zoo rau lwm tus pom. Lub Koom Txoos yuav zoo nkauj npaum cas yog sawv daws muaj lub ntsej muag zoo siab luag ntxhi, ua luab siab qhib dav lug tos txais sawv daws, tsis muaj siab npau siab kub thiab tsis ua ntsej muag ntshau ntsho.

Vaj Qhia Fas Ntshis Kus caw sawv daws thov Tim Khawv Vaj Qhia Zam Paj Lug Ib pab kom sawv daws tau txais txoj kev luag ntxhwb ntxhi nyob hauv tus plig thiab thov Ntuj ua ke tias ‘Huab Tais thov koj tos txais kuv, txawm tias kuv zoo tsis txhij, thov koj hloov kuv kom zoo xws li koj xav cia kuv ua thiab mog.’