THOV KOM PEB QHIB SIAB TXAIS TSWV NTUJ KEV KHUV LEEJ NEEG

Nyob hauv zaj tus tub loj leeb rov los tsev, mas Vaj Qhia Fas Ntshis Kus nthuav tias tus neeg twg muaj lub siab xws li Tswv Ntuj mas nws yuav zoo siab xyiv fab thaum pom lwm tus hloov siab tshiab.

Ua ntej Vaj Qhia yuav coj cov ntseeg teev Ntuj raws kab ke tus Tshiab xa xov, Vaj Qhia tau nthuav Ntawv Moo Zoo hauv hnub chiv lub lis piam 4 caij Plaub Caug rau sawv daws mloog; yog zaj hais txog tus tub loj leeb rov los tsev. Vaj Qhia nthuav tias leej txiv muaj lub siab hlub tshua thiab siab mos ces nws zam txim mus li rau nws tus me nyuam. Zaj no qhia rau peb paub tias Tswv Ntuj yog Leej Txiv tus zam txim rau peb txawm tias peb tau ua txhaum hnyav, Tswv Ntuj tos peb rov qab mus cuag nws thiab Tswv Ntuj yuav xyiv fab ua rooj qav tos txais peb.

“Peb yog tus tub loj leeb ntawd ntag, thiab zoo rau peb xav tias Leej Txiv nyiam peb thiab tos nrhw peb npaum cas.”

Nyob hauv zaj paj lug no tau hais txog tus tij laug chim thiab tsis txaus siab thaum tus txiv ua rooj qav txais tus kwv rov los, mas Vaj Qhia hais tias tus tij laug tus cuj pwm no kuj yog muaj nyob hauv peb txhua tus neeg thiab, peb npau taws vim peb raug ntxias kom ntseeg tias peb txoj kev khaub zig Tswv Ntuj tsuas yog ib txoj kab xwm thiab yog ua raws cov lus txib xwb, peb tsis nco qab txog Tswv Ntuj kev khuv leej peb, kev hlub tshua peb thiab kev nyiam peb yam tsis muaj hnub xaus.

Ntawv Moo Zoo piav ntxiv tias leej txiv mus hais kom tus tij txaus siab txais nws tus kwv tias ‘peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm, zaum no nrhiav tau nws rov los.’

Vaj Qhia nthuav tias tsim nyog peb yuav tau coj los xav saib peb puas muaj 2 yam li hais los no: lom zem thiab zoo siab xyiv fab.

Ua lom zem, yog qhov tias peb nyob ze nrog tus hloov siab tshiab los yog nws tab tom hloov siab tshiab ntawd, dhau ntawd kuj yog cov neeg nyob hauv tej xwm txheej loj los yog lawv nyob deb. Peb ua li no yog kom peb yeej peb txoj kev ntshai thiab kev me siab thaum peb nco txog peb tej yuam kev. Peb yuav ua xws li leej txiv hauv zaj no, txais thiab txhawb txhua tus neeg kom lawv sov siab, vim kev ua siab deb thiab muab txim yuav tsis pab dab tsi tau. Peb yuav ncav tes mus tuav tus neeg nyob deb txhais tes thiab peb yuav nrog nws nyob ntawd kom tau txhawb nws thiab koom nrog nws ua lom zem thaum nws tau txiav siab taug txoj kev tshiab uas zoo dua txoj qub ke.

 “Qhib siab kom dav, muab siab rau mloog, luag ntxhi tawm hauv nruab siab tuaj; nrog lawv koom lom zem, tsis yog ua kom lawv tsis kaj siab.”

Vaj Qhia ntuas ntxiv tias peb yuav zoo siab xyiv fab, yog tias peb lub siab koom nrog Tswv Ntuj ua tib lub siab. Thaum peb pom tus neeg twg hloov siab, txawm tias nws tau ua yuam kev loj lawm los, peb yuav zoo siab xyiv fab, peb yuav tsis taw tes mus rau nws tej yuam kev, tab sis peb yuav nrog nws zoo siab xyiv fab rau qhov zoo uas nws tau xaiv. Li ntawd, thov kom sawv daws txawj kawm kom paub nrog lwm tus neeg zoo siab xyiv fab mog!

“Peb yuav thov niam Mab Liab qhia peb kom peb txawj txais Tswv Ntuj kev khuv leej neeg los nyob hauv peb, kom Tswv Ntuj kev khuv leej neeg ntawd txia ua lub teeb kaj rau peb pom txog cov nyob puag ncig peb.”