THOV KOM TXOJ KEV NYIAM TSWV NTUJ THIAB HLUB TUS NYOB ZE PEB NYOB TXAWM HAUV PEB MUS LI

Nyob hauv kab ke Tus Tshiab Xa Xov hauv Hnub Chiv tim 31 lub 10 hli 2021, Vaj Qhia Fas Ntshis Kus hu ib zeej tsoom los qog Huab Tais Yes Xus lo lus qhia tias “Koj yuav nyias Tswv Ntuj tas siab tas ntsws, tas koj tus ntsuj plig thiab tas nrho koj lub zog, koj yuav nyiam tus nyob ze koj tib yam li koj nyiam koj.”

Ua ntej Vaj Qhia yuav coj cov ntseeg thov Ntuj hauv Hnub Chiv, Vaj Qhia Fas Ntshis Kus tau nthuav Ntawv Moo Zoo hauv hnub no rau sawv daws mloog, yog hais txog thaum tus kws Ntawv Ntshiab nug Huab Tais Yes Xus tias lo lus twg loj tshaj.

Huab Tais Yes Xus teb rau tus kws Ntawv Ntshiab tias thawj lo lus qhia yog lo lus tias ‘nyiam Tswv Ntuj’ thiab lo lus qhia ob yog lo lus tias ‘nyiam tus nyob ze koj’. Tus kws Ntawv Ntshiab mloog tas nws rov qog Huab Tais Yes Xus cov lus teb ib zaug ntxiv.

Yog li, Vaj Qhia thiaj hais tias yog thaum peb qog lo lus los yog hais lo lus qub ntawd mus mus los los, mas yuav pab kom peb nkag siab txog lo lus ntawd. Tswv Ntuj Lo Lus los peb yuav qog ob peb lwm li ntawd thiab.

Nyob hauv tsoom Leej Choj cov kab ke, muaj ib lub tswv yim hais tias lawv yuav coj Tswv Ntuj Lo Lus los ‘xav’ vim Tswv Ntuj Lo Lus yog cov mov muaj txiaj ntsim yug txoj sia raws li Huab Tais Yes Xus hais tias ‘tas siab tas ntsws, tas ntsuj plig, tas lub tswv yim, tas lub zog’.

Vaj Qhia thiaj rov hais tias tsum qog lo lus kom nrov nyob hauv peb mus li raws lo lus tias ‘Tswv Ntuj nyob hauv peb siab’, ces thaum ntawd Huab Tais Yes Xus yuav hais rau peb xws li hais rau tus kws Ntawv Ntshiab tias “Koj nyob tsis deb ntawm Tswv Ntuj lub Ceeb Tsheej lawm.”

Vaj Qhia ntuas tias Tswv Ntuj nrhiav tus neeg muaj siab ntseeg, tsis yog nrhiav tus neeg paub Tswv Ntuj Lo Lus zoo; vim tus neeg muaj siab ntseeg mas nws zoo siab txais Lo Lus thiab coj mus hloov nws lub siab. Li ntawd, Vaj Qhia thiaj xav kom cov ntseeg sawv daws nquag muab Ntawv Moo Zoo los nyeem tsis tseg kom Tswv Ntuj Lo Lus nyob txawm hauv lawv, kom Tswv Ntuj Lo Lus tawg paj txi txiv nyob hauv lawv.

Lub Moo Zoo hauv hnub no qhia tias tsis yog paub Tswv Ntuj Lo Lus tiam sis tsum nkag siab Tswv Ntuj Lo Lus tias kom peb nyiam Tswv Ntuj thiab hlub tus nyob ze peb, peb yuav tsum tso rau lo lus qhia no nrov nyob hauv peb thiab kom lo lus qhia no ua lub suab nqua hu peb ua yam tsim nyog ua. Li ntawd, peb ib leej yuav tsom txog ib lo lus cav txog txoj kev nyiam nyob hauv peb.

Vaj Qhia xaus tias peb yuav tso kom Huab Tais Yes Xus lo lus hauv hnub no muaj txoj sia nyob hauv peb. Lo lus ntawd yog ‘nyiam Tswv Ntuj tas siab tas ntsws, tas ntsuj plig, tas lub tswv yim, tas lub zog thiab nyiam tus nyob ze peb ib yam li peb nyiam peb’.

Txhua hnub, peb yuav nug tus kheej tsis tseg tias Tswv Ntuj Lo Lus no puas muaj nyob hauv peb thiab Tswv Ntuj lub suab puas nrov hauv peb tuaj tias koj yuav nyiam Tswv Ntuj thiab ua zoo rau tus koj tau ntsib hauv hnub no.