THOV NTUJ RAU TUS NEEG UA PHEM RAU KOJ

Hnub Chiv lub lis piam 7 caij Nyob Nruab Xyoos, Vaj Qhia Fas Ntshis Kus ntuas tsoom neeg ntseeg kom ua raws Huab Tais Yes Xus tus piv txwv thiab kom lawv muab kev khuv leej pauj rov rau cov neeg ua phem rawv lawv, txhob muab kev npau taws thiab siv zog los pauj rov qab.

Nyob hauv Vaj Qhia txoj kab xwm qhia Ntuj kev cai rau cov ntseeg hauv Hnub Chiv Ntuj Tus Tshiab Xa Xov hauv lub lis piam no, Vaj Qhia tau muab cov zaj nyeem hauv Ntawv Moo Zoo los nthuav ntuas sawv daws. Ntawv Moo Zoo hais txog thaum Huab Tais Yes Xus qhia cov thwj tim coj lub neej kom ntxim Tswv Ntuj siab.

Huab Tais Yes Xus hais tias ‘Koj yuav nyiam koj tus yeeb ncuab, koj yuav ua zoo rau tus ntxub koj. Tus twg ib ncuav pias rau koj sab plhu, koj yuav tig sab tod rau nws ntaus thiab.’

Vaj Qhia ntuas tias thaum peb hnov lo lus tias ‘tig koj ib sab plhu rau nws ntaus thiab’, mas peb xav tias yog yam tsis ncaj ncees rau peb.

Tab sis peb yuav pom tias thaum lawv ntes Huab Tais Yes Xus mus cuag cov Fas Lis Xais, mas muaj ib tug ib tawg ncuav rau Huab Tais Yes Xus sab plhu. Huab Tais Yes Xus hais rau nws tias ‘yog kuv hais lus phem, koj ua pov thawj qhia saib qhov twg phem. Hos yog kuv hais raug lawm, vim li cas koj thiaj ntaus kuv?’ (Z 18: 22-23)

Vaj Qhia nthuav tias ‘tig koj sab plhu rau nws ntaus’ tsis yog kom peb ua tus ntsiag to thaum raug ntaus, yog peb ua li ces peb kawg tau qhov tsis ncaj ncees, tab sis yam Huab Tais Yes Xus qhia mas yog kom peb txhob npau taws los txhob pauj rov qab, tab sis peb yuav khuv leej tus neeg ntawd.

Peb twb pom tias Huab Tais Yes Xus ua lub siab mos ua zoo nug tus ntaus nws. Li ntawd, lo lus qhia kom tig ib sab plhu rau thiaj tsis yog peb zwm rau tus ua phem rau peb, tiam sis yog yam tus neeg muaj zog tsim nyog ua rau tus tsis muaj zog pom, yog muab qhov zoo yeej qhov phem.

Vaj Qhia hais tias kev nyiam yog yam Tswv Ntuj pub dawb dawb rau peb, yog li thiaj tsis muaj qab hau dab tsi yuav mus pauj kua zaub ntsuab rau lwm tus. Li ntawd, Huab Tais Yes Xus thiaj tsis nrhiav kev pauj rov qhab.

Tej zaum yuav muaj lus nug tias puas yuav muaj tseeb tau uas ib tus neeg twg yuav nyiam tau nws tus yeeb ncuab. Vaj Qhia teb tias “Yog peb siv peb lub zog xwb mas yuav ua tsis tau, tab sis yog peb thov Huab Tais Yes Xus lub Tswv Yim pab mas peb yuav muaj peev xwm ua zoo rau tus neeg ua phem rau peb, peb yuav muaj peev xwm nyiam tus ntxub peb tau.”

Vaj Qhia hais tias nws tu siab thaum hnov cov ntseeg khav tias lawv saib lwm tus yog lawv tus yeeb ncuab thiab lawv xav nrog lwm tus tsim kev kub ntxhov. Yog li Vaj Qhia thiaj ntuas sawv daws kom sib pab thov Ntuj pub rau cov neeg tau xav yuam kev li ntawd, thiab thov Leej Ntuj Plig Ntshiab tshoj peb lub siab kom nyiam ua raws Huab Tais Yes Xus tus piv txwv.

“Thov kom peb muaj lub siab muag siab mos thaum peb nyob hauv kev sim siab.”