TSIM IB KEM NTSIAG TO RAU LEEJ LO LUS NQES LOS NYOB

Vaj Qhia Fas Ntshis Kus cov lus ntuas hauv hnub tim 15 lub 12 hlis yog hais txog Leej Ntshiab Yos Xes tus yam ntxwv nyob ntsiag ntsiag. Yam ntsiag to no caw peb kom txhim ib kem tsev rau Leej Lo Lus los xeeb ua Yes Xus.

Vaj Qhia hais tias Leej Ntshiab Yos Xes nyob ntsiag to tsis yog nws tsis txawj hais lus tiam sis yog nws nyob ntsiag kom tau mloog Tswv Ntuj Lo Lus, nws nyob ntsiag ntsiag kom lub zog loj hauv nws tawm los tau. Leej Ntshiab Zam hwm Ntoo Cuam tau hais tias Huab Tais Ntuj hais lus nyob hauv qhov ntsiag ntsiag thiab neeg tus plig yuav hnov Tswv Ntuj Lo Lus hauv kev ntsiag.

Yog soj ntsuam Huab Tais Yes Xus lub neej hauv ntiaj teb no, yuav pom tias Huab Tais Yes Xus kuj nyob ntawm tej qhov xu kev ntsiag to mloog Leej Txiv lus raws li Mab Liab thiab Yos Xes tus yam ntxwv.

Vaj Qhia muab kev tseem ceeb rau Leej Ntshiab Yos Xes tus yam ntxwv nyob ntsiag ntsiag no, tab sis Vaj Qhia kuj hais tias yog ib tug yam ntxwv tsis yooj yim rau neeg xyaum vim tias kev nyob ntsiag to yog lub sij hawm rau peb rov soj ntsuam tus kheej thiab tawm tsam qhov tseeb nyob hauv peb.

Txawm yuav nyuaj npaum cas los xij, Vaj Qhia kuj xav thov sawv daws los nrhiav ib lub sij hawm nyob ntsiag to kom tau mloog Leej Ntuj Plig lub suab nrov nyob hauv peb.

“Peb yuav kawm zaj no ntawm Leej Ntshiab Yos Xes, xyaum nyob ntsiag to kom Leej Ntuj Plig Ntsiab tau tsim ib tug neeg tshiab los hloov peb tus neeg qub no, kom peb tau kev nplij siab thiab txhim kho peb dua tshiab. Kev nyob ntsiag to muaj txiaj ntsim rau peb siab ntsws kom paub xaiv lus hais thiab paub xaiv qhov zoo.”